ދެކުނު އިރުމަތީ އޭޝިއާގެ ގައުމުތަކުގެ ގުޅުން ބަދަހިކުރުމުގެ ގޮތުން އުފައްދާފައިވާ ޖަމިއްޔާ އެސޯސިއޭޝަން އޮފް ސައުތް އީސްޓް އޭޝިއަން ނޭޝަންސް (އާސިއަން) ގެ 33 ވަނަ ސަމިޓް ސިންގަޕޫރުގައި ފަށައިފިއެވެ.

ނޮވެމްބަރު މަހުގެ 11 އިން 15 އަށް ސިންގަޕޫރު ގައި ކުރިއަށްދާ ސަމިޓް ގެ ރިޔާސަތު ބަލަހައްޓަވަނީ ސިންގަޕޫރު ގެ ބޮޑުވަޒީރު ލީ ސިއެންގް ލޫންއެވެ. މި ފަހަރުގެ ސަމިޓްގައި މަޝްވަރާކުރަން ހަމަޖެހިފައިވާ މައިގަނޑު ކަންތައްތަކުގެ ތެރޭގައި އާސިއަން ސްމާޓް ސިޓީސް ފްރޭމްވޯކް ގެ އިތުރުން އާސިއަން ގައުމުތަކުގެ ތެރޭގައި މި އަހަރު ޓެކޮންލެޖީ އަދި އުފެއްދުންތެރިކަން ކުރިއަށް ގޮސްފައިވާ  ދާއިރާތަކާއި ބެހޭ ގޮތުން ކަމަށް ބޮޑުވަޒީރު ގެ އޮފީހުން ވަނީ ހާމަކޮށްފައިއެވެ.

ސިޔާސީ އަދި އިޖްތިމާއީ ގޮތުން ބަދަލުތަކެއް އަންނަ މިދަނޑިވަޅުގައި ކުރެވިދާނެ ކަންކަމާއި ގުޅޭގޮތުން މަޝްވަރާކުރުން ވެސް ހިމެނޭ ކަމަށް ބޮޑުވަޒީރު ލީ ގެ އޮފީހުން މައުލޫމަތު ދީފައިވެއެވެ. ބައްދަލުވުމުގައި އެޖެންޑާ ކުރެވިފައިވާ ކަންތައްތަކުގެ ތެރޭގައި ރީޖަނަލް ކޮމްޕްރިހެންސިވް އެކްނޮމިކް ޕާޓަނަރޝިޕް ގެ މައުލޫމާތު ލީޑަރުން ގެ މެދުގައި ހިއްސާކުރުން ވެސް ހިމެނެއެވެ.

އާސިއަން ގައުމުތަކުގެ އިތުރުން ޗައިނާ، ޖަޕާން ،ކޮރެއާ، ރަޝިޔާ، އެމެރިކާ، އޮސްޓްރޭލިއާ އަދި އިންޑިއާ ބައިވެރިވާނެއެވެ. މި ބައްދަލުވުން ވެގެންދާނީ ސިންގަޕޫރު ގެ ބޮޑުވަޒީރު ލީ ރިޔާސަތު ބަލަހައްޓަވާނެ އެންމެ ފަހުގެ ސަމިޓަށެވެ. ދެން މި މަގާމާއި ހަވަލުވާނީ ތައިލެންޑް ގެ ބޮޑު ވަޒީރު ޕްރަޔުތު ޗަން އޯޗާ އެވެ.