ނުހައްގުން ކުރި ޖޫރިމަނާ، އަނބުރާ ލިބޭ ގޮތަށް ފާސްކުރުން މުހިއްމު: މަހުލޫފް
28 އޮކްޓޯބަރު 2018 | އާދީއްތަ 13:00ރާއްޖެޓީވީ ތިން ފަހަރަށް ޖޫރިމަނާކޮށް، 3.7 މިލިއަން ދައްކާފައިވޭ
ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު އަބުރުފުޅު ފަންޑަށް ފައިސާގެ އެހީތެރިކަން ފޯރުކޮށްދެއްވަނީ
އަބުރު ރައްކާތެރި ކުރުމާއި ހިޔާލުފާޅު ކުރުމުގެ ގާނޫނުގެ ދަށުން ޖޫރިމަނާ ކުރި މީޑީއާތަކާއި ނޫސްވެރިންނަށް، އެ ފައިސާ އަލުން އަނބުރާ ދިނުމަށް ރައްޔިތުންގެ މަޖިލީހުން ފާސްކުރުން މުހިއްމު ކަމަށް ގަލޮޅު ދެކުނު ދާއިރާގެ މެމްބަރު އަހުމަދު މަހުލޫފު ވިދާޅުވެއްޖެއެވެ.
މަހުލޫފު އެގޮތަށް ވިދާޅުވެފައި ވަނީ އާދީއްތަ ދުވަހު ބާއްވާ ރައްޔިތުންގެ މަޖިލީހުގެ ޖަލްސާއަށް އެ ގާނޫނު ބާތިލު ކުރަން ހުށަހަޅާފައިވާ މައްސަލަ އެޖެންޑާކޮށްފައި ވަނިކޮށެވެ. މަހުލޫފު ވިދާޅުވީ އެ ގާނޫނު ބާތިލުކުރަން ހުށަހަޅާފައިވާ ބިލު މަޖިލީހުން ފާސްވެގެންދާއިރު، ނުހައްގުން ޖޫރިމަނާކޮށްފައިވާ ސްޓޭޝަންތަކަށް އެ ފައިސާ އަނބުރާ ލިބޭ ގޮތަށް ފާސްކުރުން މުހިއްމު ކަމަށެވެ.
އަބުރުގެ ގާނޫނުގެ ދަށުން އެންމެ ފުރަތަމަ އަދި އެންމެ ގިނައިން ޖޫރިމަނާކޮށްފައި ވަނީ ރާއްޖެޓީވީއެވެ. އެގޮތުން ހަތަރު ފަހަރެއްގެ މަތިން ރާއްޖެޓީވީ ޖުރިމަނާ ކުރުމުން، އާންމު ރައްޔިތުންގެ އެހީތެރިކަމާއި ހެޔޮ އެދޭ ފަރާތްތަކުގެ ދީލަތި އެހީއާ އެކު 3.7 މިލިއަން ރުފިޔާ ދައުލަތަށް ދައްކައި ވަނީ ހަލާސްކޮށްފައެވެ.
އެ ގާނޫނުގެ ދަށުން، ވީޓީވީ އާއި ސަންގުޓީވީ އާއި ޕީއެސްއެމްގެ އިތުރުން ރާއްޖެޓީވީގެ ކުރީގެ ނޫސްވެރިޔަކު ވެސް ވަނީ ޖޫރިމަނާކޮށްފައެވެ. އަބުރު ގެއްލިގެން ކަމަށް ބުނެ، މީޑިއާތައް ޖޫރިމަނާކޮށްގެން ލިބުނު ފައިސާ އަބުރު ގެއްލުނު ކަމަށް ބުނާ މީހުންނަށް ރައްދުކޮށްދީފައެއް ނުވެއެވެ. ބްރޯޑްކާސްޓިން ކޮމިޝަނުން ކުރި ޖޫރިމަނާގެ ފައިސާ، ދައުލަތުގެ އާމްދަނީގެ ގޮތުގައި ބަލައި، މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އާ ވަނީ ހަވާލުކޮށްފައެވެ.
