އެޑިއުކޭޝަން މިނިސްޓަރު ޑރ. އައިޝަތު އަލީ އައްޑޫ ސިޓީއަށް ވަޑައިގެން، އެ ސިޓީގެ ސްކޫލުތަކުގެ ހާލަތު ބައްލަވައިފިއެވެ.
އެޑިއުކޭޝަން މިނިސްޓަރު ކަމާއި ހަވާލުވެވަޑައިގެންނެވުމަށްފަހު ޑރ. އައިޝަތު އަލީ އަތޮޅުތަކަށް ކުރައްވާ ފުރަތަމަ ދަތުރުފުޅުގައި އައްޑޫއަށް ވަޑައިގެންފައި މިވަނީ ހޮނިހިދު ދުވަހުގެ ހެނދުނުގެ ވަގުތެއްގައެވެ.
އެކަމަނާ ވަނީ އައްޑޫއަށް ވަޑައިގެން އައްޑޫ ސްކޫލްތަކުގެ ޕްރިންސިޕަލުންނާއި ބައްދަލުކުރައްވާފައެވެ. އަދި މިބައްދަލުކުރެއްވުމުގައި ސްކޫލްގެ މަސައްކަތްތައް ކުރިއަށްދާ ގޮތާއި، ހުރި ދަތިތަކާއި ބެހޭ ގޮތުން މަޝްވަރާ ކުރައްވާފައިވެއެވެ.
މައުލޫމާތު ލިބޭ ގޮތުގައި މިނިސްޓަރ އައްޑޫ ސްކޫލްތަކުގެ މުވައްޒަފުންނާއި، ބެލެނިވެރިންނާއި ވެސް ބައްދަލު ކުރައްވާނެއެވެ.
އެޑިއުކޭޝަން މިނިސްޓަރު ޑރ. އައިޝަތުގެ މިދަތުރުފުޅުގައި ހޮނިހިރު ދުވަހު ހަވީރު ހުޅުމީދޫއަށް ވަޑައިގެން ޝަމްސުއްދީން ސްކޫލްގެ ބެލިނިވެރިންނާއި ބައްދަލު ކުރުމަށް ވަނީ ހަމަޖެހިފައެވެ. އަދި އައްޑޫ ދަތުރުފުޅަށްފަހު، އާދިއްތަ ދުވަހު ފުވައްމުލަކަށް އެކަމަނާ ވަޑައިގަންނަވާނެއެވެ.
