ސޯޝަލް މީޑިއާގައި ރައްޔިތުން ދަނީ ރުހުން ނުދޭން ގޮވާލަމުން
ޖޭޕީއިން ކެބިނެޓަށް އައްޔަންކުރައްވާފައިވާ ހަތަރު ވަޒީރުން
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙްގެ ކެބިނެޓުގައި ތިއްބެވި ބައެއް މިނިސްޓަރުންނަށް ރުހުން ނުދިނުމަށް އެދި ސޯޝަލް މީޑިއާގައި ރައްޔިތުން އެދެން ފަށައިފިއެވެ.
ސޯޝަލް މީޑިއާގައި އެކްޓިވްކޮށް ހަރަކާތްތެރިވާ ގިނަ އަދަދެއްގެ ރައްޔިތުން، އެ ރައްޔިތުން ތަމްޞީލުކުރާ މަޖިލިސް މެމްބަރުން ޓެގްކުރައްވާ ސޯޝަލް މީޑިއާގައި, ރައްޔިތުން ގޮވާލަމުންދަނީ ޖޭޕީއިން ކެބިނެޓަށް އައްޔަންކުރައްވާފައިވާ ހަތަރު ވަޒީރަކަށް ރުހުން ނުދިނުމަށެވެ.
އެގޮތުން މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ، މުޙައްމަދު މަލީޙް ޖަމާލް އާއި މިނިސްޓަރ އޮފް ހެލްތް، އަބްދުﷲ އަމީން އާއި މިނިސްޓަރ އޮފް ޓްރާންސްޕޯރޓް އެންޑް ސިވިލް އޭވިއޭޝަން އާއިޝަތު ނަހުލާ އަދި މިނިސްޓަރ އޮފް ޓުއަރިޒަމް އަލީ ވަހީދަށް ރުހުން ދޭން ނުފެންނަ ކަމަށް އެ ރައްޔިތުން ދަނީ ގޮވާލަމުންނެވެ.
ރައްޔިތުން ބުނަމުންދަނީ މި މިނިސްޓަރުންނަކީ އެންމެ އެކަށީގެންވާ ގޮތުގައި މި މަގާމުތައް އަދާކުރެވޭނެ ޤާބިލް ބޭފުޅުން ނޫން ކަމަށެވެ. އަދި ގިނަ ބައެއްގެ ފާޑުކިޔުންތައްވެސް ބައެއް ވަޒީރުންނަށް ވަނީ އަމާޒުވެފައެވެ.
ކެބިނެޓްގެ މަޤާމްތަކަށް މިނިސްޓަރުން އައްޔަން ކުރައްވާފައިވާއިރު، މި ބޭފުޅުންނަށް ރައްޔިތުންގެ މަޖިލީހުން ރުހުން ހޯދަން ޖެހޭނެއެވެ.
ކެބިނެޓަށް އައްޔަން ކުރެއްވި ވަޒީރުންގެ ތެރޭގައި މީގެ ކުރިންވެސް އެކި ސަރުކާރުތަކުގައި ވަޒީރުކަން ކުރެއްވި ހަ ބޭފުޅަކު ހިމެނިވަޑައިގެންފައިވާއިރު އޭގެ ތެރޭގައި މަލީހްއާއި އަމީން އަކީ ރައީސް ޔާމިން ސަރުކާރުގައިވެސް ވަޒީރުންގެ މަޤާމު އަދާކުރެއްވި ދެ ބޭފުޅުންނެވެ.
ބަންޑާރަ ނާއިބު ކަމަށް އައްޔަން ކުރެއްވި އިބްރާހިމް ރިއްފަތާ އެކު 20 ވަޒީރަކު ވަނީ ރައީސް ސޯލިހުގެ ކެބިނެޓަށް އައްޔަން ކުރައްވާފައެވެ. ކެބިނެޓުގައި ހަތް އަންހެން ވަޒީރުން ހިމެނެއެވެ.
