ހަފްތާއަކު 290،000 ޕައުންޑު ލިބޭ ގޮތަށް ކަންޓޭ އެއްބަސްވުން އާކޮށްފި
24 ނޮވެމްބަރު 2018 | ހޮނިހިރު 13:59ޗެލްސީގެ އެއްބަސްވުން ކަންޓޭ އާކުރީ ފަސް އަހަރަށް
ޗެލްސީގެ އެއްބަސްވުން ކަންޓޭ އާކުރުން
ހަފްތާއަކު 290,000 ޕައުންޑު ލިބޭ ގޮތަށް ފްރާންސްގެ މިޑްފިލްޑަރު އެންގޯލޯ ކަންޓޭ ޗެލްސީގެ އެއްބަސްވުން އާކޮށްފިއެވެ.
ޗެލްސީއާއެކު ކަންޓޭ ފަސް އަހަރުގެ އެއްބަސްވުމެއް ހަދާފައި ވާއިރު، އޭނާ އެއްބަސްވުން އާކުރީ ގިނަ ކްލަބްތަކުން ހޯދަން މަސައްކަތް ކުރަމުން އަންނަނިކޮށެވެ.
ޗެލްސީއާ އެކު ކަންޓޭ ކުރިން ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ އަށް ހަފްތާއަކު ލިބެމުން އައީ 150،000 ޕައުންޑެވެ.
އެއްބަސްވުން އާކުރުމަށްފަހު ކަންޓޭ ބުނީ، ފާއިތުވެ ދިޔަ ދެ އަހަރު ޗެލްސީގައި ހޭދަކުރީ ވަރަށް އުފާވެރިކަމާއެކު ކަމަށާއި، އިތުރު އަހަތުތަކެއް ޗެލްސީގައި ހޭދަކުރަން ފުރުސަތު ލިބުމުން އެކަމާ އުފަލުން ހުރި ކަމަށެވެ.
އެގޮތުން ކަންޓޭ ބުނީ ޗެލްސީ އަށް ބަދަލުވި ފަހުން ގިނަ ކުރިއެރުންތައް ލިބިފައިވާ ކަމަށާއި، އުންމީދު ނުކުރާ ގިނަ އެވޯޑުތައް ވެސް ލިބިފައިވާ ކަމަށެވެ.
ލެސްޓާ ސިޓީއާ އެކު 2016 ވަނަ އަހަރުގެ ސީޒަނުގައި ޕްރިމިއާ ލީގު ކާމިޔާބު ކޮށްފައިވާ ކަންޓޭ ވަނީ އެ އަހަރު އެ ކްލަބުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ. އަދި އޭނާ ވަނީ ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމު ވެސް އެ ސީޒަނުގައި ހޯދާފައެވެ.
ކަންޓޭ ވަނީ ޗެލްސީ އަށް މިހާތަނަށް ކުޅުނު 105 މެޗުގައި ހަތަރު ލަނޑު ކާމިޔާބުކޮށްފައެވެ. އަދި އޭނާ ވަނީ ނިމިގެންދިޔަ ވޯލްޑް ކަޕް، ފްރާންސް އަށް ކާމިޔާބު ކޮށްދިނުމަށް މުހިންމު ދައުރެއް ވެސް އަދާކޮށްދީފައެވެ.
