ބަޖެޓް ރިޕޯރޓްގައި ހިމަނާނެ ނުވަ ރިކޮމެންޑޭޝަނެއް ބަޖެޓް ކޮމިޓީއިން ފާސްކޮށްފި
22 ނޮވެމްބަރު 2018 | ބުރާސްފަތި 16:40ނުވަ ރިކޮމެންޑޭޝަނެއް ހުށަހެޅުނުއިރު ފާސްވެފައި ވަނީ ހަތް ރިކޮމެންޑޭޝަނެއް
ބަޖެޓް ކޮމިޓީގެ ބައްދަލުވުމެއް
ބަޖެޓް ރިޕޯރޓްގައި ހިމަނާނެ ނުވަ ރިކޮމެންޑޭޝަނެއް ބަޖެޓް ކޮމިޓީ އިން ފާސްކޮށްފިއެވެ.
ބުރާސްފަތި ދުވަހު އޮތް ބަޖެޓް ކޮމިޓީ އަށް 9 ރިކޮމެންޑޭޝަނެއް ހުށަހެޅުނު އިރު ފާސްވެފައި ވަނީ ހަތް ރިކޮމެންޑޭޝަނެކެވެ. ބަޖެޓް ކޮމިޓީ އަށް ހުށަހެޅުނު އިސްލާހުތަކުގެ ތެރެ އިން ފާސްވެފައި ވަނީ ގަލޮޅު އުތުރު ދާއިރާގެ މެމްބަރު އީވާ އަބްދުﷲ އާއި، ކުޅުދުއްފުށީ ދެކުނު ދާއިރާގެ މެމްބަރު އަބްދުލްގަފޫރު މޫސާ އާއި، ގައްދޫ ދާއިރާގެ މެމްބަރު އަހްމަދު ރަޝީދު އާއި، ހިތަދޫ އުތުރު ދާއިރާގެ މެމްބަރު މުހަންމަދު އަސްލަމް އާއި، ކޮމަންޑޫ ދާއިރާގެ މެމްބަރު އަހްމަދު ނާޝިދު އަދި ވިލުފުށީ ދާއިރާގެ މެމްބަރު ރިޔާޒް ރަޝީދު އާޢި، ކުޑަހުވަދޫ ދާއިރާގެ މެމްބަރު އަހުމަދު އާމިރު ހުށަހެޅުއްވި ރިކޮމެންޑޭޝަން ތަކެވެ.
މި ރިކޮމެންޑޭޝަން ތަކުގެ ތެރެއިން، ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަނީ ރިކޮމެންޑޭޝަންގެ ގޮތުގައި ބަޖެޓަށް ތިން ހުށަހެޅުމެއް ހުށަހަޅުއްވާފައެވެ. އީވާގެ ފުރަތަމަ ރިކޮމެންޑޭޝަންއަކީ ބަޖެޓަކީ އާ ސަރުކާރު އެކުލަވާލުމުގެ ކުރިން، މަޖިލީހަށް ހުށަހަޅާފައިވާ ބަޖެޓަކަށްވާ އިރު، އައު ސަރުކާރު އެކުލަވާލުމާ އެކު، ސަރުކާރުގެ އޮފީސްތަކަށް ގެނެވުނު ބަދަލުތަކާ ގުޅިގެން ބަޖެޓަށް އަންނާނެ ބަދަލުތައް މަޖިލީހަށް ހުށަހެޅުއްވި ބަޖެޓްގައި ވަކިވަކިން އެނގެން ނެތުމުން، މިނިސްޓްރީ އޮފް ފިނޭންސް އިން ރައްޔިތުންގެ މަޖިލީހަށް 2019 ވަނަ އަހަރަށް ކަނޑައަޅުއްވައި ހުށަހެޅުއްވި ބަޖެޓްގައި ބަޔާންކޮށްފައިވާ ޖުމްލަ ބަޖެޓަށް ބަދަލު ނާންނާނެ ގޮތެއްގެ މަތިން، އައު ސަރުކާރުގެ ފަރާތުން ސަރުކާރުގެ އޮފީސްތަކަށް ގެންނެވި ބަދަލުތަކާ ގުޅިގެން އޮފީސްތަކަށް ކަނޑައެޅުއްވި ބަޖެޓް އޮންނާނެ ގޮތް، ރައްޔިތުންގެ މަޖިލީހުގެ މައުލޫމާތަށްޓަކައި ބަޖެޓް ފާސްކުރާތާ 30 ދުވަހުގެ ތެރޭގައި މާލިއްޔަތު ކޮމީޓީއަށް ފޮނުވުމެވެ.
