ޑްރޮގްބާގެ 20 އަހަރުގެ ފުޓްބޯޅަ ކެރިއަރު ނިންމާލުން
22 ނޮވެމްބަރު 2018 | ބުރާސްފަތި 14:46ޑްރޮގްބާ ކުޅުން ހުއްޓާލިކަން އިއުލާން ކުރީ އިންސްޓަގްރާމް މެދުވެރިކޮށް
ޑްރޮގްބާ ގޯލެއް ޖެހުމަށްފަހު އުފާފާޅުކުރަނީ
ކުރީން ޗެލްސީގެ އިތުރުން އައިވަރީ ކޯސްޓުގެ ގައުމީ ޓީމަށް ކުޅުނު އުމުރުން 40 އަހަރުގެ ޑިޑިއޭ ޑްރޮގްބާ ފުޓްބޯޅަ ކުޅުން ހުއްޓާލައިފިއެވެ.
ޑްރޮގްބާ 20 އަހަރުގެ ފުޓްބޯޅަ ކެރިއަރު ނިންމާލިކަން ރަސްމީކޮށް އިއުލާންކުރީ ބުދަ ދުވަހު އޭނާގެ އިންސްޓަގްރާމް އެކައުންޓް މެދުވެރިކޮށެވެ. ކެރިއަރު ނިންމާލުމުގެ ގޮތުން ބީބީސީއަށް ދިން އިންޓަވިއުއެއްގައި ޑްރޮގްބާ ބުނެފައި ވަނީ 20 އަހަރުގެ ފުޓްބޯޅަ ކެރިއަރުގައި ބަލާއިރު ފުޓްބޯޅަ ކުޅުންތެރިއެއެގެ ގޮތުގައި އެތައް ކަންތައްތަކެއް ހާސިލްވެފައިވާ ކަމަށެވެ. މީގެ އިތުރުން ޑްރޮގްބާ ވަނީ އޭނާގެ ކެރިއަރުގައި އޭނާއަށް އެހީވެދިން ކޯޗުންނާއި ކުޅުންތެރިންގެ އިތުރުން ސަޕޯޓްރުންނަށް ޝުކުރު އަދާކޮށްފައިއެވެ.
ޑްރޮގްބާގެ ކެރިއަރުގެ ފާއިތުވި 18 މަސް ހޭދަކޮށްފައި ވަނީ އޭނާ ހިއްސާވާ އެމެރިކާގެ ދެ ވަނަ ޑިވިޝަންގެ ފީނިކްސް ރައިސިންގ ފުޓްބޯޅަ ކުލަބްގައެވެ. ފްރާންސުގެ ދެވަނަ ޑިވިޝަންގެ ލޭ މަންސްއިން ފުޓްބޯޅަ ކެރިއަރު ފެށި ޑްރޮގްބާ އުމުރުން 23 އަހަރުގައި ފްރާންސްގެ ގުއިންގަމްޕަށް ބަދަލުވީ 2002 ވަނަ އަހަރުގެ ޖެނުއަރީ މަހުއެވެ.
އޭގެ އަށާރަ މަސްފަހުން ފްރާންސްގެ މަސޭލޭއަށް ބައްދަލުވުމަށް ފަހު ހަމަ އެހަރު ސައުވީސް މިލިއަނަށް ޗެލްސީއިން ވަނީ އެޓީމަށް ޑްރޮގްބާ ގެންގޮސްފައެވެ. ޑްރޮގްބާ ޗެލްސީ ގައި ހޭދަކުރި އަށް އަހަރު ތެރޭގައި އޭނާވަނީ ޗެލްސީ އަށް 164 ގޯލްޖަހައި ހަތަރު ޕްރިމިއާލީގްގެ އިތުރުން 2012 ވަނަ އަހަރު ޗެމްޕިއަންސް ލީގު ހޯދާދީފައެވެ.
އައިވޯރީ ކޯސްޓަށް ކުޅުނު 105 މެޗުން 65 ގޯލް ކަމިޔާބު ކޮށްދީފައިވާއިރު އެފްރިކާގެ އެންމެ މޮޅުކުޅުންތެރިޔާގެ މަގާމު ދެފަހަރު ޑްރޮގްބާ ވަނީ ހޯދާފައެވެ.
