ޖެނުއަރީ ޓްރާންސްފާގައި ޑޭވިޑް ލުއިޒް ބާސާ އަށް ބަދަލުވަނީ!

ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު ޑޭވިޑް ލުއިޒް ކުރިޔަށް އޮތް ޖެނުއަރީ ޓްރާންސްފާގައި ބާސެލޯނާ އަށް ބަދަލުވާން އުޅޭ ކަމަށް ރިޕޯޓްތައް ބުނެފިއެވެ.

ސްޕެއިންގެ މަޝްހޫރު ކުޅިވަރު ނޫހެއް ކަމަށްވާ މުންޑޯ ޑިޕޯޓިވޯ އިން ބުނީ ބާސާގެ ޑިފެންސް ލައިން ވަރުގަދަ ކުރުމަށް އެ ކްލަބުން ޑޭވިޑް ލުއިޒް ގެންނަން މަސައްކަތް ކުރަމުން އަންނަ ކަމަށާއި، ކުރިޔަށް އޮތް ޖެނުއަރީ ޓްރާންސްފާގައި އެކަން ނިމިގެންދާނެ ކަމަށެވެ.

މި ސީޒަނަށް ފަހު ޑޭވިޑް ލުއިޒްގެ އެއްބަސްވުން ހަމަވާއިރު، އޭނާ ޗެލްސީއާ އެކު ހަދާފައިވާ އެއްބަސްވުން އާކުރާނެ ކަމަށް ނުބެލެވެއެވެ. އެގޮތުން މި ސީޒަން ނިންމާފައި ނުވަތަ ޖެނުއަރީ ޓްރާންސްފާގައި އޭނާ ކްލަބް ބަދަލުކުރާނެ ކަމަށް ބެލެވެއެވެ.

އުމުރުން 31 އަހަރުގެ ޑޭވިޑް ލުއިޒް ހޯދުމަށް ބާސާގެ އިތުރުން ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ މަސައްކަތް ކުރަމުންނެވެ. އެހެންނަމަވެސް ބެލެވޭ ގޮތުގައި އޭނާ ބަދަލުވާނީ ބާސާ އަށެވެ.

ބެންފީކާ އަށް 132 މެޗު ކުޅެފައިވާ ޑޭވިޑް ލުއިޒް ވަނީ އެ ކްލަބާ އެކު ގިނަ ކާމިޔާބީތަކެއް ހޯދާފައެވެ. އެ އަށް ފަހު ޗެލްސީ އަށް އޭނާ ބަދަލުވިއިރު، ޗެލްސީ އަށް އޭނާ ވަނީ 143 މެޗު ކުޅެ އެ ކްލަބާއެކު ޔުއެފާ ޗެމްޕިއަންސް ލީގު އަދި ޔުއެފާ ޔޫރޮޕާ ލީގު ވެސް ކާމިޔާބުކޮށްފައެވެ.

ޗެލްސީ ދޫކޮށް ޑޭވިޑް ލުއިޒް ޕީއެސްޖީ އަށް ބަދަލުވީ 2014 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް 89 މެޗު ކުޅެ، ފްރެންޗް ލީގު ދެފަހަރު އަދި ފްރެންޗް ކަޕް ދެފަހަރު ކާމިޔާބުކޮށްފައެވެ.

ޕީއެސްޖީ ދޫކޮށް ޑޭވިޑް ލުއިޒް ޗެލްސީއާ އަލުން ގުޅުނީ 2016 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް 98 މެޗު ކުޅެދީފައެވެ.

ބްރެޒިލް ގައުމީ ޓީމާއެކު 2013 ވަނަ އަހަރު ފީފާ ކޮންފެޑެރޭޝަންސް ކަޕް ކާމިޔާބުކޮށްފައިވާ ޑޭވިޑް ލުއިޒް ވަނީ އެޓީމަށް 56 މެޗު ކުޅެފައެވެ.