ސައުދީ އަރަބިއްޔާ އިން ދިވެހި ސަރުކާރަށް ހަދިޔާކުރި ވަޒަން ނާރާ ވައްތަރުގެ އަގު ބޮޑު ކާރެއް ރައީސުލްޖުމްހޫރިއްޔާގެ ރަސްމީގޭގެ ކުރީގެ ޗީފް އޮފް ސްޓާފް އަހްމަދު މުސްތަފާ މުހައްމަދުގެ ނަމުގައި ރަޖިސްޓްރީކުރި މައްސަލަ އެންޓި ކަރަޕްޝަންސް ކަމިޝަން، (އޭސީސީ) އިން ބަލަން ފަށައިފިއެވެ.

އޭސީސީގެ އިސް އޮފިޝަލަކު ރާއްޖެއެމްވީ އަށް ވިދާޅުވީ އެމައްސަލަ އެ ކަމިޝަނަށް ހުށައަޅާފައިވާ ކަމަށާއި މިދިޔަ ހަފްތާ އިން ފެށިގެން އެމައްސަލަ ބަލަން ފަށާފައިވާ ކަމަށެވެ.

އެނގިފައިވާ ގޮތުގައި އެ މައްސަލައާގުޅުން ހުރި ލިއުންތަކެއް ކަސްޓަމް މެދުވެރިކޮށް އޭސީސީ އިން ވަނީ ހޯދާފައެވެ. 

މި އަހަރުގެ އޮގަސްޓް މަހުގެ މެދުތެރޭގައި ސައުދީ ސަރުކާރުން ދިވެހި ސަރުކާރަށް ހަދިޔާކޮށްފައި ވަނީ، "މާސިޑީޒް ބެންޒް އެސް 600" މަރުކާގެ ކާރެކެވެ. 

ސައުދީން ހަދިޔާކުރި އަގުބޮޑު ކާރު ސިފައިންގެ ބެލުމުގެ ދަށުގައި އޮއްވައި، އެ ކާރު ކަސްޓަމްސްއިން ނެރުނު ކަމަށް ހެދުމަށްޓަކައި އަމިއްލަ ކުންފުންޏަކުން ހުށަހެޅުމަށް ފަހު، އެ މުއާމަލާތް ބާތިލުކޮށް މުސްތަފާގެ ނަމުގައި ކަސްޓަމްސްގެ ލިޔުންތައް ތައްޔާރުކޮށް، އެ ވެހިކަލް ރަޖިސްޓްރީކުރި އެވެ. 

ނަމަވެސް އެ މައްސަލަ ފެންމަތިވުމާއެކު، މިދިޔަ ހަފުތާގައި މުސްތަފާ އެ ރަޖިސްޓްރީ ބާތިލުކުރަން އިތުރަށް މަސައްކަތް ފަށައި، އެ މުއާމަލާތު ބާތިލުކުރަން ސިޓީ ފޮނުވިއެވެ. އަދި ކާރު މުލިއާގޭގެ ނަމުގައި ރަޖިސްޓްރީކުރަން ހުށަހެޅިއެވެ.