އައްޑޫ ސިޓީ ހިތަދޫ ރީޖަނަލް ހޮސްޕިޓަލުގައި ފުރަތަމަ ފަހަރަށް ކަކުލުހުޅު ބަދަލުކުރުމުގެ އޮޕަރޭޝަނެއް ކޮށްފިއެވެ.
60 އަހަރުގެ އަންހެނެެއްގެ ކަކުލު ހުޅު ބަދަލުކުރުމަށް ކުރިއަށްދިޔަ މިއޮޕަރޭޝަން ކުރުމުގައި ހަރަކާތްތެރިވީ ރާއްޖޭގައި ކަކުލު ހުޅު ބަދަލުކުރުމުގެ ދެހާހަށްވުރެ ގިނަ އޮޕަރޭޝަންކޮށްފައިވާ އައިޖީއެމްއެޗްގެ ކަށީގެ ޑިޕާޓްމެންޓްގެ ހެޑް އަދި ކަށީގެ ހާއްސަ ޑޮކްޓަރ، ޑރ. އަލީ މުޒްނީ އާއި އެނާގެ ޓީމުންނެވެ.
ހޯމަ ދުވަހު ކުރެވުނު މި އޮޕަރޭޝަނަށްފަހު ޑރ. މުޒްނީ ވިދާޅުވީ މާލެ ނުގޮސް، ރަށްރަށުގައި ހުރެގެން މިފަދަ އޮޕަރޭޝަންތައް ކުރަން ފެށުމުން ރައްޔިތުންނަށް ވަރަށް ބޮޑަށް ލުއި ފަސޭހަ ވެގެންދާނެ ކަމަށެވެ. އަދި ކުރިއަށް އޮތްތަނުގައި ރާއްޖޭގެ އެހެން ހިސާބުތަކުގައިވެސް މިއޮޕަރޭޝަން ކުރެވޭނެ އިންތިޒާމް ހަމަޖެއްސުމަށް މަސައްކަތް ކުރަމުންދާކަމަށެވެ. އެގޮތުން ދެން އެންމެ އަވަހަށް މި އޮޮޕަރޭޝަން ކުރުމަށް ހަމަޖެހިފައިވަނީ ގ.ދ ތިނަދޫގައި ކަމަށް ބައެއް މީޑިއާތަކަށް މައުލޫމާތު ދެއްވަމުން މުޒްނީ ފާހަގަކުރެއްވިއެވެ.
"އަޅުގަނޑުމެންގެ ޕްލޭނުގައި އެބަހުރި، މިއަންނަ މަހުގަ ތިނަދޫގެ މި އޮޕަރޭޝަން ފަށަން. ރާއްޖޭގެ އެންމެ އުތުރުން ކުޅުދުއްފުށީގައިވެސް ވަރަށް އަވަހަށް މި އޮޕަރޭޝަންތަށް ފެށޭތޯ ބަލަމުން އަޅުގަނޑުމެން ގެންދާނަން. އެހެންވީމާ އަޅުގަނޑުމެންގެ އުއްމީދަކީ އަދި ޕްލޭނަކީ ވެސް، އިރާދަ ކުރެއްވީއްޔާ ހުރިހާ ރީޖަނަލް ހޮސްޕިޓަލެއްގައި ވެސް މި އޮޕަރޭޝަންތައް ކުރެވޭނެ އިންތިޒާމު ހަމަޖެހިގެން ދިއުން" ޑރ. މުޒްނީ ވިދާޅުވިއެވެ.
ރާއްޖޭގައި ހުޅު ބަދަލު ކުރުމުގެ އޮޕަރޭޝަންތައް ކުރަން ފަށާފައިވަނީ މީގެ 13 އަހަރު ކުރިން އައިޖީއެމްއެޗުގައެވެ. މިއީ މާލެ ފިޔަވައި އެހެން ރަށައްގައި މިއޮޕަރޭޝަން ކުރި ފުރަތަމަ ފަހަރެވެ.
