ގުޅިފައިވާ ޕާޓީތަކުގެ ސަރުކާރުގެ މަސައްކަތްތައް ބިނާވެގެން ދާނީ ރައްޔިތުންގެ މަޝްވަރާއާ އެކު ރައްޔިތުންނާ ގާތުން ކަމަށް އިންތިޚާބީ ރައީސް އިބްރާހީމް މުހައްމަދު ސޯލިހް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރައްޔިތުންގެ ޚިޔާލު ހޯދުމުގެ ގޮތުން ސިލްސިލާކޮށް ކުރިއަށް ގެންދިއުމަށް ހަމަޖެހިފައިވާ "ޖަޒީރާ ހޮޅުއަށި" ގެ ފުރަތަމަ ބައްދަލުވުމުގައި ވާހަކަ ދައްކަވަމުންނެވެ.
ޢާއްމުކޮށް ހުޅުވާލައިގެން ދަރުބާރުގޭ ގެ ރަންނަބަނޑޭރި މާލަމުގައި ހޯމަ ދުވަހުގެ ރޭ ބޭއްވި އެ ބައްދަލުވުމުގައި އިންތިޚާބީ ރައީސް ވިދާޅުވީ ރިޔާސީ އިންތިޚާބުގެ ކެމްޕެއިން ތެރޭގައި ދެއްކެވި ވާހަކައަކީ ރައްޔިތުންނަށް ދޭންޖެހޭ ޚިދުމަތް ރައްޔިތުން ބޭނުންވާ ގޮތަށް ދިނުމަށްޓަކައި ރައްޔިތުންނާ މަޝްވަރާ ކުރައްވާނެކަން ކަމަށެވެ.
"އަޅުގަނޑުމެން މިއައީ ތިބޭފުޅުން ދައްކާ ވާހަކަ އަޑުއަހަން. އެނގިވަޑައިގަންނަވާނެ ނިމިގެންދިޔަ ރިޔާސީ އިންތިޚާބުގެ ކެމްޕެއިން ތެރޭގައި އަޅުގަނޑުމެން ދައްކަމުންދިޔަ ވާހަކައަކީ ރައްޔިތުންނަށް ދޭން ޖެހޭ ޚިދުމަތްތައް ރަނގަޅަށް އެޚިދުމަތްތައް ދިނުމަށްޓަކައި ރައްޔިތުން ބޭނުންވާ ގޮތަށް ދިނުމަށްޓަކައި ރައްޔިތުންގެ އަޑުއަހަން ޖެހޭ ވާހަކަ. މިރޭ އިރާދަކުރެއްވިއްޔާ އަޅުގަނޑުމެން މިފަށަނީ އެމަސައްކަތް. އިރާދަކުރެއްވިއްޔާ އަޅުގަނޑުމެންގެ ސަރުކާރުގެ މަސައްކަތްތައް ބިނާވެގެން ދާނީ ރައްޔިތުންގެ މަޝްވަރާ އާއި ރައްޔިތުންގެ އަޑުއެހުމާ އެކީގައި ރައްޔިތުންނާ ވަރަށް ގާތުން. އެގޮތުން ރައްޔިތުންގެ މަޝްވަރާ އަޅުގަނޑުމެން އަޑުއަހާނަން. އަދި ސިވިލް ސޮސައިޓީތަކާއި އެންޖީއޯތަކުގެ ބައިވެރިވުން އިތުރު ކުރެވިގެން ދާނެ. އަދި ރައްޔިތުންނަށްދޭ ޚިދުމަތްތައް އަޅުގަނޑުމެން ދެމުން ގެންދާނީ ސިޓީ ކައުންސިލްތަކާއި ރަށުކައުންސިލްތައް މެދުވެރިކޮށް ލާމަރުކަޒީ އުސޫލުން" އިންތިޚާބީ ރައީސް ވިދާޅުވިއެވެ.
އިންތިޚާބީ ރައީސް ސޯލިހް ވިދާޅުވީ މިފެށުނު ބައްދަލުވުންތަކަކީ ކުރިއަށް އޮތް ދުވަސްތަކުގައި ސިލްސިލާ ބައްދަލުވުންތަކެއްގެ ގޮތުގައި ކުރިއަށް ގެންދާނެ ބައްދަލުވުންތަކެއް ކަމަށެވެ. އަދި މިބައްދަލުވުންތައް ބާއްވާނީ ހަމައެކަނި މާލޭގައި ނޫންކަމަށާއި އެހެން ރަށްރަށުގައި ވެސް ބާއްވާނެ ކަމަށެވެ.
ހޯމަދުވަހުގެރޭގެ ބައްދަލުވުން އަމާޒުކޮށްފައި ވަނީ "މާލޭގެ މަގުމަތި" މިމައުޟޫއަށެވެ. މާލޭގެ މަގުމައްޗަށް އިޝާރާތް ކުރައްވައި އިންތިޚާބީ ރައީސް ވިދާޅުވީ ޖަޒީރާ ރާއްޖެއަކަށް ހެދުމަށްޓަކައި މާލޭގެ މަގުމައްޗަކީ ހިތްފަސޭހަ ތަނަކަށް ވާންޖެހޭ ކަމަށެވެ.
"ލާމަރުކަޒީ ރާއްޖެ ޖަޒީރާ ރާއްޖެ ތަރައްޤީކުރުމަށްޓަކައި މާލެ އެބަޖެހޭ ހިތްފަސޭހަ ތަނަކަށް ވާން. މާލެ ރަނގަޅު ދިރިއުޅޭ ތަނަކަށް ވާނީ ރާއްޖެ ލާމަރުކަޒީ ނިޒާމަކުން ތަރައްޤީ ކުރެވިގެން." އިންތިޚާބީ ރައީސް ވިދާޅުވިއެވެ.
