ނިމިގެންދިޔަ ރައީސް އަބުދުﷲ ޔާމީނުގެ ސަރުކާރަކީ މި ސަރަހައްދަށް މައްސަލަތައް ޖަމާކުރި ސަރުކާރެއްގެ ގޮތުގައި ފޮރިން މިނިސްޓަރު އަބުދުﷲ ޝާހިދު ސިފަކުރައްވައިފިއެވެ.

ރައީސް އަބުދުﷲ ޔާމީންގެ ވެރިކަމުގައި ހިންގާފައިވާ ކަންކަމަށް ވަރަށް ބޮޑަށް ފާޑުވިދާޅުވަމުން "ޓައިމްސް އޮފް އިންޑިއާ" އަށް ދެއްވި އިންޓަވިއުއެއްގައި މިނިސްޓަރ ޝާހިދު ވިދާޅުވީ، ރައީސް އަބުދުﷲ ޔަމީންގެ ޚާރިޖީ ސިޔާސަތުގެ ދޯހަޅިކަމުގެ ސަބަބުން އިންޑިއާ ކަނޑުގެ ސަރަހައްދުގެ ހަމަޖެހުމަށް ބުރޫ އަރަފައިވާ ކަމަށެވެ.

ރައީސް އަބުދުﷲ ޔާމީންގެ ސަރުކާރުން ޗައިނާ ގާތްކޮށް "ފޯކަލް ޕޮއިންޓްގެ" ގޮތުގައި ހަދާފައި އޮތް އޮތުން ނިމުމަކަށް ގެނެސް އިންޑިއާ ކަނޑުގެ ގުޅުން ހަމަހަމަ ކުރަން ޖެހިފައިފައިވާކަން ޝާހިދު ފާހަގަކުރެއްވިއެެވެ.

"އިންޑިއާ ކަނޑުގެ ހަމަޖެހުން އެހެން އެއްވެސް ކަމަކަށް ވުރެ މުހިއްމު. ރާއްޖޭގެ ސަލާމަތާއި ރައްކާތެރިކަން އިންޑިއާއާއި ވަނީ ވަރަށް ބޮޑަށް ގުޅިފައި" ޝާހިދު ވިދާޅުވިއެވެ.

ޝާހިދު ވިދާޅުވި ގޮތުގައި އިންޑިއާ އާއި އެކު އޮތް ގާތް ގުޅުން އިތުރަށް ވަރުގަދަ ކުރެވޭނެ ގޮތްތަކާއި ބެހޭ ގޮތުން ރައީސް އިބްރާހިމް މުހައްމަދު ސޯލިހުގެ ސަރުކާރުން މިހާރު ވަނީ މަޝްވަރާތައް ފައްޓަވާފައެވެ. ޝާހިދު ވިދާޅުވި ގޮތުގައި ރައީސް ސޯލިހު ހުވާކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދްރަ މޯދީ ވަޑައިގެންނެވުމުން ދޭހަކޮށްދެނީ ރާއްޖެއާއި އިންޑިއާއާއި ދެ ގައުމުގެ ގުޅުން މުސްތަގުބަލުގައި ވަރުގަދަ ކުރެއްވަން ބޭނުންފުޅުވާ މިންވަރު ކަމަށެވެ.

އިންޑިއާއަކީ ކުރިއަށް އޮތްތަނުގައި ރާއްޖޭގެ ތަަރައްގީގެ މުހިއްމު ބައިވެރިއަކަށް ވެގެންދާނެކަމަށް ޝާހިދު ވިދާޅުވިއެވެ.

ރައީސް އަބުދުﷲ ޔާމީންގެ ވެރިކަމުގައި އިންޑިއާއިން ރާއްޖެއަށް ހަދިޔާކޮށްފައިވާ ހެލިކޮޕްޓަރުތައް ބޮލާލާ ޖަަހައި އަނބުރާ އިންޑިއާއަށް ގެންދިއުމަށް ބުނެފައިވާއިރު، އެ ހެލިކޮޕްޓަރުތައް އަނބުރާ ފޮނުވާ ނުލައްވާނެ ކަމަށް މިނިސްޓަރު ޝާހިދު ވިދާޅުވިއެވެ.

ޝާހިދު ވިދާޅުވީ، ދުނިޔޭގެ ގައުމުތަކާއި އޮތް ގުޅުން ހަރުދަނާ ކުރުމަކީ ޑިމޮކްރެސީއަށް އެޅޭނެ މުހިއްމު ފިޔަވަޅެއް ކަމުން ޔާމީން ސަރުކާރުގައި ކޮމަންވެލްތާއެކު އޮތް ގުޅުން ކަނޑާލި، ކަނޑާލުން ނިމުމަކަށް ގެނެސް އަލުން ކޮމަންވެލްތާ ގުޅުމަށް ނިންމަވާފައިވާ ކަމަށެވެ.

ރާއްޖެގައި ތިބި އިންޑިއާގެ މަސައްކަތްތެރިންނަށް އޮތް ވިސާ ލިބުމުގެ ދަތިތައް ހައްލުކޮށްދެއްވާނެކަމަށާއި އަދި އިންޑިއާގައި ދިރިއުޅޭ ދިވެހިންނަށް އޮތް ވިސާގެ ދަތިތައް ހައްލުކޮށްދެއްވުމަށް އިންޑިއާ ސަރުކާރާއި އެކު މަޝްވަރާ ކުރައްވާނެކަމަށް "ޓައިމްސް އޮފް އިންޑިއާ"އަށް ދެއްވި ބަސްދީގަތުމުގައި މިނިސްޓަރ ޝާހިދު ވަނީ ވިދާޅުވެފައެވެ.

ފޮރިން މިނިސްޓަރު ކަމަށް ޝާހިދު އައްޔަން ކުރެއްވުމަށް ފަހު އެމަނިކުފާނު ގައުމުން ބޭރަށް ކުރައްވާ ފުރަތަމަ ދަތުރުފުޅުގައި ވަޑައިގަތުމަށް ވެސް ނިންމަވަފައި ވަނީ އިންޑިއާއަށެވެ. އެގޮތުން މި މަހުގެ 26 ގައި އެމަނިކުފާނު އިންޑިއާއަށް ފުރާވަޑައިގަންނަވާނެއެވެ.