ސިނަމާލެ ބްރިޖް ހުޅުވުމަށް ހައުސިން މިނިސްޓްރީން ބޭއްވި ރަސްމިއްޔާތަށް ދައުލަތުގެ ބަޖެޓުން 35 މިލިޔަން ރުފިޔާ އަށް ވުރެ ބޮޑު އަދަދެއް ހަރަދުކުރިކަން ހާމަވެއްޖެ އެވެ.
ސޯޝަލް މީޑިއާގައި ލީކުވެފައިވާ ލިޔުންތަކަކުން އެނގޭގޮތުގައި އެ ރަސްމިއްޔާތު ހައުސިން މިނިސްޓްރީން ހަވާލުކުރީ ޕީޕީއެމްގެ ކައުންސިލް މެމްބަރު ޒާހިދު ރަމީޒުގެ މަސްލަހަތު އޮންނަ ސްޓްރާޑާ ކުންފުންޏާއެވެ.
ނަމަވެސް މައުލޫމާތު ލިބިފައިވާ ގޮތުގައި ޒާހިދު އެ ކުންފުނީގެ މެނޭޖިން ޑައިރެކްޓަރުގެ މަގާމުން ވަނީ އިސްތިއުފައެވެ. ނަމަވެސް އެ ކުންފުނީގައި އޮންނަ އޭނާގެ ހިއްސާ ދޫކޮށްލި ކަމެއް ސާފެއްނުވެ އެވެ.
ލީކު ކޮށްލާފައިވާ ލިއުންތަކުން އެނގޭގޮތުގައި އެ ރަސްމިއްޔާތުގައި ބޭއްވި ހަވާ އެރުވުމުގެ ހަރަކާތަށް ތިން މިލިޔަން ރުފިޔާ އަށް ވުރެ ގިނައިން އަދި ލައިޓިން އާއި ސައުންޑް ހެދުމަށް ހަތަރު މިލިޔަން ރުފިޔާ އަށް ވުރެ ގިނައިން ހަރަދު ކުރި އެވެ. އޭގެ އިތުރުން ލައިޓިން އާއި ސައުންޑް އަދި ކަލްޗަރަލް ހަރަކާތްތަކަށް ބޭނުންވާ ސާމާނު ކުއްޔަށް ހިފުމާއި އެ ތަކެތި ރާއްޖެ އަށް ގެނައުމަށް 11 މިލިޔަނަށް ވުރެ ގިނަ ރުފިޔާ ހަރަދު ކުރި އެވެ.
އޭގެ އިތުރުން ހަވާ އެރުވުމަށް ބޭނުންވާ ސާމާނު ގަނެ، އެ ތަކެތި ޑެލިވަރީ ކުރުމަށް ދެ މިލިޔަން ރުފިޔާ އަށް ވުރެ ބޮޑު އެއްޗެއް ހަރަދުވި އެވެ. އަދި އޭގެ އިތުރުން އެ ރަސްމިއްޔާތަށް ބޭނުންވާ ބައެއް އެހެނިހެން ސާމާނުތައް އޮސްޓްރޭލިޔާ އާއި ދުބާއީ އަދި އެމެރިކާގެ އިތުރުން ސައުދީ އަރަބިއްޔާ އިން އެއާ ފްރައިޓް ކޮށްގެން ގެނައުމަށް ވެސް ވަނީ ދެ މިލިޔަން ރުފިޔާ އަށް ވުރެ ބޮޑު އެއްޗެއް ހަރަދުކޮށްފަ އެވެ.
ހަވާ އެރުވުމަށް ބޭނުންވާ ސާމާނުތައް ރާއްޖެ ގެނައީ ޚާއްސަ ފްލައިޓެއް ޗާޓަރު ކޮށްގެންނެވެ. އެ ފްލައިޓް ޗާޓަރު ކުރުމަށް ހައުސިން މިނިސްޓްރީން ވަނީ ހަ މިލިޔަން ރުފިޔާ އަށް ވުރެ ގިނަ އިން ހަރަދު ކޮށްފަ އެވެ. އަދި ހަވާ އެރުވުމުގެ އިތުރުން ލޭޒާ ޝޯ ކުރިއަށް ގެންދިއުމަށް ހަތް މިލިޔަނަށް ވުރެ ގިނަ ރުފިޔާ ހަރަދު ކުރި އެވެ.
އޭގެ އިތުރުން ވެސް ގިނަ ޚަރަދުތަކެއް އެ ރަސްމިއްޔާތަށް، ހައުސިން މިނިސްޓްރީން ވަނީ ކޮށްފަ އެވެ. ލީކުވެފައިވާ ތަފްސީލުތަކަކީ ސައްހަ މައުލޫމާތު ތަކެއް ކަމަށް އެ ކަމުގައި އިސްކޮށް ހަރަކާތްތެރިވި ހައުސިން މިނިސްޓްރީގެ އޮފިޝަލަކު ވަނީ ބައެއް މީޑިއާތަކަށް ކަށަވަރު ކޮށްދީފަ އެވެ.
ނަމަވެސް ރާއްޖެ އެމްވީއަށް ވަނީ އެމިނިސްޓްރީގެ ބަހެއް އަދި ލިބޭގޮތް ނުވެފައެވެ.