އީވާ ހުށަހެޅުއްވި ދެވަނަ ރިކޮމެންޑޭޝަނެއްގެ ގޮތުގައި ހުށަހަޅުއްވާފައި ވަނީ އިންކަމް ޓެކްސް ތައާރަފް ކުރުމަށެވެ.
އީވާ ހުށަހެޅުއްވި ތިން ވަނަ ރިކޮމެންޑޭޝަނަކީ ފެމިލީ ޕްރޮޓެކްޝަން އޮތޯރިޓީގެ މެންޑޭޓް ފުރިހަމަ އަށް އަދާކުރުމަށާއި އެ އޮތޯރިޓީގެ ހިދްމަތްތައް ފޯރުކޮށްދިނުމަށް ބޭނުންވާ މުވައްޒަފުން ހޯދައި، ވަސީލަތްތައް ގާއިމްކުރުމަށް، ދައުލަތުގެ އާމްދަނީ އިން ފޯރުކޮށްދެވޭނެ އެންމެ ރަނގަޅު މިންވަރެއް، 2019 ވަނަ އަހަރުގެ ބަޖެޓުން ނިއު ޕޮލިސީ އިނިޝިއޭޓިވްސްގެ ދަށުން އެ އޮތޯރިޓީން އެދޭ ބަޖެޓެއް ހަމަޖައްސައި ދިނުމަށެވެ.
ބަޖެޓް ކޮމިޓީއަށް ކުޅުދުއްފުށީ އުތުރުދާއިރާގެ މެމްބަރު އަބްދުލްޣަފޫރު މޫސާ (ގަޕޯ) ހުށަހަޅުއްވާފައި ވަނީ އެންމެ ރިކޮމެންޑޭޝަނެކެވެ. ގަޕޯ ހުށަހެޅުއްވި ރިކޮމެންޑޭޝަނަކީ ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަނަށް ބަޖެޓް އިތުރުކޮށްދެވިފައި ވާއިރު، މިހާރަށްވުރެ ބާރު ސްޕީޑެއްގައި މައްސަލަތައް ނިންމުމާއި، ޕަރފޯމެންސް އޮޑިޓެއް ހެދުމަށް ފަހު މާލިއްޔަތު ކޮމިޓީއަށާއި މިނިވަން މުއައްސަސާތަކާއި ބެހޭ ކޮމިޓީ އަށް ފޮނުވައި ދެއްވުމެވެ.
ބަޖެޓް ކޮމިޓީއަށް ގައްދޫ ދާއިރާގެ މެމްބަރު އަހްމަދު ރަޝީދު އެންމެ ރިކޮމެންޑޭޝަނެއް ހުށަހެޅުއްވާފައި ވާއިރު އެ ރިކޮމެންޑޭޝަންގައި ބުނެފައި ވަނީ މިހާރު ހަދަން ފަށާފައި ހުރި ޑޮމެސްޓިކް އެއަރޕޯޓްތައް ނުހުއްޓި ކުރިއަށް ގެންދިއުމެވެ.
ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވަނީ ދެ ރިކޮމެންޑޭޝަނެއް ހުށަހަޅުއްވާފައެވެ. އަސްލަމް ހުށަހެޅުއްވި ފުރަތަމަ ރިކޮމެންޑޭޝަނަކީ ލާ މަރުކަޒީ އުސޫލުން ހިންގުން ހަރުދަނާ ކުރުން ސަރުކާރުގެ ސިޔާސަތަކަށް ވީހިނދު، ކައުންސިލްތަކުން އިތުރަށް ކުރަންޖެހޭ ހަރަދުތައް މިނިސްޓްރީ އޮފް ފިނޭންސްގެ ކޮންޓިންޖެންސީ ބަޖެޓުން ހަމަޖައްސައި ދިނުމެވެ.
