މޮރީނިއޯ އާ އެކު އަދި މަސައްކަތްކުރަން ބޭނުން: ހަޒާޑް

ކުރީގެ ކޯޗު ހޯސޭ މޮރީނިއޯއާ އެކު އަލުން މަސައްކަތް ކުރަން ބޭނުންވާ ކަމަށް ޗެލްސީގެ ފޯވާޑް އެޑެން ހަޒާޑް ބުނެފި އެވެ.

2012 ވަނަ އަހަރު ޗެލްސީއާ ގުޅުނު ހަޒާޑް ވަނީ މޮރީނިއޯގެ ކޯޗުކަމުގެ ދަށުން 2015 ވަނަ އަހަރު ޕްރިމިއާ ލީގު ކާމިޔާބުކޮށްފަ އެވެ.

ޗެލްސީން މި ސީޒަނުގެ ޕްރިމިއާ ލީގުގައި ދެން އެންމެ އަވަހަށް ނުކުންނާނީ އަންނަ ހޮނިހިރު ދުވަހު، މޮރީނިއޯ މިހާރު ކޯޗުކޮށްދޭ މެންޗެސްޓާ ޔުނައިޓެޑާ ދެކޮޅަށެވެ.

ހަޒާޑް ބުނީ އޭނާ ދެން މަސައްކަތް ކުރަން ބޭނުންވާ ކޯޗާއި މެދު ސުވާލުކޮށްފިނަމަ ޖަވާބަކަށް ވާނީ މޮރީނިއޯ ކަމަށެވެ.

މޮރީނިއޯގެ ކޯޗުކަމު ގައި ހަޒާޑް ކުޅުނު ދެ އަހަރުގެ ތެރެއިން ލީގު ކާމިޔާބުކުރި ސީޒަނު ގައި 14 ގޯލް ޖަހައި، ޕީއެފްއޭފެ މޮޅު ކުޅުންތެރިޔާގެ މަގާމް ހޯދި އެވެ.

ހަޒާޑްބުނީ އޭނާގެ 12 އަހަރުގެ ކެރިއަރުގައި ކަންތައްތައް ގޯސްކޮށްދިޔައީ އެންމެ ފަހަރަކު ކަމަށެވެ. އަދި އެއީ މޮރީނިއޯއާ އެކު މަސައްކަތްކުރި ފަހު ދުވަސްކޮޅުގައި ކަމަށާއި އެކަމުގައި އޭނާވެސް މައްސަލަ އުޅޭ ކަމަށް ހަޒާޑް ބުންޏެވެ.

އާދަޔާހިލާފަށް ޑިފެންސިވްކޮށް ކުޅުވާ ކޯޗެއްގެ ގޮތުގައި މޮރީނިއޯ އާ މެދު ދެކޭ ދެކުން މުޅިއަކުން ރަނގަޅެއް ނޫން ކަމަށް ހަޒާޑް ބުންޏެވެ.

މޮރީނިއޯ މި ވަގުތު ހުރީ ވެސް އޭރު ޗެލްސީއާ އެކު ހުރި ފަދަ ހާލަތެއްގަ އެވެ. ފުރަތަމަ އަށް މެޗަށް ފަހު ޔުނައިޓެޑް އޮތީ 13 ޕޮއިންޓާ އެކު އަށް ވަނައިގަ އެވެ.