ކޮރަޕްޝަންގެ ތުހުމަތުތަކެއް ކުރެވި މައްސަލަތަކެއް ބަލަމުންދާ ޕެރޫގެ ކުރީގެ ރައީސް އެލަން ގާސިއާ ޕެރޫގައި ހުންނަ އުރުގުއޭ އެމްބަސީ އިން ހިމާޔަތަށް އެދިއްޖެއެވެ.

ޕެރޫގެ ފޮރިން މިނިސްޓްރީ އާއި ހަވާލާދީ ރިޕޯޓްތައް ބުނާ ގޮތުގައި ގާސިއާ ހިމާޔަތަށް އެދިފައި ވަނީ އާދިއްތަ ދުވަހުއެވެ. އެކަމާ ބެހޭ ގޮތުން އުރުގުއޭ އިން މިހާތަނަށް އެއްޗެއް ބުނެފައި ނުވާއިރު އެ މައްސަލައަށް ގޮތެއް ނިންމަން ޖެހެނީ އުރުގުއޭގެ ސަރުކާރުން ކަމަށް ފޮރިން މިނިސްޓްރީ އިން ބުނެފައި ވެއެވެ.

ގާސިއާ ހިމާޔަތަށް އެދިފައި ވަނީ އޭނާގެ މައްޗަށް ކޯޓުން ބަލަމުންދާ މައްސަލައެއްގައި 18 މަސްދުވަހަށް ގައުމުން ބޭރަށް ދިއުން މަނާކޮށްފައިވާ ދަނޑިވަޅެއްގައިއެވެ.

ޕެރޫގެ ކޯޓުން އޭނާގެ މައްޗަށް ދައުވާކުރަނީ ބްރެޒިލްގެ ކުންފުންޏަކަށް ހަވާލުކުރި އިލެކްޓްރިކް ރޭލްގެ ކޮންސްޓަރްކަޝަންގެ މަސައްކަތުގައި މަގާމު ނުފޫޒު ބޭނުންކޮށްގެން ރިޝްވަތު ނަގާފައިވާ ކަމުގެ ތުހުމަތެވެ. މީގެ އިތުރުން ބްރެޒިލްގައި ބޭއްވި ކޮންފަރެންސެއްގައި ބައިވެރިވުމުގެ ގޮތުން ރިޝްވަތުގެ ގޮތުގައި 100،0000 ޔޫއެސް ޑޮލަރު ނަގާފައިވާ ކަމުގެ ތުހުމަތުތައް ވެސް ވަނީ ކުރެވިފައެވެ.

އުމުރުން 69 އަހަރުފުޅުގެ ގާސިއާ ވަނީ ޕޭރުގެ ރައީސްކަން ދެ ފަހަރެއްގެ މަތިން ކުރައްވާފައެވެ. ކޮރަޕްޝަންގެ މައްސަލަތަކެއްގައި 1992 ވަނަ އަހަރު ވެސް ގާސިއާ ވަނީ ކޮލަމްބިއާގެ އެމްބަސީ އިން ހިމާޔަތަށް އެދިފައެވެ.