މާދަމާ ފުވާދު ރާއްޖެ ވަޑައިގަންނަވަނީ
24 ނޮވެމްބަރު 2018 | ހޮނިހިރު 10:12ފުވާދު ރާއްޖެ ވަޑައިމިގަންނަވަނީ 3 އަހަރާއި، 7 މަހާއި، 5 ދުވަހަށްފަހު
އިލެކްޝަންސް ކޮމިޝަންގެ ކުރީގެ ރައީސް ފުވާދު ތައުފީގު
އިލެކްޝަންސް ކޮމިޝަންގެ ކުރީގެ ރައީސް ފުވާދު ތައުފީގު ތިން އަހަރަށްވުރެ ގިނަ ދުވަހު ސްރީލަންކާގައި އަމިއްލައަށް އަރުވާލެވިގެން ހުންނެވުމަށްފަހު އާދިއްތަ ދުވަހު ރާއްޖެއަށް ވަޑައިގަތުމަށް ނިންމަވައިފިއެވެ.
ހޮނިހިރު ދުވަހު ފުވާދު ކުރެއްވި ޓްވީޓެއްގައި ވިދާޅުވީ 3 އަހަރާއި، 7 މަހާއި، 5 ދުވަހަށްފަހު، ނޮވެމްބަރު 25 ދުވަހު ހެނދުނު 7:00 ގައި ރާއްޖެ ވަޑައިގަންނަވާނެކަމަށެވެ. ސްރީލަންކާގެ ރައްޔިތުންނަށް ޝުކުރުވެސް އަދާކުރައްވާ ފުވާދު ވިދާޅުވީ ސްރީލަންކާއަކީ އަމިއްލަ ގެދޮރުން ދުރުގައި ހުރި ގެއެއް ކަމަށެވެ.
ފުވާދުގެ މިޓްވީޓުގައި އޭނާ މާލެ ވަޑައިގަންނަވާނެ ފްލައިޓް ނަންބަރު ވެސް ވަނީ އާންމުކުރައްވާފައެވެ.
ފުވާދު ރާއްޖެއަށް ވަޑައިގަންނަވާނެކަން އިއުލާނު ކުރެއްވުމާއެކު އެތައް ބަޔަކު އަންނަނީ އޭނާއަށް މަރުހަބާ ކިޔަމުންނެވެ.
ފުވާދަކީ 2013ގެ ރިޔާސީ އިންތިޚާބުގެ ތެރޭގައި އިލެކްޝަންސް ކޮމިޝަންގެ ރައީސެވެ. ނަމަވެސް ރިޔާސީ އިންތިޚާބާ ގުޅިގެން އުފެދުނު ސިޔާސީ ހަމަނުޖެހުންތަކުގެ ތެރޭގައި، ކޮމިޝަންގެ މެންބަރުކަމުން ވަކިކޮށް ހުކުމެއް ކުރުމަށް ފަހު އޭގެ ފަހުން ސްރީލަންކާއަށް ވަޑައިގެން އެޤައުމުގައި ދިރިއުޅުއްވަން ފެއްޓެވިއެވެ.
2013 ވަނަ އަހަރު ފުވާދާއި އިލެކްޝަންސްގެ އެހެން ބައެއް ބޭފުޅުން ކޮމިޝަނުން ވަކިކޮށް، އެބޭފުޅުންގެ މައްޗަށް ކޯޓުގެ ހުރުމަތްކެނޑިކަމަށް ބުނެ ޖަލު ހުކުމެއް އިއްވާފައިވަނީ އިލެކްޝަންސް ކޮމިޝަން މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީއަށް ހާޒިރުކުރުމުން، އެކޮމިޓީގައި ދެއްކެވި ވާހަކަފުޅުތަކަކާއި ގުޅިގެންނެވެ. ޖަލު ހުކުމެއް ކުރިޔަސް، އެހުކުމުގެ މުއްދަތުގައި އިތުރު ކުށެއް ނުކުރާނަމަ ޖަލަށް ނުލާ ގޮތަށް ހުކުމަށްފަހު އެބޭފުޅުން ދޫކޮށްލިއެވެ.
ގިނަ ބަޔަކު ބުނާ ގޮތުގައި ފުވާދު އިލެކްޝަންސް ކޮމިޝަނުގެ ރައީސްކަމުގެ މަޤާމުން ބޭރުކުރީ ރިޔާސީ އިންތިޚާބުގެ ކަންތައް މިނިވަންކަމާއި، އިންސާފުވެރިކަމާއިއެކު ގެންދަވަން މަސައްކަތް ކުރެއްވުމުންނެވެ.
