އާޔޫޝް ޝަރްމާގެ ޓުވިޓާ އެކައުންޓް ހެކް ކޮށްފި
އެކަން ކުރި މީހަކު ހޯދާ އެމީހަކާއި ދޭތެރޭ އެންމެ ހަރުކަށި ފިޔަވަޅު އެޅުމުގެ މަސައްކަތް ދަނީ ކުރަމުން
އާޔުޝް ޝަރްމާ އަންހެނުން އަރްޕިތާ ޚާން އާއި އެކު
މިދިޔަ ހުކުރު ދުވަހު ރިލީޒް ކުރި ފިލްމް "ލަވްޔާތްރީ" ގެ ތަރި އާޔޫޝް ޝަރްމާގެ ޓްވިޓާ އެކައުންޓް ހެކް ކޮށްފައިވާ ކަމަށް އޭނާގެ އަންހެނުން އަރްޕިތާ ޚާން ބުނެފިއެވެ.
އަރްޕިތާ އޭނާގެ އިންސްޓަގްރާމްގައި ކޮށްފައިވާ ޕޯސްޓެއްގައި ބުނެފައިވަނީ ކޮންމެވެސް މީހަކު އާޔޫޝްގެ ޓްވިޓާ އެކައުންޓް ހެކްކޮށްފައިވާ ކަމަށެވެ. އަދި އެ އެކައުންޓުން ބޭއަދަބީ ބަސްތައް ބޭނުން ކޮށްގެން ޕޯސްޓްތައް ކޮށްފައިވާކަމަށް ވަނީ ބުނެފައެވެ.
އެކަން ކުރި މީހަކު ހޯދާ އެމީހަކާއި ދޭތެރޭ އެންމެ ހަރުކަށި ފިޔަވަޅު އެޅުމުގެ މަސައްކަތް ޓީމުން ކުރަމުންދާ ކަމަށް އޭނާ ވަނީ ބުނެފައެވެ. އަދި މިއީ އާޔޫޝް ކުރާނެ ކަންތައްތަކެއް ނޫން ކަމަށް ވެސް އަރްޕިތާ ވަނީ ބުނެފައެވެ.
މިއީ ބޮލީވުޑް ސެލްބްރިރިޓީއެއްގެ ޓްވިޓާ އެކައުންޓް ހެކް ކުރި ފުރަތަމަ ފަހަރެއް ނޫނެވެ. މިދިޔަ މަހު ބޮލީވުޑްގެ ތަރި ޝާހިދު ކަޕޫރުގެ ވެސް ޓްވިޓާ އެކައިންޓާއި އިންސްޓަގްރާމް އެކައުންޓް ވަނީ ހެކް ކޮށްފައެވެ. ނަމަވެސް އޭނާގެ އެކައުންޓްތައް ގަޑިއެއްހާއިރު ތެރޭގައި ވަނީ ރީސްޓޯރ ކޮށްފައެވެ. އަދި ޝާހިދު ވަނީ އޭނާގެ ފޭނުންނަށް އިންސްޓަގްރާމް ސްޓޯރީގައި ޝުކުރު އަދާކޮށްފައެވެ.
މީގެ އިތުރުންވެސް ކްރިތީ ސެނޯން އާއި އަބީޝެކް ބަޗަން އަދި އަނޫޕަމް ކޭރް ގެ އެކަންއުންޓް ވެސް ކުރިން ވަނީ ހެކް ކޮށްފައެވެ.
އާޔޫޝް ޝަރްމާ ބޮލީވުޑަށް ތަޢާރަފް ވެގެން ގޮސްފައިވަނީ "ލަވްޔާތްރީ" އިންނެވެ. މި ފިލްމަކީ ވަރީނާ ހުސައިން ވެސް ބޮލީވުޑަށް ތަޢާރަފް ވެގެން ދިޔަ ފިލްމެވެ. އަންހިރާޖް މިނަވާލާ ޑައިރެކްޓް ކޮށްފައިވާ މި ފިލްމް ޕްރޮޑިއުސް ކޮށްފައިވަނީ އާޔުޝްގެ ޅިޔަނު ސަލްމާން ޚާން އެވެ.
