ރާއްޖޭގެ މާލީ ނިޒާމުގެ ތެރެއިން ޓެރަރިޒަމަށް ހަރަދުކުރި ކަމަށް ޝައްކު ކުރެވޭ ގިނަ މައްސަލަތަކެއް ހުރިކަމަށް މަރުކަޒީ ބޭންކް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) އަހަރީ ރިޕޯޓުން ފާހަގަވެއްޖެއެވެ.

އާދިއްތަ ދުވަހު އެފްއައިޔޫ އިން އާންމުކުރި އެ ޔުނިޓްގެ އަހަރީ ރިޕޯޓުގައި ފާހަގަކޮށްފައިވާ ގޮތުން 54 ޕަސެންޓް މައްސަލައަކީ ޓެރަރިޒަމަށް ފައިނޭންސް ކުރި ކަމަށް ޝައްކު ކުރެވޭ ކަންކަމެވެ. އެއީ ގާތްގަނޑަކަށް ހަތް މައްސަލަ އެވެ.

މަނީ ލޯންޑަރިން އަދި ޓެރަރިޒަމަށް ފައިނޭންސް ކުރޭތޯ ބަލާ ޔުނިޓްގެ ރިޕޯޓުގައި ވާ ގޮތުގައި މާލީ މުއާމަލާތްތަކުގެ ތެރެ އިން އެ ޔުނިޓަށް ޝައްކު ކުރެވިގެން 13 މައްސަލައެއްގެ ޓްރާންސެކްޝަން އެނަލައިސިސް ހަދާފައިވެ އެވެ.

މީގެ އިތުރުން މަނީ ލޯންޑްރިން އާއި ޓެރަރިޒަމަށް ފައިނޭންސް ކުރުމުގެ ތުހުމަތު ބޮޑަށް ކުރެވޭ ގައުމަކުން ކޮށްފައިވާ މުއާމަލާތްތަކަކާ ގުޅިގެން 23 މައްސަލައެއްގެ އެނަލައިސިސް ހަދާފައިވެއެވެ.

ތިން ވަނަ އަށް އެންމެ ގިނައިން އެނަލައިސިސް ހަދާފައި ވަނީ މީހާ އާ ނުބައްދަލު ބޮޑެތި މާލީ މުއާމަލާތްތައް ހިންގާފައިވާ ކަމަށް ޝައްކުކުރެވޭ މައްސަލަތައް ނަމަވެސް އެކަމުގެ ތަފްސީލެއް އެ ރިޕޯޓްގައި ހާމަކޮށްފައެއް ނުވެއެވެ.

އެފްއައިޔޫ އިން ބުނީ ޓެރަރިޒަމާ ގުޅުން ހުރި ކަންތައްތަކުގައި މާލީ އިދާރާތައް މެދުވެރިކޮށް ސެލްފް ފައިނޭންސް ކުރާ ކަން ފާހަގަ ކުރެވިފައިވާ ކަމަށެވެ. އެފްއައިޔޫ އިން ބުނާ ގޮތުގައި ސެލްފް ފައިނޭންސް ކުރުމަކީ ޓެރަރިޒަމުގެ އަމަލެއް ހިންގުމަށް ނުވަތަ އެފަދަ ކަމެއްގައި ބައިވެރި ވާން އަމިއްލަ އަށް ހަރަދު ކުރުމެވެ.

އޭގެ ތެރޭގައި ބޭރުގެ ދާހިލީ ހަނގުރާމަތަކުގައި ބައިވެރިވުމަށް އަމިއްލަ ހަރަދުގައި ދަތުރު ކުރުމާއި ދަތުރުމަތީ ކެއިންބުއިމުގެ ހަރަދުތައް ވެސް ހިމެނޭ ކަމަށް ރިޕޯޓުގައި ބުނެފައިވެ އެވެ.

އެފްއައިޔޫގެ ރިޕޯޓުގައި ތުރުކީ މަގުން ސީރިއާ އަށް އެތެރެވާން މަސައްކަތް ކޮށްފައިވާކަން ހާމަވާކަން ފާހަގަކޮށްފައިވެއެވެ.

އެފްއައިޔޫ އިން އެއްވެސް މައްސަލަ އެއް ތަހުގީގުކުރާ ފަރާތަކަށް ނުވާތީ ޝައްކު ކުރެވޭ މައްސަލަތައް ފޮނުވަނީ ކަމާ ބެހޭ އެކިއެކި އިދާރާތަކަށެވެ. އެގޮތުން އެފްއައިޔޫ އިން ބެލި އެ މައްސަލަތަކުގެ ތެރެ އިން ފުލުހުންނަށް އެކަނި 10 މައްސަލަ އެއް ވަނީ ފޮނުވާފައެވެ. ފުލުހުންނަށާއި މީރާ އަށް ނުވަ މައްސަލައެއް ފޮނުވާފައިވާ އިރު ފުލުހުންނާއި ކައުންޓާ ޓެރަރިޒަމް ސެންޓަރަށް ހަތަރު މައްސަލައެއް ވަނީ ފޮނުވާފަ އެވެ.