ހޯމް މިނިސްޓަރ އިމްރާންގެ ހުކުމުގެ އަޑުއެހުންތަށް ނިންމާލައިފި
ދެން އޮންނާނީ މި މައްސަލައިގެ ނިންމުން
ހޯމް މިނިސްޓަރ ޝެއިހް އިމްރާން އަބްދުﷲ
ހޯމް މިނިސްޓަރ، އަދި އަދާލަތު ޕާޓީގެ ރައީސް، ޝެއިޚް އިމްރާން އަބްދުﷲ އަށް އިއްވާފައިވާ 12 އަހަރުގެ ޖަލު ހުކުމް އަލުން ރިވިއު ކުރަން ސުޕްރީމް ކޯޓަށް ހުށަހަޅާފައިވާ މައްސަލައިގެ އަޑުއެހުންތައް ނިންމާލައިފިއެވެ. އިމްރާންގެ ގާނޫނީ ވަކީލު ނޫރުއްސަލާމް އަބޫބަކުރު ވިދާޅުވީ ދެން އޮންނާނީ މި މައްސަލައިގައި ގޮތެއް ނިންމުން ކަމަށެވެ.
އިމްރާނަށް އިއްވާފައިވާ 12 އަހަރުގެ ޖަލު ހުކުމް އަލުން ރިވިއުކުރަން ސުޕްރީމް ކޯޓަށް ހުށަހަޅާފައި ވަނީ 23 އޮކްޓޯބަރު ގައެވެ. އިމްރާންއަށް 12 އަހަރު ދުވަހުގެ ޖަލު ހުކުމެއް އިއްވާފައި ވަނީ ގުޅިފައިވާ ޕާޓީތަކުގެ ފަރާތުން 2015 ވަނަ އަހަރުގެ މޭޑޭގައި ބޭއްވި މުޒާހަރާގައި އިމްރާން ދެއްކެވި ވާހަކަތަކުގެ ސަބަބުން ޓެރަރިޒަމްގެ ދައުވާ އުފުލުމަށް ފަހުއެވެ.
ކްރިމިނަލް ކޯޓުން 2016 ވަނަ އަހަރުގެ ފެބްރުއަރީ މަހުގެ 16 ވަނަ ދުވަހު އިމްރާންގެ މައްޗަށް 12 އަހަރުގެ ޖަލު ހުކުމެއް އިއްވާފައިވާ އިރު، މިދިޔަ އަހަރުގެ އެޕްރީލް މަހުގެ 23 ވަނަ ދުވަހު ހައިކޯޓުން ވެސް ވަނީ އެ ހުކުމަށް ތާއީދު ކޮށްފައެވެ.
އިމްރާންގެ މައްޗަށް 12 އަހަރުގެ ޖަލު ހުކުމެއް އޮއްވައި ހޯމް މިނިސްޓަރުކަމުގެ މަގާމަށް އައްޔަން ކުރެއްވުމުން، އެ މަގާމަށް އޭނާ ޝަރުތު ހަމަވާ ކަމާ މެދު ގާނޫނީ ދާއިރާގެ ބޭފުޅުން ދަނީ ސުވާލު އުފައްދަވަމުންނެވެ. ގާނޫނީ ދާއިރާގެ ބޭފުޅުން ވިދާޅުވާ ގޮތުން، ގާނޫނު އަސާސީގެ 130 ވަނަ މާއްދާގައި ބަޔާންކޮށްފައިވާ ވަޒީރެއްގެ ކިބަިގައި ފުރިހަމަވާން ޖެހޭ ޝަރުތު އިމްރާންގެ ކިބައިގައި ހަމަވާ ކަމާމެދު ސުވާލު އުފެދެއެވެ.
ގާނޫނު އަސާސީގެ 130 ވަނަ މާއްދާގެ ށ ގައި ބުނެފައި ވަނީ "ޖިނާއީ ކުށެއް ކުރިކަން ސާބިތުވެގެން ބާރަ މަސްދުވަހަށް ވުރެ ދިގު މުއްދަތެއްގެ ހުކުމެއް ކުރެވިފައިވާ މީހަކު ނަމަ، އެ ހުކުމެއް ތަންފީޒްކޮށް ނިމުނުތާ، ނުވަތަ އެހުކުމަކުން ކަނޑައެޅުނު އަދަބު މާފްކުރެވުނުތާ ތިން އަހަރު ނުވާ މީހަކުކަމުގައި ވުން" ކަމަށެވެ.
