ނޮވެމްބަރު 1 ވެގެން ދާނީ އެމްޑީޕީގެ ބޮޑު އީދަކަށް: ޝިފާޒު
10 އޮކްޓޯބަރު 2018 | ބުދަ 14:40ރައީސް ނަޝީދު ފުރަތަމަ ވަޑައިގަންނަވާނީ މާލެއަށް
އެމްޑީޕީގެ ނާއިބު ރައީސް މުހަައްމަދު ޝިފާޒް
ކުރީގެ ރައީސް އަދި އެމްޑީޕީގެ ލީޑަރު މުހައްމަދު ނަޝީދު، ނޮވެމްބަރު 1 ވަނަ ދުވަހު ރާއްޖެ ވަޑައިގަންނަވާއިރު، އެ ދުވަސް ވެގެންދާނީ އެމްޑީޕީގެ ބޮޑު އީދަކަށް ކަމަށް އެޕާޓީގެ ނާއިބު ރައީސް މުހަައްމަދު ޝިފާޒް ވިދާޅުވެއްޖެއެވެ.
އަންގާރަ ދުވަހުގެ ރޭ ރާއްޖެޓީވީގެ ފަލަ ސުރުހީ ޕްރޮގްރާމްގައި ޝިފާޒް ވިދާޅުވީ އިނގިރޭސިވިލާތުން ހިމާޔަތް ހޯއްދަވައިގެން ހުންނެވި ރައީސް ނަޝީދު އެނބުރި ގައުމަށް ވަޑައިގަތުމަށް ހަމަޖެހިފައިވާ ދުވަސްކަމުގައިވާ ނޮވެމްބަރު މަހުގެ އެއްވަނަ ދުވަސް ވެގެންދާނީ ދިވެހި ގިނަ ރައްޔިތުންނަށް، ޚާއްސަކޮަށް އެމްޑީޕީގެ މެެންބަރުންނަށް ބޮޑު އީދަކަށް ކަމަށެވެ.
ޝިފާޒް ވިދާޅުވީ، އެމަނިކުފާނަކީ މިއަދު ކުރީގެ ނަޝީދު ނޫން ކަމަށާއި އެއީ ކުރީގެ ރައީސް އަދި މިހާރު އެމްޑީޕީގެ ރައީސް ކަމުން އެމަނިކުފާނަށް މަރުހަބާ ދެންނެވުމަށް މުޅި އެމްޑީޕީންނާއި ރާއްޖޭގެ ރައްޔިތުން އަންނަނީ ކެތްތެރިކަމެއް ނެތި އިންތިޒާރު ކުރަމުންކަމަށެވެ.
"ބައިވަރު ރަށްރަށުން ގުޅަނީ، އެބޭފުޅުންގެ ރަށްތައް މަރުހަބާ ކިއުމުގައި ތަމްސީލް ކުރެވޭނެ ގޮތެއް އޮތްތޯ ބެލުމަށް، ރާއްޖޭގެ ހުރިހާ ރަށެއް އެދި ގޮވަމުން އައިކަމެއް މިކަމަކީ. އެ ހުރިހާ ބޭފުޅުންގެ އުއްމީދު މީ. އެހެން ވީމަ ނޮވެމްބަރު އެކެއް އަޅުގަނޑުމެން އެމްޑީޕީއަށް ވެގެންދާނީ އަންނަ ބޮޑު އީދަކަށް،" ޝިފާޒް ވިދާޅުވިއެވެ.
ޝިފާޒް ވަނީ ރައީސް މުހައްމަދު ނަޝީދު މާލެ ވަޑައިގަންނަވާނީ މިނިވަނެއްގެ ގޮތުގައި ކަމަށް ވިދާޅުވާ ވިދާޅުވުން ތަކުރާރު ކުރައްވާފައެެވެ. އޭނާ ވިދާޅުވީ އެމަނިކުފާނުގެ މައްޗަަށް ކުރެވުނު ހުކުމަކީ ބޭ އިންސާފު ހުކުމެއް ކަން އެންމެނަށް ވެސް އެނގޭކަމަށާއި، އެހެންކަމުން އެ މަނިކުފާނަކީ ކުށްވެރިއެއް ނޫންކަމަށެެވެ. އަދި އެނބުރި ވަޑައިގަންނަވާނީ ވެސް އެގޮތުގައި ކަމަށް ޝިފާޒު ވިދާޅުވިއެެވެ.
ޝިފާޒް ވިދާޅުވީ، ރައީސް ނަޝީދު ފުރަތަމަ ވަޑައިގަންނަވާނީ މާލެއަށް ކަމަށެެވެ. އަދި އަތޮޅު ތެރޭން ފުރަތަމަ ވަޑައިގަތުމަށް ހަމަޖެހިފައި ވަނީ، އައްޑޫއަށް ކަމަށް ވިދާޅުވިއެެވެ.
ޝިފާޒް ވިދާޅުވީ، މީހަކަށް މަރުހަބާ ކިއުމަށް ބާއްވާ އެންމެ ބޮޑު ހަފްލާ ނޮވެމްބަރު މަހުގެ އެއްވަނަ ދުވަހު ދިވެހިންނަށް ފެނިގެންދާނެކަމަށެވެ.
ކުރީގެ ރައީސް މުހައްމަދު ނަޝީދު ހުންނެވީ އެމަނިކުފާނުގެ މައްޗަށް އުފުލި ޓެރެރިޒަމްގެ ދައުވާ ސާބިތުވާކަމަށް ކަނޑައަޅައި 13 އަހަރުގެ ޖަލު ހުކުމެއްގައެވެ. އަދި 2016 ވަނަ އަހަރުގެ ޖެނުއަރީ މަހު ބޭސްފަރުވާއަށް އިނގިރޭސިވިލާތަށް ވަޑައިގަތުމަށްފަހު މިހާރު ހުންނެވީ އެގައުމުން ސިޔާސީ ހިމާޔަތް ހޯއްދަވައިގެންނެވެ.
މިމަހުގެ ތިން ވަނަ ދުވަހު ޖޮއިންޓް ޕީޖީ ގްރޫޕަށް ފޮނުއްވި މެސެޖެއްގައި ރައީސް ނަޝީދު ވިދާޅުވީ 1 ނޮވެމްބަރުގައި މާލެ ވަޑައިގަންނަވަން ގަސްދުކުރައްވާ ކަމަށެވެ. އަދި މައްސަލަ ނުނިމި ކޮންމެ ހާއްލެއްގައި ހުންނަވަން ޖެހިވަޑައިގެންނެވި ނަމަވެސް ނޮވެމްބަރު އެކެއްގައި މާލެ ވަޑައިގަންނަވާނެ ކަމަށް ވެސް ވިދާޅުވި އެވެ.
"އެންމެ ބޭފުޅުންގެ މައުލޫމާތައްޓަކައި ދަންނަވަން. އަޅުގަނޑު ގަސްދުކުރަނީ ނޮވެމްބަރު 1 ވަނަ ދުވަހު ރާއްޖެ އަންނަން. އެހާ އިރަށް އަޅުގަނޑުގެ މައްސަލަ ނުނިމުނު ނަމަވެސް އަޅުގަނޑު ގަސްދުކުރަނީ ވީ ހާލެއްގައި ވާން ރާއްޖެ ދިއުމަށް،" ނަޝީދުގެ މެސެޖްގައި ވިދާޅުވި އެވެ.
