ދިރާގު ދިވެހި ޕްރިމިއާ ލީގުގައި އާދިއްތަ ދުވަހު ހަވީރު ކުޅުނު މެޗުން ދެ ވަނަ ހާފުގެ ލަނޑުތަކާ އެކު ތ. ތިމަރަފުށި އަތުން މާޒިޔާ އިން އުނދަގޫ މޮޅާއިއެކު ހަރުފަތެއް ކުރިއަށް ޖެހިލައިފިއެވެ.

ތ. ތިމަރަފުށި އަތުން 2-0 އިން ލިބުނު މޮޅާއެކު ލީގުގެ ހަތަރު ވަނައިގައި އޮތް މާޒިޔާ ވަނީ ލީގުގެ ތިން ވަނައިގައި އޮތް ނިއު ރޭޑިއަންޓާ ޕޮއިންޓުގެ ގޮތުން އެއްވަރުކޮށްފަ އެވެ.

ނިއު އަށް ހަ މެޗުން 13 ޕޮއިންޓް ލިބިފައިވާއިރު، މާޒިޔާ އިން 13 ޕޮއިންޓް ހަމަކުރީ ހަތް މެޗުންނެވެ. މި މެޗަށް ނުކުތްއިރު މާޒިޔާގެ އިސްމާއިލް އީސާ (މެސީ) ވަނީ ސަސްޕެންޑްވެފަ އެވެ. އޭނާ ސަސްޕެންޑްވީ އެންމެ ފަހުން ގްރީން ސްޓްރީޓްސް އަތުން މާޒިޔާ މޮޅުވި މެޗުގައި ދެއްކި ރަތް ކާޑުގެ ސަބަބުންނެވެ.

މާޒިޔާ އަށް ލީޑުނަގައިދޭން މެޗުގެ 23 ވަނަ މިނިޓްގައި ކެޕްޓަން އަސަދުﷲ އަބްދުﷲ ވަނީ ރަނގަޅު ހަމަލާއެއް ފޮނުވާލައިފަ އެވެ.

ދެ ވަނަ ހާފް ފަށައިގެން ލަނޑު ޖަހާނެ ފުރަތަމަ ދެ ފުރުސަތު ތަނަވަސްކުރީ ތިމަރަފުށިންނެވެ. އެ ޓީމުގެ ފޯވާޑް ސަމާހު ޝަރީފް އާއި ބިދޭސީ ކުޅުންތެރިއާ ފްރަންކޮއިސް ޖެހި ބޯޅަތައް މާޒިޔާ ޑިފެންޑަރުން ވަނީ ބްލޮކްކޮށްފަ އެވެ.

މާޒިޔާ އިން ލީޑުނެގީ މެޗުގެ 67 ވަނަ މިނިޓްގަ އެވެ. މާޒިޔާގެ އަލީ ޝާމިސް (ތޮއްޕޭ) ފޮނުވާލި ބޯޅަ ގޯލަށް ވަނީ ތިމަރަފުށީގެ ބިދޭސީ ޑިފެންޑަރު ޓޫންޑޭ ފައިގައި ޖެހިފަ އެވެ. ދެވަނަ ލަނޑު މެޗުގެ 80 ވަނަ މިނިޓްގައި ކާމިޔާބުކޮށްދިނީ ސްޓެވާޓެވެ.

މާޒިޔާގެ ކޯޗު އިސްމާއިލް މަހަފޫޒް (އިންމަ) ބުނީ މި މެޗުގައި ދިމާވި އެންމެ ބޮޑު މައްސަލަ އަކީ ކުޅުންތެރިން މެޗު ފަސޭހަކޮށްލުން ކަމަށެވެ.

ތިމަރަފުށީގެ އެސިސްޓަންޓް ކޯޗު އަހުމަދު ނަދީމް ބުނީ ޓީމުގެ ހާލަތު ބަދަލުވި ވަރަކަށް ކުޅުން ރަނގަޅުވެގެންދާނެ ކަމަށެވެ.