ޕާސްޕޯޓް ދޫކޮށްލުމުން ކުރީގެ ސްޓޭޓް މިނިސްޓަރ އަކްރަމް ކަމާލުއްދީން ރާއްޖެ ވަޑައިގެންފި
24 އޮކްޓޯބަރު 2018 | ބުދަ 10:48އަކްރަމަކީ ސަރުކާރުން ޕާސްޕޯޓް ހިފެހެއްޓި ބޭފުޅެއް
އަކްރަމް ކަމާލުއްދީން ރާއްޖެ ވަޑައިގަތުމުން މަރުޙަބާ ދަންނަވަނީ
އިމިގްރޭޝަނުން ޕާސްޕޯޓް ދޫކޮށްލުމާއެކު ހައުސިން މިނިސްޓްރީގެ ކުރީގެ ސްޓޭޓް މިނިސްޓަ އަކްރަމް ކަމާލުއްދީން ރާއްޖެވަޑައިގެންފިއެވެ.
ރާއްޖެ ޓީވީގެ ޗެއަރމަންގެ ގޮތުގައިވެސް ހުންނެވި އަކްރަމް ކަމާލުއްދީން ރާއްޖެ ވަޑައިގެންފައި މިވަނީ ސިޔާސީ ފިއްތުންތަކާ ހުރެ އަވައްޓެރި ސްރީ ލަންކާއަށް އަމިއްލައަށް އަރުވާލެއްވިގެން އެތަނުގައި ދިރިއުޅުއްވާތާ ދެއަހަރަށް ވުރެ ގިނަ ދުވަސްވީ ފަހުންނެވެ.
ރާއްޖެއިން ބޭރުގައި ހުންނަވަނިކޮށް ޕާސްޕޯޓް ހިފަހައްޓާފައިވާ އަކްރަމް ކަމާލުއްދީންއަކީ ރާއްޖެއިން ބޭރުގައި ތިއްބަވަނިކޮށް ޕާސްޕޯޓް ކެންސަލް ކުރި ސިޔާސީ ބޭފުޅުންގެ ތެރެއިން ބޭފުޅެކެވެ.
ރާއްޖެއިން ބޭރުގައި ތިއްބެވި ސިޔާސީ ބޭފުޅުންގެ ޕާސްޕޯޓް ކެންސަލްކުރިކަން އަންގައި އިމިގްރޭޝަނުން މީގެ ކުރިން ނެރުނު ބަޔާނެއްގައި ވަނީ ކޯޓުގެ ހުކުމަކުން ނުވަތަ ތަހުގީގީ އިދާރާތަކުން ބޭނުންވެގެން ހޯދާ މީހުންނަކީ ދިވެހި ޕާސްޕޯޓް ބޭނުންކޮށްގެން ރާއްޖެ އިން ބޭރުގައި ތިބެވޭނެ ބައެއް ނޫން ކަމަށެވެ. އަދި އެފަދަ ބައެއް މީހުން ދިވެހި ޕާސްޕޯޓް ބޭނުން ކޮށްގެން ބޭރުގައި ތިބުމުން ކޯޓުތަކަށާއި ތަހުގީގުތަކަށް ހުރަސް އެޅޭ ކަމަށް އެ ބަޔާނުގައިވެ އެވެ.
އަކްރަމް ފުލުހަށް ހާޒިރު ވުމަށް އަންގާފައި ވަނީ 4 އޯގަސްޓް 2016 ވަނަ ދުވަހުއެވެ. އޭގެ ފަހުން އަކްރަމް ދިރިއުޅުއްވަމުން ގެންދެވީ ރާއްޖެއިން ބޭރުގައެވެ.
އަކްރަމްގެ ޕާސްޕޯޓް މީގެ ކުޑަދުވަސްކޮޅެއް ކުރިން ދޫކޮށްލާފައިވާ ކަމަށް އިމިގްރޭޝަނުން ހާމަކުރެއްވީ ހޯމަ ދުވަހުއެވެ.
އިމިގްރޭޝަންގެ އޮފިޝަލަކު އެދުވަހު ވިދާޅުވީ ޕާސްޕޯޓު މިހާރު ވަނީ ދޫކޮށްލާފައި ކަމަށެވެ. އަދި ރާއްޖެ އަންނަން ބޭނުން ކަމުގައި ވާނަމަ އެކަމުގެ ހުރަހެއް މިހާރު ނެތްކަމަށާއި އެގޮތަށް ނިންމާފައި ވަނީ ފަހުގެ ތާރީޚެއްގައި ކަމަށް އޭނާ ވިދާޅުވިއެވެ.
އަކްރަމްއަށް މަރުހަބާ ދެންނެވީ ރާއްޖެ ޓީވީގެ މެނޭޖިންގ ޑިރެކްޓަރ އަހުމަދު ސަލީމާއި ޗީފް އޮޕަރޭޓިންގ އޮފިސަރ ހުސައިން ފިޔާޒް މޫސާގެ އިތުރުން ރާއްޖެ ޓީވީގެ ބައެއް ވެރިންނެވެ.
