ނައިޓް މާކެޓް މިފަހަރު ދަރުބާރުގޭގައި، ފޯމް ދޫކުރުން އަންނަ މަހު

އަންނަ އަހަރު އޭޕްރިލް މަހުގައި އިންޑޯރ ނައިޓް މާކެޓް ބޭއްވުމަށް ނިންމާފައިވާ ކަމަށާއި މޭޒު ހޯދުމަށް ފޯމް ދޫކުރުން އަންނަ މަހުގައި ފަށާނެ ކަމަށް ނައިޓް މާކެޓް އިންތިޒާމްކުރާ ކުންފުނިން ބުނެފިއެވެ.

ނޫސްވެރިންނަށް މައުލޫމަތު ދެމުން ލިކަމެކް ޕްރައިވެޓް ލިމިޓެޑުގެ މެނޭޖިން ޑިރެކްޓަރ ހަސަން ލަބީބު ވިދާޅުވީ ދަރުބާރުގޭގައި އޭޕްރިލް މަހުގެ 18 ވަނަ ދުވަހުން ފެށިގެން 27 ވަނަ ދުވަހުގެ ނިޔަލަށް ނައިޓް މާކެޓް ބޭއްވުމަށް ނިންމާފައިވާ ކަމަށާއި ނައިޓް މާކެޓްގެ މޭޒެއް 10 ރެޔަށް ވިއްކުމަށް ހަމަޖެހިފައި ވަނީ 6000 ރުފިޔާ އަށް ކަމަށެވެ. ނައިޓް މާކެޓްގައި ދަރުބާރުގޭގެ ބޭރު އަދި ހުރިހާ ހޯލެއް ހިމެނޭ ގޮތަށް 260 މޭޒު ދޫކުރުމަށް ހަމަޖެހިފައިވާ ކަމަށް ލިކަމެކް އިން ވަނީ ބުނެފައެވެ.

ނައިޓް މާކެޓުން މޭޒު ބޭނުންވާ ފަރާތްތަކަށް މޭޒު ދޫކުރުމަށް ހަމަޖެހިފައި ވަނީ އަންނަ މަހުގެ ހަތަރު ވަނަ ދުވަހުން ފެށިގެން ޝީ ބިލްޑިންގްގެ ތިންވަނަ ފަންގިފިލާ އިން ކަމަށް ލިކަމެކް އިން ވަނީ ބުނެފައެވެ. އަދި މޭޒު ނަގަން އަންނައިރު އައިޑީކާޑު ގެނައުމަށް އެކުންފުނިން ވަނީ އެދިފައެވެ. ނައިޓް މާކެޓްގައި ބައިވެރިވުމާއި ގުޅޭ އިތުރު މައުލޫމާތު ހޯދުމަށް 9409999 އަށް ގުޅުމަށް އެ ކުންފުނިން ވަނީ ބުނެފައެވެ.