ސިނަމާލެ ބްރިޖްގައި އެކްސިޑެންޓެއް ހިނގައި ހަތަރު މީހަކަށް އަނިޔާވެއްޖެ
29 އޮކްޓޯބަރު 2018 | ހޯމަ 19:52ހަތަރު މީހުންގެވެސް އަނިޔާ ލިބިފައިވަނީ ބޮލަށް
ދާދިފަހުން ހުޅުމާލޭގައި ހިނގި އެކްސިޑެންޓެއް
ސިނަމާޖެ ބްރިޖްގައި އެކްސިޑެންޓެއް ހިނގައި ހަތަރު މީހަކަށް އަނިޔާވެއްޖެއެވެ.
ފުލުހުންގެ މީޑިއާ އޮފިޝަލް ވިދާޅުވީ މި އެކްސިޑެންޓް ހިނގިކަމަށް ރިޕޯޓްކޮށްފައިވަނީ ހޯމަދުވަހުގެރޭ 11.00 ގައި ކަމަށެވެ.
އެކްސިޑެންޓް ހިނގީ ހުޅުމާލެއިން ބާރު ސްޕީޑްގައި ދުއްވާފައި އައި ސައިކަލެއް އޯވަރޓޭކް ކުރަން އުޅުމުގެ ތެރޭގައި އެހެން ސައިކަލެއްގައި ޖެހިގެންނެވެ. މިއެކްސިޑެންޓްގައި ހަތަރު މީހަކަށް އަނިޔާވެފައިވާއިރު އެ އެންމެނަށްވެސް މިހާރު ދަނީ ހުޅުމާލެ ހޮސްޕިޓަލްގައި ފަރުވާދެވެމުންނެވެ.
ހުޅުމާލެ ހޮސްޕިޓަލް ހިންގާ އާސަންދަ ކުންފުނީގެ މީޑިއާ އޮފިޝަލް އާޝިޔާ ސޯލިހް ވިދާޅުވީ، އެކްސިޑެންޓް ވެގެން ގެނައި ހަތަރު މީހުންގެވެސް އަނިޔާވެފައިވަނީ ބޮލަށް ކަމަށެވެ.
އެކްސިޑެންޓްގައި އަނިޔާވެފައިވަނީ 50 ފިރިހެނަކަށާއި، 20 އަހަރުގެ ފިރިހެނަކަށާއި، 17 އަހަރުގެ ފިރިހެން ކުއްޖެއްގެ އިތުރުން 43 އަހަރުގެ އަންހެނަކަށެވެ.
މި މީހުންނަށް ހުޅުމާލެ ހޮސްޕިޓަލްގައި ފަރުވާދެމުންދާއިރު، ލިބިފައިވަނީ ކިހާވަރެއްގެ ސީރިއަސް ޒަޚަމްތަކެއްކަމެއް އަދި ސާފެއް ނުވެއެވެ.
ފުލުހުން ދަނީ މި އެކްސިޑެންޓްގެ މައްސަލަ ތަހުގީގުކުރަމުންނެވެ.
