ރައްޔިތުންގެ މަޖިލީހުގައި ހުސްވެފައި 6 ދާއިރާގެ ބައި އިލެކްޝަން ނުބާއްވާ ގޮތަށް އިލެކްޝަންސް ކޮމިޝަނުން ނިންމައިފިއެވެ.

އެކަން އެކޮމިޝަނުން ހާމަ ކޮށްފައިވަނީ ބުރާސްފަތި ދުވަހުގެ ރޭ އެކޮމިޝަނުން ކުރި ޓްވީޓެއްގައެވެ.

މަޖިލީހުން ހުސްވެފައި ވަނީ ހިންނަވަރު ދާއިރާ، ކާށިދޫ ދާއިރާ، ހެންވޭރު އުތުރު ދާއިރާ، މައްޗަން ގޯޅި އުތުރު ދާއިރާ، ލ. ގަމު ދާއިރަގެ އިތުރުން ގަލޮޅު ދެކުނު ދާއިރާގެ ގޮނޑިއެވެ.

މި ހަ ދާއިރާގެ ގޮނޑިވެސް ހުސްވެފައި ވަނީ އެ ދާއިރާތައް ތަމްސީލް ކުރައްވަމުން ގެންދެވި ބޭފުޅުން  ސަރުކާރުގެ އެކި މަގާމްތަކަށް ވަޑައިގަތުމަށް ރައްޔިތުންގެ މަޖިލީހުގެ މެމްބަރުކަމުން އިސްތިއުފާ ދެއްވުމާއި ގުޅިގެންނެވެ.

އެ ގޮތުން ހިންނަވަރު ދާއިރާ ތަމްސީލް ކުރައްވަމުން ގެންދެވި އިބްރާހިމް މުޙައްމަދު ސާލިޙް (އިބޫ) ރައީސުލްޖުމްހުރިއްޔާގެ މަގާމަތް އިންތިހާބުވެ ވަޑައިގަތުމުން އެ މަނިކުފާނުގެ އެ މާގާމުން އިސްތިއުފާ ދެއްވާފާއިރު ނައިބް ރައީސް ކަމަށް އިންތިހާބު ވެވަޑައިގަތުމުން ފައިސަލް ނަސީމް ވަނީ ކާށިދޫ ދާއިރާގެ މެމްބަރު ކަމުން އިސްތިއުފާ ދެއްވާފައި އެވެ.  ހެންވޭރު އުތުރު ދާއިރާ ތަމްސީލް ކުރައްވަމުން ގެންދެވި  އަބްދުﷲ  ޝާހިދު ވަނީ މި ސަރުކާރުގެ ފޮރިންގ މިނިސްޓަރ ކަމާއި ހަވާލުވެވަޑައިގެންފައިއެވެ. މައްޗަންގޯޅި އުތުރު ދާއިރާ ތަމްސީލް ކުރެއްވި އަލްއުސްތާޛާ މާރިޔާ އަޙްމަދުދީދީ ހަވާލުވެވަޑައިގަތީ މިނިސްޓަރ އޮފް ޑިފެންސްގެ މަގާމާއެވެ. ގަމު ދާއިރާ ތަމްސީލް ކުރެއްވި އަލްއުސްތާޛު ފައްޔާޒް އިސްމާޢީލް ހަވާލުވެވަޑައިގެންނެވީ މިނިސްޓްރީ އޮފް އިކޮނޮމިކް ޑިވެލޮޕްމަންޓް އާއެވެ.

ގަލޮޅު ދެކުނު ދާއިރާ ތަމްސީލް ކުރައްވަމުން ގެންދެވި އަޙްމަދު މަޚްލޫފް ހަވާލުވެ ވަޑައިގެންނެވީ މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ މަގާމައި އެވެ.