ޖުޑިޝަރީ އިސްލާހު ކުރަން ޖޭއެސްސީ ބަދަލުކުރަންޖެހޭ: ސިރާޖު
26 އޮކްޓޯބަރު 2018 | ހުކުރު 23:45ފަނޑިޔާރުންގެ މައްސަލަ ފަނޑިޔާރުންނަށް ބެލެންޖެހޭކަމަށް ގަބޫލެއް ނުކުރެވޭ
ގާނޫނީ ވަކީލު ސިރާޖު އާއި ޝަމީމް
ފަނޑިޔާރުގެތައް އިސްލާހުކުރުމަށްޓަކައި ޖުޑީޝަލް ސާވިސް ކަމިޝަން(ޖޭއެސްސީ) ބަދަލު ކުރަންޖެހޭކަމަށް ގާނޫނީ ވަކީލް މޫސާ ސިރާޖު ވިދާޅުވެއްޖެއެވެ.
ރާއްޖެޓީވީން ގެނެސްދޭ "އަނިޔާވެރިކަން ނިމުން" ހާއްސަ ކަވަރޭޖްގައި ހުކުރު ދުވަހުގެ ރޭ ސިރާޖު ވިދާޅުވީ ޖޭއެސްސީ އެކުލަވާލާފައިވާ ގޮތަކީ ރަނގަޅު ގޮތެއް ކަމަށް ގަބޫލު ނުކުރެވޭ ކަމަށާއި ފަނޑިޔާރުންގެ މައްސަލަ ފަނޑިޔާރުންނަށް ބެލެންޖެހޭކަމަށް ގަބޫލު ނުކުރައްވާކަމަށެވެ.
"މިހާރު މިއޮތް ޖުޑީޝަރީ، ޖޭއެސްއީ އެކުލަވާލާފައި އޮތް ގޮތުން ފަނޑިޔާރުންގެ ބަޔަކު ތިބުމާއި އަދި ރައީސުލްޖުމްހޫރިއްޔާ މީހުން ލުމާއި މަޖިލީހުން މާގިނަ މީހުން ތިބުމާއި މިކަންކަމަކީ އަޅުގަނޑަކަށް ގަބޫލެއް ނުކުރެވޭ މިކަންކަން ކުރެވޭނެކަމަކަށް. ދެން އަނެއް ކަމަކަށް އަޅުގަނޑު ގަބޫލެއް ނުކުރަން ފަނޑިޔާރުންގެ މައްސަލަ ބަލަން ފަނޑިޔާރުންނަށް ތިބެވޭނެ ކަމަކަށް. އެއީ މައްސަލައެއް. ރައްޔިތުންގެ މަޖިލީހުން އެކަން ނިންމާނީ ޖޭއެސްސީއަށް ބަދަލެއް ގެންނަންޏާ ގެންނާނީ. އަޅުގަނޑު ގަބޫލު ކުރަނީ ޖޭއެސްސީ ބަދަލުނުކޮށް ފަނޑިޔާރުގެއެއް އިސްލާހެއް ނުވާނެ." ސިރާޖު ވިދާޅުވިއެވެ.
ސިރާޖު ވިދާޅުވީ ޖޭއެސްސީ ރަނގަޅަށް ހިނގާކަމުގައިވަނީނަމަ ޝަކުވާ ހުށައެޅުމުން ރައްޔިތުންގެ މެދުގައި އަދުލުއިންސާފާއި ގުޅިގެން ސުވާލު އުފެއްދޭކަންތައްތަކެއް އޮވެގެން ނުވާނެކަމަށެވެ. އަދި ރައްޔިތުންގެ އިތުބާރު ހޯދުމަކީ ފަނޑިޔާރުންނާއި ޖޭއެސްސީއަށް މުހިއްމު ކަމެއްކަމަށް ސިރާޖު ވިދާޅުވިއެވެ.
ފަނޑިޔާރުން ނެގުމުގައި ރަނގަޅު އެކަމަށް ގާބިލް ފަނޑިޔާރުން ނަގަން ޖެހޭކަމަށާއި ޝަރީއަތްތައް ކުރިއަށް ގެންދިއުމުގައި ހުޅުވާލައިގެން ޝަރީއަތްތައް ގެންދިއުން މުހިއްމުކަމަށް ވެސް ސިރާޖު ފާހަގަ ކުރެއްވިއެވެ.
ސިރާޖު ވިދާޅުވީ އިންތިޚާބީ ރައީސް އިބްރާހިމް މުހައްމަދު ސޯލިހުގެ ވެރިކަމުގައި އަދުލު އިންސާފު ކަށަވަރުވެގެންދާނެކަމަށް ގަބޫލު ކުރައްވާކަމަށެވެ.
