މާލޭގައި ޒުވާނެއްގެ ގަޔަށް ތޫނު އެއްޗަކުން ހަމަލާދީ ޒަހަމްކޮށްލައިފިއެވެ.
ފުލުހުން ބުނީ މާލޭގައި ހިނގި މާރާމާރީއެއްގައި ތޫނު އެއްޗަކުން ހަމަލާދީ ޒުވާނަކު ޒަހަމްކޮށްލާފައިވާ ކަމަށެވެ. އަދި އެމީހާއަށް އޭޑީކޭ ހޮސްޕިޓަލްގައި ފަރުވާ ދެމުން އަންނަ ކަމަށެވެ.
ނަމަވެސް، އެ މާރާމާރީއާ ގުޅޭ އިތުރު ތަފްސީލެއް ފުލުހުންނެއް ނުދެ އެވެ. މައުލޫމާތު ލިބޭ ގޮތުގައި، ހަމަލާދީ ޒަހަމްކޮށްލާފައިވަނީ މިޒުވާނާގެ އަތެވެ. އަދި ސީރިއަސް އަނިޔާތަކެއް ލިބިފައެއް ނުވެ އެވެ.
މާރާމާރީތައް އިތުރުވެފައިވާއިރު، މިމަހުގެ 11 ވަނަ ދުވަހުގެ ރޭ 14 އަހަރުގެ ކުއްޖަކަށް ވަޅިން ހަމަލާ ދިނުމާއި ގުޅިގެން ވަނީ މަރުވެފައިވެފައެވެ. އަދި މިމަހުގެ 10 ވަނަ ދުވަހުގެ ހެނދުނު ވެސް ވަޅިން ހަމަލާދީ ޒުވާނަކު ވަނީ ޒަހަމްކޮށްލާފައެވެ. މީގެ އިތުރުން މިމަހުގެ 8 ވަނަ ދުވަހުރޭ ކަރަށް ވަޅި ހެރުމުން ލިބުނު އަނިޔާތަކުގައި ޒަހަމްވި ޒުވާނާ ހާލު ސީރިއަސްވެފައިވާއިރު، އައްޑޫ ސިޓީގައި ވަޅިން ހަމަލާދީ ޒަހަމްކޮށްލި ޒުވާނާ ހާލު ސީރިއަސްވެ އައިޖީއެމްއެޗްގައި އަންނަނީ ފަރުވާ ދެމުންނެވެ.
