ވަޅިތަކެއް ހިފައިގެން މާލޭގައި މާރާމާރީ ހިންގަން އުޅުނު ގްރޫޕެއް މާލެ އިން ހައްޔަރު ކޮށްފައިވާ ކަމަށް ފުލުހުން ބުނެފިއެވެ.
ފުލުހުން ބުނީ މާރާމާރީ ހިންގަން އުޅުނު ފަސް މީހަކު ހައްޔަރު ކޮށްފައިވާ ކަމަށެވެ.
"މި ފަސް މީހުން ހައްޔަރު ކޮށްފައި ވަނީ ފިހާރަ އަކުން ވަޅިތަކެއް ގަނެގެން ސައިކަލްތަކެއްގައި ގޮސް ކާނިވަލް ކައިރީ ޕެޓްރޯލް ޝެޑުން ޕެޓްރޯލް އަޅަން މަޑުކޮށްގެން ތިއްބާ އެމީހުންނަށް ފުލުހުން ފެނުމާއި އެކު ފިލަން މަސައްކަތް ކުރަނިކޮށް ވަޅިތަކާއި އެކު" ފުލުހުންގެ މީޑިއާ އޮފިޝަލް ވިދާޅުވިއެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި މި މައްސަލަ ފުލުހުން ގެންދަނީ އިތުރަށް ތަޙްޤީޤު ކުރަމުންނެވެ.
މާލޭގައި ފަހަކަށް އައިސް ވަނީ މާރާމާރީގެ ނުރައްކާ ބޮޑުވެފައެވެ. މިދިޔަ ހޯމަ ދުވަހުގެ ރޭ ވެސް ވަނީ މީހެއްގެ ގަޔަށް ވަޅި ޖަހާ ވަރަށް ބޮޑަށް ޒަހަމް ކޮށްލާފައެވެ. އޭނާގެ ހާލު އަދި ވެސް ސީރިއަސް ކަމަށް މައުލޫމާތު ލިބެއެވެ. އޭގެ ކުރިން އައްޑޫގައި ވެސް ޒުވާނަކަށް ހަމަލާދީފައި ވެއެވެ.
މީގެ އިތުރުން މިއަދު ވެސް މީހަކަށް ތޫނޫ އެއްޗަކުން ހަމަލާދީ ޒަހަމް ކޮށްލާފައި ވެއެވެ.
