އަލްޝަބާބުގެ ފައުންޑަރ މެމްބަރަށް އިންތިޚާބުގައި ވާދަނުކުރެވޭނެ: ސޯމާލިއާ ސަރުކާރު
އޭނާ ވަނީ އަލްޝަބާބުން ވަކިވެ، އެހެން ޖަމާޢަތެއް އުފައްދާފައި
އިންތިޚާބުގައި ވާދަކުރުމުގެ ޝައުޤުވެރިކަން ފާޅުކުރި މުޚްތާރް ރޯބޯ
ސޯމާލިއާގެ ސައުތު ވެސްޓް ސްޓޭޓްގެ ވެރިކަމަށް ވާދަކުރުމުގެ ޝައުޤުވެރިކަން އަލްޝަބާބުގެ އެއް ފައުންޑަރ މެމްބަރުކަމަށްވާ މުޚްތާރް ރޯބޯ ފާޅުކުރުމުން، އޭނާއަށް އިންތިޚާބުގައި ވާދަނުކުރެވޭނެކަމަށް ސޯމާލިއާގެ ސަރުކާރުން ބުނެފިއެވެ.
އަލްޝަބާބަކީ ސޯމާލިއާގެ އިތުރުން އިރުމަތީ އަދި އުތުރު އެފްރިކާގެ ބައެއް ސަރަހައްދުތަކުގައި ޙަރަކާތްތެރިވާ ދީނީ ގޮތުން ހައްދުފަހަނައަޅާފައިވާ ހަނގުރާމަވެރި ޖަމާޢަތެކެވެ. ރޯބޯ އަކީ އެޖަމާޢަތް އުފެއްދުމުގައި އިސްކޮށް އުޅުނު އެކަކުނަމަވެސް، ޚިޔާލުތަފާތުންވުން ތަކާއިއެކު 2012 ވަނަ އަހަރު އޭނާ ވަނީ އެޖަމާޢަތް ދޫކޮށް، ހަނގުރާމަވެރި އެހެން ޖަމާޢަތެއް އުފައްދާފައެވެ. އަދި އޭނާ އަލަށް އުފެއްދި ޖަމާޢަތާއި އަލްޝަބާބާއި ދެމެދު ކުރިމަތިލުންތައް ހިނގާފައިވެއެވެ.
ރޯބޯއަކީ 2000 ވަނަ އަހަރު އަލްޤައިދާއާއިއެކު ތަމްރީން ހެދި މީހެކެވެ. އޭނާ ހައްޔަރުކުރަން ބޭނުންވާ މައުލޫމާތު ފޯރުކޮށްދިން މީހަކަށް 5 މިލިއަން ޑޮލަރުގެ އިނާމެއް ދޭން އެމެރިކާގެ ޚާރިޖީ ވުޒާރާއިން އިއުލާންކުރިނަމަވެސް، އޭނާ ސޯމާލިއާ ސަރުކާރާއިއެކު ސުލްހައިގެ މަޝްވަރާތައް ފެށުމުން މިދިޔަ އަހަރުގެ ޖޫން މަހު އޭނާ ހޯދުމުގެ މަސައްކަތް އެމެރިކާ ސިފައިން ވަނީ ހުއްޓާލާފައެވެ.
ސައުތު ވެސްޓް ސްޓޭޓްގެ ވެރިކަން ލިބިއްޖެނަމަ ސޯމާލިއާގެ މައި ސަރުކާރާއިއެކު އޮންނަ ގުޅުން ބަދަހިކުރާނެކަމަށް ރޯބޯ ވަނީ ކުރިން ބުނެފައެވެ. އެހެން ނަމަވެސް އޭނާއާއި ދެކޮޅަށް އަޅާފައިވާ ފިޔަވަޅުތަކުގެ ސަބަބުން މިފަހަރުގެ އިންތިޚާބުގައި އޭނާއަށް ވާދަނުކުރެވޭނެކަމަށް ސޯމާލިއާގެ މައި ސަރުކާރުން ވަނީ ބުނެފައެވެ.
