އިންޓަޕޯލްގެ ވެރިޔާ ގެއްލިގެން ހޯދަނީ!
5 އޮކްޓޯބަރު 2018 | ހުކުރު 17:41އޭނާ އަކީ ޗައިނާގެ ކުރީގެ ޑެޕިއުޓީ މިނިސްޓަރ ފޮރ ޕަބްލިކް ސެކިއުރިޓީ
އިންޓަޕޯލްގެ ރައީސް މެންގް ހޮންގްވެއި
ބައިނަލްއަޤްވާމީ ފުލުހުންގެ އިދާރާ، އިންޓަޕޯލްގެ ރައީސް މެންގް ހޮންގްވެއި ގެއްލިގެން ހޯދަމުން އެބަދެއެވެ.
ހޮންގްވެއި އެންމެ ފަހުން ފެނިފައިވަނީ މީގެ ހަފްތާއެއް ކުރިން ފްރާންސްގެ ލިއޯންގައި ހުންނަ އިންޓަޕޯލްގެ މައި އިދާރާއިން، އަމިއްލަފުޅު ޤައުމު ޗައިނާއަށް ވަޑައިގަތުމަށް ނިކުންނެވި ތަނުންނެވެ. އޭގެ ފަހުން އޭނާގެ ޚަބަރެއް ނުވެގެން އޭނާގެ އަނބިކަނބަލުން ފަރަންސޭސީ ފުލުހުންނަށް ރިޕޯޓްކުރުމުން އޭނާ ހޯދުމުގެ މަސައްކަތް ފަރަންސޭސީ ވިލާތުން ދަނީ ކުރަމުންނެވެ.
އަނެއްކޮޅުން ހޮންކޮންގުގެ ނޫހެއް ކަމަށްވާ ސައުތު ޗައިނާ މޯނިންގ ޕޯސްޓުން މަސްދަރުތަކާއި ޙަވާލާދީ ބުނެފައިވަނީ ހޮންގްވެއި ޗައިނާއަށް ވަޑައިގަތްތަކުން ޗައިނާގެ ކަމާއި ބެހޭ ފަރާތްތަކުން އޭނާއާއި ސުވާލު ކުރުމަށް އޭނާ ހިފަހައްޓާފައިވާކަމަށެވެ. އެހެންނަމަވެސް އޭނާ ހައްޔަރުކުރިކަމެއް ޗައިނާއިން ރަސްމީކޮށް ހާމަކޮށްފައެއް ނުވެއެވެ. އަދި އޭނާ ހިފަހައްޓާފައިވަނީ ކޮން އިދާރާއަކުން ކަމެއް ސައުތު ޗައިނާ މޯނިންގ ޕޯސްޓުންވެސް ހާމަކޮށްފައެއް ނުވެއެވެ.
ހޮންގްވެއި އަކީ ޗައިނާގެ ކޮމިއުނިސްޓް ޕާޓީގެ އިސް މެމްބަރެކެވެ. އަދި އިންޓަޕޯލްގެ ރައީސްކަމަށް އިންތިޚާބުވުމުގެ ކުރިން އޭނާ ހުންނެވީ ޗައިނާގެ ޕަބްލިކް ސެކިއުރިޓީގެ ޑެޕިއުޓީ މިނިސްޓަރަކަށެވެ. އަދި ފުލުހުންގެ ޚިދުމަތުގައި އޭނާ އުުޅުއްވާތާ 40 އަހަރު ވަނީ ވެފައެވެ.
އޭނާ އިންޓަޕޯލްގެ ރައީސްކަމަށް އިންތިޚާބުކޮށްފައިވަނީ 2016 ވަނަ އަހަރުގެ ނޮވެމްބަރު މަހުއެވެ. އަދި އޭނާގެ ދައުރު ހަމަވާނީ 2020 ވަނަ އަހަރުއެވެ.
ހޮންގްވެއި އިންޓަޕޯލްގެ ރައީސްކަމަށް އިންތިޚާބުވުމުން އިންސާނީ ހައްޤުތަކަށް މަސައްކަތްކުރާ ފަރާތްތަކުން ވަނީ އެކަމަށް ފާޑުކިޔާފައެވެ. އެގޮތުން ހޮންގްވެއި އިންޓަޕޯލް މެދުވެރިކޮށް، ޗައިނާ ސަރުކާރުން އިންސާނީ ހައްޤުތަކަށް އަރައިގަތުމަށް ކުރާ މަސައްކަތްތަކަށް އޭނާ އެއްބާރުލުން ދެއްވާނެކަމަށް ޖަމްއިއްޔާތަކުން ބުންޏެވެ.
އިންޓަޕޯލްގެ ރައީސް 'ގެއްލިފައި' ވީނަމަވެސް، އެޖަމްއިއްޔާ ހިންގުމުގެ މަސްއޫލިއްޔަތު ތަކާއި ހަވާލުވެ ހުންނަވަނީ އެޖަމްއިއްޔާގެ ސެކްރެޓަރީ ޖެނެރަލް ކަމުން ޖަމްއިއްޔާ ހިންގުމަށް މާބޮޑު ބުރުލެއް އަރާފައެއް ނުވެއެވެ. އިންޓަޕޯލްގެ ރައީސްގެ މަސްއޫލިއްޔަތަކީ އެގްޒެކެޓިވް ކޮމިޓީ ހިންގެވުމެވެ. އަދި މިމައްސަލައިގައި އިންޓަޕޯލުން ބުނީ ފަރަންސޭސީވިލާތާއި ޗައިނާގެ އިދާރާތަކުން އެމައްސަލަ ބަލަމުން ދާނެކަމަށެވެ.
