ވޯޓު އޮޅުވާލި ކަމަށް ބުނެ އަޑު އުފުލާ މީހުންނާ ދެކޮޅަށް ދައުވާ ކުރަން އީސީން ނިންމައިފި
އެ ވާހަކަތައް ގެނެސްދޭ ޗެނަލްތަކުގެ މައްސަލަ ބްރޯޑްކޮމަށް
ޮޕީޕީއެމްގެ އޮފީސް ކުރިމަތީގައި ބާއްވާ މުޒާހަރާގެ ތެރެއިން
ރިޔާސީ އިންތިހާބުގެ ވޯޓު އޮޅުވާލި ކަމަށް ބުނެ އަޑު އުފުލާ މީހުންނާ ދެކޮޅަށް ދައުވާކޮށް، އެ ވާހަކަތައް ގެނެސްދޭ ޗެނަލްތަކާމެދު ފިޔަވަޅު އަޅަން ކަމާބެހޭ ފަރާތްތަކަށް ހުށަހަޅަން އިލެކްޝަންސް ކޮމިޝަނުން ނިންމައިފިއެވެ.
އެ ގޮތަށް ނިންމާފައި ވަނީ އިލެކްޝަންސް ކޮމިޝަންގެ ހަތަރު މެމްބަރަކު ރާއްޖެއިން ބޭރުގައި ތިއްބަވައިގެން، ވީޑީއޯ ކޮންފަރެންސް މެދުވެރިކޮށް އާދީއްތަ ދުވަހު ބޭއްވި އެ ކޮމިޝަންގެ މެމްބަރުންގެ ބައްދަލުވުމެއްގައެވެ.
އެ ބައްދަލުވުމާ ގުޅޭ ގޮތުން އެ ކޮމިޝަންގެ ރައީސް އަހުމަދު ޝަރީފު "ރާއްޖެއެމްވީ"އަށް ވިދާޅުވީ އިންތިހާބުގެ ވޯޓު އޮޅުވާލި ކަމަށް ބުނެ، ވާހަކަ ދައްކަމުންދާ ފަރާތްތަކާ ދެކޮޅަށް އެ ކޮމިޝަނުން ދައުވާ ކުރަން ނިންމާފައިވާ ކަމަށެވެ. އަދި އެ ވާހަކަތައް ގެނެސްދޭ ޗެނަލްތަކާ މެދު ވެސް ފިޔަވަޅު އަޅައި ދިނުމަށް ބްރޯޑްކާސްޓިން ކޮމިޝަން (ބްރޯޑްކޮމް) އަށް މައްސަލަ ހުށަހަޅަން ނިންމާފައިވާ ކަމަށް ޝަރީފު ވިދާޅުވިއެވެ.
އޭނާ ވިދާޅުވީ އީސީއާ ދެކޮޅަށް އަޑުއުފުލައި ދޮގު ތުހުމަތުތަކެއް ކުރަމުން ދަނީ ޕީޕީއެމްގެ އޮފީސް ކުރިމަތީގައި ކަމަށްވާތީ، އެ މުޒާހަރާތަކަކީ ޕީޕީއެމުން އިންތިޒާމުކޮށް ކުރިއަށް ގެންދާ މުޒާހަރާތަކެއްތޯ ބެލުމަށް އެ ޕާޓީއަށް ސިޓީ ފޮނުވާފައިވާ ކަމަށެވެ.
ރިޔާސީ އިންތިހާބުގެ ނާކާމިޔާބީ ރައީސް އަބްދުﷲ ޔާމީން ގަބޫލުފުޅު ކުރެއްވުމަށް ފަހު، އިންތިހާބުގެ ނަތީޖާއާ ދެކޮޅަށް ސިލްސިލާ މުޒާހަރާތަކެއް ފެށުމަށް ގޮވާލެއްވީ ވެސް ރައީސް ޔާމީނެވެ. އެގޮތުން ކޮންމެ ދުވަހެއްގެ ރޭ ޕީޕީއެމްގެ އޮފީސް ކުރިމަތީގައި ކުރާ މުޒާހަރާތަކުގައި އީސީގެ މެމްބަރުންގެ ބޮލުގައި އިލްޒާމުތަކެއް އަޅުވައި ބޭއަދަބީ ބަސްތަކެއް އެބޭފުޅުންނަށް ދަނީ ރައްދު ކުރަމުންނެވެ.
އެ މެމްބަރުންގެ އަބުރަށް އަރައިގަންނަ ވާހަކަތައް މުޒާހަރާގައި ދައްކާއިރު، އެ ވާހަކަތައް ބައެއް ޗެނަލްތަކުން ލައިވްކުރެ އެވެ.
