މުސަތަފާ، ޝާހު، މުހަންމާ އަދި ޝަހުދީގެ ގޮނޑީގެ މައްސަލަ މާދަމާ ސުޕްރީމް ކޯޓުން ނިންމަނީ
29 އޮކްޓޯބަރު 2018 | ހޯމަ 19:37ގޮނޑި ގެއްލުނު ކަމަށް ބުނާ 12 މެމްބަރުންގެ ތެރެއިން 8 މެމްބަރެއްގެ ގޮނޑި ނުގެއްލޭ ކަމަށް ސުޕްރީމް ކޯޓުން ވަނީ ހުކުމް ކޮށްފި
ގޮނޑި ގެއްލުނު ކަމަށް ބުނާ ބައެއް މެމްބަރުންނާއި، ގުޅިފައިވާ ސިޔާސީ ޕާޓީތަކުގެ ޖޮއިންޓް ޕާލަމެންޓްރީ ގްރޫޕްގެ ބައެއް މެމްބަރުން
ރައްޔިތުންގެ މަޖިލީހުގެ 12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ނިންމާފައިވާ ނިންމުން ބާތިލު ކުރުމަށް ސުޕްރީމް ކޯޓަށް ހުށަހެޅި މައްސަލަތަކުގެ ތެރެއިން މިހާތަނަށް ވަކިގޮތެއް ނިންމާފައިނުވާ ހަތަރު މައްސަލައަށް ގޮތެއް ނިންމުމަށް ސުޕްރީމް ކޯޓުގައި ތާވަލް ކޮށްފި އެވެ.
މީގެ އަހަރެއް ކުރިން ސުޕްރީމް ކޯޓަށް އެ 12 މެމްބަރުން ވަކިވަކި ހުށަހެޅި މައްސަލަތަކުގެ ތެރެއިން ސުޕްރީމް ކޯޓުގައި އަންގަރާ ދުވަހަށް ތާވަލް ކޮށްފައިވަނީ ތިމަރަފުށީ ދާއިރާގެ މެމްބަރު މުހައްމަދު މުސްތަފާ އާއި ފުވައްމުލަކު އުތުރު ދާއިރާގެ މެމްބަރު އަލީ ޝާހާއި އިހަވަންދޫ ދާއިރާގެ މެމްބަރު މުހައްމަދު އަބްދުﷲގެ އިތުރުން ހަނިމާދޫ ދާއިރާގެ މެމްބަރު ހުސައިން ޝަހުދީ އެވެ.
މުސްތަފާގެ ގޮނޑި ގެއްލިފައިވާ ކަމަށް ބުނާ މައްސަލާގައި ހުކުމް ކުރުމަށް ބާއްވާ ޝަރީއަތް ތާވަލް ކޮށްފައިވަނީ 10:00 އަށެވެ. ޝާހުގެ ގޮނޑިއާމެދު ގޮތެއް ނިންމުމަށް ތާވަލް ކޮށްފައިވަނީ 11:00 އަށެވެ. މީގެ އިތުރުން މުހަންމާގެ ގޮނޑީގެ މައްސަލައާމެދު ގޮތެއް ނިންމުމަށް ތާވަލް ކޮށްފައިވަނީ 13:15 ގައެވެ. އަދި ޝަހުދީގެ ގޮނޑީގެ މައްސަލައާމެދު ގޮތެއް ނިންމުމަށް ތާވަލް ކޮށްފައިވަނީ 14:15 ގަ އެވެ.
އިލެކްޝަންސް ކޮމިޝަނުން ގޮނޑި ގެއްލިފައިވާ ކަމަށް ނިންމި 12 މެމްބަރުންގެ ތެރެއިން 8 މެމްބަރެއްގެ ގޮނޑި ނުގެއްލޭ ކަމަށް ސުޕްރީމް ކޯޓުގެ ފަނޑިޔާރުންގެ ބެންޗުގެ އިއްތިފާގުން ވަނީ ހުކުމް ކޮށްފަ އެވެ.
ސުޕްރީމް ކޯޓުން ގޮނޑި ނުގެއްލޭ ކަމަށް ހޯމަ ދުވަހު ނިންމާފައިވާ މެމްބަރުންނަކީ ދަނގެތި ދާއިރާގެ މެމްބަރު އިލްހާމް އަހުމަދު އާއި ތިނަދޫ ދެކުނު ދާއިރާގެ މެމްބަރު އަބްދުﷲ އަހުމަދު އާއި ތިނަދޫ އުތުރު ދާއިރާގެ މެމްބަރު ސައުދުﷲ ހިލްމީ އަދި މައްޗަންގޮޅި ދެކުނު ދާއިރާގެ މެމްބަރު އަބްދުﷲ ސިނާނުގެ ގޮނޑި އެވެ.
މިމަހުގެ 8 ވަނަ ދުވަހު ސުޕްރީމް ކޯޓުން ވަނީ ތުލުސްދޫ ދާއިރާގެ މެމްބަރު މުހައްމަދު ވަހީދު އިބްރާހީމް އާއި ވިލިނގިލި ދާއިރާގެ މެމްބަރު ސައުދު ހުސައިން އާއި މަޑުއްވަރީ ދާއިރާގެ މެމްބަރު މުހައްމަދު އަމީތުގެ އިތުރުން ދިއްދޫ ދާއިރާގެ މެމްބަރު އަބްދުއްލަތީފް މުހައްމަދުގެ ގޮނޑި ނުގެއްލޭ ކަމަށް ސުޕްރީމް ކޯޓުން ވަނީ ނިންމާފަ އެވެ.
