ހެކި ވަޒަންކުރުމުގެ ފުރުސަތުނުދީ ރައްޔިތުން ނިންމި ނިންމުމެއް ބާތިލެއް ނުކުރެވޭނެ: ދިޔާނާ
ހެކި ވަންހަނާ ނުކުރެވޭނެ
ދިޔާނާ ސައީދު
ހެކިބަސް ދޭ މީހުންގެ ކެރެކްޓަރ ވަޒަން ކުރުމުގެ ފުރުސަތު ދިފާއީ ވަކީލުންނަށް ލިބިނުދީ ރައްޔިތުން ނިންމި ނިންމުމެއް ބާތިލް ނުކުރެވޭނެ ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.
ދިޔާނާ ކުރެއްވި ޓްވީޓެއްގައި ވިދާޅުވީ ކެރެކްޓާ ވަޒަންކުރުމުގެ ފުރުސަތު ދިފާއީ ވަކީލުންނަށް ނުދީ އެމީހެއްގެ ހެކިބަހުގެ މައްޗަށް ދިވެހި ރައްޔިތުންގެ ސާފު އަގުލަބިއްޔަތުން ނިންނި ނިންމުމެއް ބާތިލް ނުކުރެވޭނެ ކަމަށާއި ހެކި ވަންހަނާ ނުކުރެވޭނެ ކަމަށެވެ.
ރިޔާސީ އިންތިޚާބު ބާތިލު ކުރުމަށް ރައީސް ޔާމީންގެ ފަރާތްޕުޅުން މައްސަލައެއް ސުޕްރީމް ކޯޓަށް ހުށައަޅާފައިވާއިރު އެމައްސަލައިގައި ސިއްރު ހެކީންގެ ގޮތުގައި ތިން ހެކީންގެ ހެކިބަސް ނެގުމަށް ވަނީ ހުށައަޅާފައެވެ. އެމައްސަލައިގައި ދެ އަޑުއެހުމެއް ބާއްވާފައިވާއިރު ތިން ހެކީންގެ ތެރޭގައި ނެގުމަށް ނިންމާފައިވާ ހެކިބަސްތަކުގެ ތެރޭގައި އިލެކްޝަން ކޮމިޝަނުގެ ރައީސް އަހްމަދު ޝަރީފު ބުނެގެން ގޮސް އަނގޮޓި ގަނެގެން ރާއްޖެ އެތެރެކުރި ކަމަށް ރައީސް ޔާމީން ވިދާޅުވާ މީހާއާއި އިތުރު ދެ ހެއްކެކެވެ.
