ކަރަޕްޝަނާ ދެކޮޅަށް ތެދުވުމަށް ޑިފެންސް މިނިސްޓަރ އާދަމް ޝަރީފް ގޮވާލައްވައިފި
ކޮރަޕްޝަނުގެ އަމަލުތައް ހުއްޓުވޭނީ އާންމުން އެކަމަށް ހޭލުންތެރިވެގެން
އާދަމް ޝަރީފު
ކަރަޕްޝަނާ ދެކޮޅަށް ތެދުވުމަށް ޑިފެންސް މިނިސްޓަރ އާދަމް ޝަރީފް ގޮވާލައްވައިފިއެވެ.
އާދަމް ޝަރީފްގެ ފޭސްބުކް ޕޭޖުގައި ވިދާޅުވެފައިވަނީ ކަރަޕްޝަން އަކީ ރާއްޖެއަށް މިއަދު ކުރިމަތި ވެފައިވާ އެންމެ ބޮޑު އެއް މައްސަލަ ކަމަށެވެ. އަދި އެ މައްސަލަ ރާއްޖޭގައި ކުޑަ ކުރެވޭނީ މުއައްސަސާ ތަކުގެ ވެރިންނާއި މަޖިލިސް ގެ އިއްޒަތްތެރި މެމްބަރުންނާއި އާންމު ފަރުދުން ޒިންމާދާރު ކަމާއެކު ކަރަޕްޝަންއާއި ދެކޮޅަށް ތެދުވެގެން ކަމަށް ވަނީ ވިދާޅުވެފައެވެ.
މިއަހަރު ނެރުނު ކޮރަޕްޝަން ޕާސެޕްޝަން އިންޑެކްސް (ސީޕީއައި) ރޭންކިންގައި 17 ދަރަޖަ ވެއްޓި މަތީ ދަރަޖައަކަށް ކޮރަޕްޝަން އަށަގެންފައިވާ ގައުމުތަކުގައި ގިންތީގައި ރާއްޖެ ވަނީ ހިމެނިފައެވެ.
ރާއްޖޭގެ އިސްލާމިކް ޔުނިވަރސިޓީގެ ކޯސްތައް ނިންމި ދަރިވަރުންނަށް ސެޓްފިކެޓް ހަވާލު ކުރުމަށް މިދިޔަ އެޕްރީލްމަހު ބޭއްވި ދަސްވެނިވުމުގެ ރަސްމިއްޔާތުގައި ވެސް އާދަމް ޝަރީފު ވަނީ ކޮރަޕްޝަނުގެ މައްސަލަތަކުގައި އެކި ފަރާތްތަކަށް އިނގިލި ދިއްކުރަމުންދާ އިރު މިފަދަ ކަންކަމަށް މަގުފަހިވެގެންދަނީ އާންމު ފަރުދުން ވެސް ޝާމިލުވުމާ އެކުގައި ކަމަށް ވިދާޅުވެފައެވެ.
އާދަމް ޝަރީފު ވިދާޅުވީ، ކޮރަޕްޝަނުގެ ކަންކަން ފެށިގެންދާ ގޮތަށް ބަލާ އިރު އެކި ފަރާތްތަކުން ތަފާތު އެކި މީހުންނަށް އިނގިލި ދިއްކުރަމުންދާ އިރު އެކަން ހައްލު ކުރެވޭނީ އަމިއްލަ ނަފުސުން ކޮރަޕްޝަނާ ދުރުވެ އެފަދަ ކަންކަމަށް ފާޅުގައި ނޫނެކޭ ބުނެ އާންމުން ހޭލުންތެރި ކޮށްގެން ކަމަށެވެ.