އަސްލަމްގެ ދެވަނަ ރިކޮމެންޑޭޝަނެއްގެ ގޮތުގައި ހުށަހަޅުއްވާފައި ވަނީ ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުރުމަށާއި، އެތަންތަނުގެ ޕަރފޯމަންސް އޮޑިޓެއް ހެދުމަށެވެ.
ކޮމަންޑޫ ދާއިރާގެ މެމްބަރު އަހްމަދު ނާޝިދު ވެސް ދެ ރިކޮމެންޑޭޝަނެއް މަޖިލީހަށް ހުށަހަޅުއްވާފައި ވާއިރު، ފުރަތަމަ ރިކޮމެންޑޭޝަނެއްގެ ގޮތުން ހުށަހަޅުއްވާފައި ވަނީ ސަރުކާރުން ހިންގާފައިވާ ބޮޑެތި ޕްރޮޖެކްތްތަކުގެ ތެރޭގައި ހިމެނޭ ހައުސިންގ، ވެލާނާ އިންޓަރނޭޝަނަލް އެއަރޕޯޓް، އައިޖީއެމްއެޗްގެ 25 ބުރީގެ އިމާރާތް، ބްރިޖް، ޑޮމެސްޓިކް އެއަރޕޯޓްތަކުގެ މަޝްރޫއުތައް ހިންގާފައި ވަނީ ދައުލަތުގެ ގާނޫނުތަކާއި އެއްގޮތަށްތޯ ބަލައި، މަޖިލީހުގެ މާލިއްޔަތު ކޮމިޓީ އަށް ހުށަހެޅުމެވެ.
ދެވަނަ ރިކޮމެންޑޭޝަނެއްގެ ގޮތުގައި ނާޝިދު ބަޖެޓް ކޮމިޓީ އަށް ހުށަހަޅުއްވާފައިވާ ރިކޮމެންޑޭޝަނަކީ އެމްއެމްޕީއާރްސީގެ ހިޔާނާތުގެ މައްސަލަ ބަލައި، އެ މައްސަލާގައި ދައުލަތަށް ލިބެންޖެހޭ މިންވަރު އެނގޭނެ އޮޑިޓެއް މަޖިލީހުގެ މާލިއްޔަތު ކޮމިޓީއަށް ހުށަހެޅުމެވެ.
ވިލުފުށީ ދާއިރާގެ މެމްބަރު ރިޔާޒް ރަޝީދު ބަޖެޓް ކޮމިޓީއަށް ހުށަހެޅުއްވި ރިކޮމެންޑޭޝަންއަކީ މީހުން ދިރިއުޅޭ ރަށްރަށުގައި ކުނިކަހާ ސާފުކުރުމަށް މިހާރު ދޭ އަގުތަކަކީ ވަރަށް ކުޑަ އަގެއްކަމަށްވާތީ، އެއަގުތައް އަލުން ރިވިއުކުރުމަށްފަހު މިހާރުގެ އަގުތައް ބޮޑުކޮށްދިނުމެވެ.
ކުޑަހުވަދޫ ދާއިރާގެ މެމްބަރު އަހްމަދު އާމިރު ހުށަހެޅުއްވި ރިކޮމެންޑޭޝަންއަކީ މިނިސްޓްރީ އޮފް ފިނޭންސްގެ ކޮންޓިންޖެންސީ ބަޖެޓްގެ ތެރެއިން މަދަނީ ޖަމިއްޔާތައް ކުރިއަރުވައި ނެގެހެއްޓުމަށް އެކަށީގެންވާ އަދަދެއް ހަމަޖައްސައި ދިނުމެވެ.
އަންނަ ހަފްތާގައި ބަޖެޓް ރިޕޯރޓް މަޖިލީހަށް ހުށަހަޅުއްވާއިރު، މި ރިކޮމެންޑޭޝަންތައް ބަޖެޓް ރިޕޯރޓްގައި ހިމަނާނެއެވެ.
