ރަންބީރު ކަޕޫރު އޭނާގެ ލޯބިވެރިޔާ އާލިއާ ބަޓްއާ އެކު ނިއުޔޯކްގައި ވަގުތު ހޭދަކުރަން ފަށައިފިއެވެ.
ރަންބީރުގެ މަންމަ ނީތޫ ސިންގް ވަނީ އޭނާގެ އިންސްޓަގްރާމްގައި ނިއު ޔޯކްގެ މަގުމަތީގައި ހިނގާފައި ދަނިކޮށް ފުރަގަހުން ނަގާފައިވާ ރަންބީރު ކަޕޫރުގެ ފޮޓޯއެއް ޕޯސްޓްކޮށްފައެވެ. އެ ފޮޓޯގައި އޭނާ ލައިގެން ހުރީ ނޫކުލައިގެ ޓީޝާޓަކެވެ. ބެކް ޕެކް އަޅައިގެން ހުރި އިރު އޭނާގެ ބޮލުގައި ވަނީ ކެޕެއް އަޅާފައެވެ.
އެ ފޮޓޯގެ ކެޕްޝަންގައި ލިޔެފައި ވަނީ "ދަ ސްޓްރެންތު" އެވެ. އެ ފޮޓޯވެގެން ގޮސްފައި ވަނީ ފޭނުން ވަރަށް ގަޔާވާ ފޮޓޯ އަކަށެވެ.
ނީތޫގެ ފޮލޯވަރުން ވަނީ ރަންބީރުގެ ފޮޓޯ ޝެއަރ ކުރުމުން އެކަމަށް ޝުކުރު އަދާކޮށްފައެވެ.
"ގިނަ ފޮޓޯތައް ޕޯސްޓް ކުރުމަށް އެދެން... އޭނާ އަމިއްލައަށް އިންސްޓަގްރާމްގައި ނޫޅޭ. އޭނާ ފެންނާނެ ހަމައެކަނި ގޮތަކީ މިއީ.." ފޭނެއް ކޮށްފައިވާ ކޮމެންޓެއްގައި ވެއެވެ.
ކޮންމެއަކަސް އެ ފޮޓޯގައި މިވަގުތު ނިއުޔޯކްގައި ހުރި ރަންބީރުގެ ލޯބިވެރިޔާ އާލިއާ ފެންނަން ނެތުމުން ގިނަ ފޭނުންނަށް ވަނީ ހައިރާންކަން ލިބިފައެވެ.
އާލިއާ ވަނީ އަންގާރަ ދުވަހު ނިއުޔޯކްގެ މަގުމަތީގައި ނަގާފައިވާ ފޮޓޯ އެއް ޕޯސްޓްކޮށްފައެވެ.
ނީތޫ ޕޯސްޓް ކޮށްފައިވާ ފޮޓޯގައި އާލިއާ ނެތް ނަމަވެސް ބައެއް ފޭނުންގެ އެކައުންޓްތަކުން ޕޯސްޓް ކޮށްފައިވާ ފޮޓޯތަކުގައި އެ ދެ ލޯބިވެރިން އެކުގައި ނިއު ޔޯކްގެ މަގުމަތިން ފެނިގެން ދެއެވެ.
ރަންބީރާއި ނީތޫ ނިއުޔޯކަށް ގޮސްފައި ވަނީ ރަންބީރުގެ ބައްޕަ ރިޝީ ކަޕޫރުގެ ބޭސްފަރުވާ އަށެވެ.
ނިއު ޔޯކަށް ފުރުމުގެ ކުރިން ރިޝީ ކޮށްފައިވާ ޓްވީޓްގައި ބުނެފައި ވަނީ ބޭސްފަރުވާ އަށް އެމެރިކާ އަށް ދިއުމަށްޓަކައި މަސައްކަތާއި ދުރުވެ ކުޑަ ދުވަސް ކޮޅަކަށް ޗުއްޓީ އެއް ނަގާ ކަމަށެވެ. އަދި އޭނާއަށް ހެޔޮއެދޭ މީހުންގެ ކިބައިން ކަންބޮޑު ނުވުމަށް ވަނީ އެދިފައެވެ.
މީގެ އިތުރުން ރިޝީ ބުނެފައި ވަނީ ބޮލީވުޑްގެ ފިލްމުތައް ކުޅޭތާ 45 އަހަރު ވެފައިވާ ކަމަށާއި ފޭނުންގެ ލޯތްބާއި ހެޔޮއެދުމާ އެކު ވަރަށް އަވަހަށް އެނބުރި އަންނާނެ ކަމަށެވެ.
ރަންބީރު މިހާރު ކުރަމުންދާ މަސައްކަތްތަކަށް ބަލާއިރު އޭނާ ދެން އެންމެ އަވަހަށް ފެނިގެން ދާނީ އަޔާން މުކަރްޖީގެ "ބްރަމާސްތްރާ" އިންނެވެ. ކަރަން ޖޯހަރު ޕްރޮޑިއުސްކުރާ މި ފިލްމްގައި ފެނިގެން ދަނީ އަމީތާބް ބަޗަން އާއި އާލިއާ ބަޓް، ނަގަރް ޖޫނާ އަދި މޮއުނީ ރޯއީ އެވެ.
