ބަންގްލަދޭޝްގެ އާންމު އިންތިހާބު ޑިސެމްބަރު މަހު ބާއްވާ ގޮތަށް ހަމަޖައްސައިފިއެވެ.
ކުރިޔަށް އޮތް ދައުރަށް ބޮޑުވަޒީރަކު ހޮވުމަށް ބާއްވާ އިންތިހާބު އޮންނާނީ ޑިސެމްބަރު މަހުގެ 23 ގައި ކަމަށް އެ ގައުމުގެ އިލެކްޝަން ކޮމިޝަނުން ވަނީ ބުރާސްފަތި ދުވަހު އިއުލާންކޮށްފައެވެ.
ބަންގްލަދޭޝްގެ އިންތިހާބު ބާއްވާ ދުވަސް އިއުލާން ކޮށްފައިވާއިރު، އެގައުމުގެ އިދިކޮޅު ސިޔާސީ ލީޑަރު ހާލިދާ ޒިޔާ ދަނީ ކޮރަޕްޝަންގެ ތުހުމަތު ގައި 10 އަހަރު ދުވަހުގެ ހުކުމެއް ތަންފީޒު ކުރަމުންއެވެ.
ކުރިއަށް އޮތް އިންތިހާބަކީ އިންސާފުވެރި އިންތިހާބަކަށް ވެދާނެ ކަމާ މެދު އިދިކޮޅު ފަރާތްތަކުން ވަނީ ސުވާލު އުފައްދާ، މުޒާހަރާތަކަށް ނިކުންނާނެ ކަމަށް ބުނެފައެވެ.
ގައުމީ ޓީވީގައި ވާހަކަ ދައްކަވަމުން އިލެކްޝަން ކޮމިޝަނަރ ނޫރުލް ހުދާ ވިދާޅުވީ، ސިޔާސީ ލީޑަރުންތަކެއް ހައްޔަރު ކުރެވިފައި ވިޔަސް އިންތިހާބު ކުރިޔަށް ގެންދާނެ ކަމަށެވެ. އަދި ހަމަ މިއާއެކު މިފަހަރުގެ އިންތިހާބަކީ މިނިވަން އިންސާފުވެރި އިންތިހާބެއް ކަމުގައި ވެގެންދާނެ ކަމަށް ވެސް އޭނާ ވަނީ ވިދާޅުވެފައެވެ.
އިންތިހާބުގައި ވާދަ ކުރުމުގެ ފުރުސަތު ގެއްލިފައިވާ ޒިޔާގެ ބަންގްލަދޭޝް ނެޝަނަލިސްޓް ޕާޓީ އިން ނެރޭނީ ކޮން ކެންޑިޑޭޓެއް ކަމެއް އަދި އެޕާޓީ އިން ހާމަކޮށްފައެއް ނުވެއެވެ.
މިހާރުގެ ބޮޑު ވަޒީރު ޝޭހް ހަސީނާ ދަނީ ދެވަނަ ދައުރަކަށް އިންތިހާބު ވުމަށްޓަކައި ގިނަ މަސައްކަތްތަކެއް ކުރައްވަމުންނެވެ.
