ވިސާމަށް ކުށް ސާބިތުނުވި ހުކުމުގެ އިސްތިއުނާފު ފަށަނީ
ކުށް ސާބިތު ނުވާ ކަމަށް ހުކުމް ކުރީ މިދިޔަ އަހަރު
ރާއްޖެޓީވީގެ ނޫސްވެރިޔާ މުހައްމަދު ވިސާމް: އޭނާއަށް ކުރި ދެ ވަނަ ދައުވާގެ އިސްތިއުނާފު ފަށަން ވަނީ ނިންމާފައި
ފުލުހުންގެ ދައުރު އަދާކުރަން ހުރަސް އެޅި ކަމަށް ބުނެ، ރާއްޖެޓީވީގެ ނޫސްވެރިޔާ މުހައްމަދު ވިސާމަށް ކުރި ދައުވާ ސާބިތު ނުވާ ކަމަށް ކުރި ހުކުމުގެ އިސްތިއުނާފު އަޑުއެހުންތައް ހައި ކޯޓުގައި ފަށަން ތައްޔާރު ވެއްޖެއެވެ.
އިދިކޮޅު ފަރާތްތަކުން ކުރި މުޒާހަރާއެއް ކަވަރު ކުރަމުން ދަނިކޮށް، ފުލުހުން ބަންދު ކޮށްފައިވާ ސަރަހައްދަކަށް ވަދެ ފުލުހުންގެ ދައުރަށް ހުރަސް އެޅި ކަމަށް ބުނެ، އުފުލި ދައުވާ ސާބިތު ނުވާ ކަމަށް ކްރިމިނަލް ކޯޓުން ހުކުމްކޮށްފައި ވަނީ މިދިޔަ އަހަރުގެ މާޗު މަހުއެވެ. އެ މައްސަލައިގެ އިސްތިއުނާފު އަޑުއެހުން މި މަހު ފަހުކޮޅު ހައި ކޯޓުގައި ފަށަން ވަނީ ނިންމާފައެވެ.
އިސްތިއުނާފު އަޑުއެހުންތައް ފެށުމަށް މި މަހުގެ 27 ވަނަ ދުވަހު ހައި ކޯޓަށް ހާޒިރުވުމަށް ވިސާމަށް ވަނީ ޗިޓު ފޮނުވާފައެވެ. ކްރިމިނަލް ކޯޓުން ވިސާމަށް ކުރި ހުކުމް ހައި ކޯޓުގައި އިސްތިއުނާފު ކޮށްފައި ވަނީ މިދިޔަ އަހަރުގެ މާޗު މަހުއެވެ.
ވިސާމުގެ މައްޗަށް ދައުވާ އުފުލާފައި ވަނީ 2015 ވަނަ އަހަރުގެ މާޗް 25 ވަނަ ދުވަހު އިދިކޮޅު ފަރާތްތަކުން މާލޭގައި މުޒާހަރާ ކުރަމުން ދަނިކޮށް، ފުލުހުން ބަންދު ކޮށްފައިވާ ސަރަހައްދަކަށް ވަން ކަމަށް ބުނެއެވެ. އެ ދައުވާ ވިސާމްގެ މައްޗަށް އުފުލީ 2016 ވަނަ އަހަރުގެ އޭޕްރީލް މަހުގެ ފަސް ވަނަ ދުވަހުއެވެ.
އެ މައްސަލާގައި ކްރިމިނަލް ކޯޓުން ހުކުމް ކޮށްފައި ވަނީ ވިސާމް ހައްޔަރު ކުރި ސަރަހައްދުގައި ނޫސްވެރިންގެ ފާސް އަޅައިގެން ތިބި އެހެން ބަޔަކު ވެސް ތިބި މަންޒަރު ވީޑިއޯތަކުން ފެންނަ ކަމަށާއި، އެހެންކަމުން އެ ސަރަހައްދުގައި ނޫސްވެރިން ތިބުމަކީ ގާނޫނީ ގޮތުން ބަލާއިރު ފުލުހުންގެ ދައުރަށް ދަތިކުރުން ކަމަށް ނުބެލެވޭނެ ކަމަށެވެ. އަދި ވިސާމުގެ މައްޗަށް ދައުވާ ސާބިތު ކުރުމަށް ދައުލަތުން ހުށަހެޅި ވީޑިއޯ ފޫޓޭޖްގެ ޗެއިން އޮފް ކަސްޓޮޑީ ރިޕޯޓް ހުށަހަޅާފައި ނުވާތީ ވީޑިއޯގެ ސައްޚަ ކަމާ މެދު ގާޒީ ވަނީ ސުވާލު އުފައްދާފައެވެ.
ފުލުހުންގެ ދައުރަށް ހުރަސް އެޅި ކަމަށް ބުނެ، ވިސާމްގެ މައްޗަށް އުފުލި ދައުވާގެ އިސްތިއުނާފު އަޑުއެހުންތައް ފަށަން ތައްޔާރުވެފައި ވަނީ ގާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސްއެޅުމުގެ ކުށް އޭނާގެ މައްޗަށް ސާބިތުކޮށްފައި ވަނިކޮށެވެ. އެ ދައުވާ ސާބިތުކޮށް، ވިސާމް ވަނީ 28،800 ރުފިޔާ އިން އޭނާ ޖޫރިމަނާ ކޮށްފައެވެ.
