ސުޕްރީމް ކޯޓުން 1 ފެބްރުއަރީގައި ނެރުނު އަމުރަކީ ކޮރަޕްޝަންގެ އަމަލެއް ހިމެނިގެން ނެރުނު އަމުރެއް ނޫންކަން ސާބިތުވެއްޖެ ކަމަށް ގާނޫނީ ވަކީލު ހިސާން ހުސައިން ވިދާޅުވެއްޖެއެވެ.
ހިސާން އެގޮތަށް ވިދާޅުވީ ކުރީގެ އުއްތަމަފަނޑިޔާރު އަބްދުﷲ ސައީދާއި ސުޕްރީމް ކޯޓުގެ ކުރީގެ ފަނޑިޔާރު އަލީ ހަމީދުގެ މައްޗަށް ކުރި ރިޝްވަތު ހިފުމުގެ ދައުވާ ކްރިމިނަލް ކޯޓުން ބުދަ ދުވަހު ބާތިލު ކުރުމުންނެވެ.
ހިސާން ރާއްޖެއެމްވީ އަށް ވިދާޅުވީ ސުޕްރީމް ކޯޓުގެ އަމުރާ ގުޅިގެން ދެ ފަނޑިޔާރުންގެ މައްޗަށް ކުރި ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަން އެނގިގެން ދިޔައީ އެކަމާ ގުޅޭ އެއްވެސް ހެއްކެއް ދައުލަތުން ޝަރީއަތަށް ހުށަހެޅިފައި ނެތުމުން ކަމަށެވެ. ދެ ފަނޑިޔާރުންގެ މައްޗަށް ކުރި ރިޝްވަތު ހިފުމުގެ ދައުވާ ކްރިމިނަލް ކޯޓުން ބާތިލުކުރީ ވެސް އެ ސަބަބާ ގުޅިގެން ކަމަށް ހިސާން ވިދާޅުވިއެވެ.
އޭގެ ނަތީޖާއެއްގެ ގޮތުން ސުޕްރީމް ކޯޓުގެ އަމުރަކީ ކޮރަޕްޝަންގެ އަމަލެއް ހިންގައިގެން ނެރުނު އަމުރެއް ނޫން ކަން ސާބިތުވެފައިވާ ކަމަށާއި އެ އަމުރު ނެރުމުގައި ކިލަނބު ކަމެއް ނެތް ކަަމަށް ހިސާން ވިދާޅުވިއެވެ. އަދި ވިދާޅުވީ ފަނޑިޔާރުންނަށް ކުރި ތުހުމަތުތަކަށް ބިނާކޮށް ރައީސް އަބްދުﷲ ޔާމީން ކުއްލި ނުރައްކަލުގެ ހާލަތު އިއުލާން ކުރެއްވީ ވެސް އެއްވެސް އަސާސެއްގެ މައްޗަށް ބިނާކޮށްގެން ނޫންކަން އެނގިގެން ހިނގައްޖެ ކަމަށެވެ.
"ސާބިތުވެގެން މިދިޔަ ކަމަކީ ރައީސް ޔާމީން އެކެއް ފެބްރުއަރީގައި ސްޓޭޓް އޮފް އެމެޖެންސީ ނުވަތަ ކުއްލި ނުރައްކަލުގެ ހާލަތު އިއުލާން ކުރެއްވީ އެއްވެސް އަސާސެއްގެ މައްޗަށް ބިނާކޮށްގެން ނޫންކަން. އަދި ހަމަ އެއާ އެކު އެއްވެސް ދުސްތޫރީ ހަމައަކުން ނޫން ކަން،" ހިސާން ވިދާޅުވިއެވެ.
"ސުޕްރީމް ކޯޓުން އެކެއް ފެބްރުއަރީ ގައި ނެރުނު އަމުރު ނެރުމުގެ ފަހަތުގައި ގާނޫނާ ހިލާފު ނުވަތަ ނާޖާއިޒު އެއްވެސް ކަމެއް ހިނގާފައި ނުވާކަން ކަނޑައެޅިގެން މިއަދު ދިޔައީ. ނުވަތަ އެފަދަ ކޮރަޕްޝަންގެ އަމަލެއް ހިންގާފައިވާކަން އޭރު ކުރެވުނު ތުހުމަތުގެ އަސާސެއް ނެތްކަން. އެހެންކަމުނެ އެ ދުވަހު ނެރުއްވި އަމުރާ ގުޅިގެން ދައުލަތުގެ ފަރާތުންނާއި ރައީސް ޔާމީންގެ ސަރުކާރުން ވިދާޅަމުން ގެންދިޔަ ވާހަކަތަކަކީ ރަނގަޅު ވާހަކަތަކެއް ނޫންކަން އަޅުގަނޑުމެން އެންމެންނަށް ވެސް ކޯޓުގެ ނިންމުމުން މި އަދު ސާބިތުވެގެން މިދިޔައީ،"
