ދެކުނު ޗައިނާ ކަނޑުގެ މައްސަލައިގައި ނުތަނަވަސްކަން ބޮޑުވަމުންދާއިރު، ހަނގުރާމައަށް ތައްޔާރުވުމަށް ޗައިނާގެ ރައީސް ޝީ ޖިންގ ޕިން އެގައުމުގެ އަސްކަރިއްޔާގެ ވެރިޔާއަށް އަންގަވައިފިއެެވެ.
ޗައިނާއިން އެ ގައުމުގެ ޓެރިޓަރީގެ ގޮތުގައި ބަލާ ސަރަހައްދުން އިންޗިއެއް ވެސް ދޫ ނުކުރާނެ ކަމަށް އެ ގައުމުން ބުނެއެވެ.
އެމެރިކާއިން ޗައިނާގެ އަސްކަރިއްޔާއަށް ދަތިކުރުމުގެ ފިޔަވަޅު އެޅުމާއި، ވިޔަފާރީގެ ހަނގުރާމަ އާއި، ޓައިވާނަށް ވޮޝިންގޓަނުން މަދަދު ދިނުމާއި، ދެކުނު ޗައިނާ ކަނޑުގައި އެމެރިކާގެ އަސްކަރިއްޔާއިން ބާއްވާ ޑްރިލްތަކުގެ ސަބަބުން ޗައިނާ އޮތީ ރުޅިއައިސްފައެވެ.
އަމިއްލަ ވެރިކަމެއް ހިނގަމުންދާ އަދި ޗައިނާއިން އެ ގައުމުގެ ބައެއްގެ ގޮތުގައި ދެކޭ ޓައިވާން ކަމަށްވިޔަސް ނުވަތަ ޚިލާފް އުފެދިފައިވާ ސައުތު ޗައިނާ ކަނޑުވިޔަސް އެންމެ އިންޗިއެއް ވެސް ދޫނުކޮށްލާނެ ކަމަށް ޗައިނާއިން ބުނެއެވެ.އަދި ޓައިވާނަކީ ޗައިނާގެ އެންމެ ބޮޑު މަސްލަހަތު ކަމަށާއި ބޭރުގެ އެއްވެސް ބަޔަކު ދެކުނު ޗައިނާ ކަނޑުގައި އެބައެއްގެ ބާރުތައް ދައްކާލުމަކީ ޗައިނާ އިން ދެކޮޅު ހަދާ ކަމެއް ކަމަށްެވެސް ޗައިނާއިން ވަނީ ބުނެފައެވެ.
އެމެރިކާއިން ޓައިވާނުގެ ކަނޑުގެ ސަރަހައްދަށް ހަނގުރާމަ މަތީ ދެ މަނަވަރު ފޮނުވާފައިވާއިރު މިއީ އެ ގައުމުން މިފަދަ އޮޕަރޭޝަނެއް އެ ސަރަހައްދުގައި ހިންގާ ދެވަނަ ފަހަރެވެ.
ޗައިނާގެ ރައީސް ވަނީ ކަނޑުގެ ސަރަހައްދު ބެލެހެެއްޓުމުގައި ހަރަކާތްތެރިވާން ސިފައިންނަށް އިތުރު ހަތިޔާރާއި ތަމްރީންވެސް ބޭނުންވާކަމަށް ވިދާޅުވެފައެވެ. އަދި ދެކުނު ޗައިނާ ކަނޑު ބެލެހެއްޓުން އިތުރަށް ވަރުގަދަކުރުމަށް ޝީ ވަނީ އެގައުމުގެ ސިފައިންނަށް އަންގަވާފައެވެ.
ޗައިނާ އިން ގަބޫލުކުރާ ގޮތުގައި ޓައިވާނަކީ ވެސް ޗައިނާގެ ބައެކެވެ.
