ހޮޓެލް އޭޝިއާ އެގްޒިބިޝަންގެ މީޑިއާ ޕާޓްނަރަކަށް ޓޭސްޓް މެގަޒިން!

ހޮޓެލް އޭޝިއާ އެގްޒިބިޝަންގެ މީޑިއާ ޕާޓްނަރަކަށް ޓޭސްޓް މެގަޒިން ހަމަޖައްސައިފިއެވެ.

ހޮޓެލް އޭޝިއާ އެގްޒިބިޝަންގެ މީޑިއާ ޕާޓްނަރަކަށް ޓޭސްޓް މެގަޒިން ހަމަޖައްސައި ދެ ފަރާތުގެ ދެމެދުގައި ސޮއިކުރުމުގެ ރަސްމިއްޔާތު ބާއްވާފައި ވަނީ ބުރާސްފަތި ދުވަހު ސަލްސާ ރޯޔަލް ރެސްޓޯރެންޓްގައެވެ. އިވެންޓް އިންތިޒާމުކުރާ މޯލްޑިވްސް އެގްޒިބިޝަން އެންޑް ކޮންފަރެންސް ސާރވިސް ޕްރައިވެޑް ލިމިޓެޑްގެ ފަރާތުން އެއްބަސްވުމުގައި އެ ކުންފުނީގެ ޑިރެކްޓަރ އަހްމަދު ޖާމިޒް ސޮއިކުރައްވާފައިވާއިރު ޓޭސްޓް މެގަޒިންގެ ފަރާތުން ސޮއިކުރެއްވީ އެސިސްޓަންޓް މެނޭޖަރ ނަޝްވާ ސައީދުއެވެ.

މި އެގްޒިބިޝަން އޮންނާނީ މި މަހު 9 ވަނަ ދުވަހުން ފެށިގެން 12 ވަނަ ދުވަހަށް ދަރުބާރުގޭގައެވެ.

މި އަހަރުގެ ހޮޓެލް އޭޝިއާ އެގްޒިބިޝަންގައި 46 ޤައުމަކުން 250 ކުންފުންޏަކުން ދެ ހާސް ބްރޭންޑް ދައްކާލާނެއެވެ.

މިދިޔަ އަހަރު ހޮޓެލް އޭޝިއާ އެގްޒިބިޝަން ބާއްވާފައި ވަނީ ސެޕްޓެމްބަރ 18 އިން ފެށިގެން 20 ވަނަ ދުވަހުގެ ނިޔަލަށެވެ. އެ ފަހަރުގެ އެގްޒިބިޝަންގައި 175 އަށް ގިނަ ކުންފުނިތަކުން ބައިވެރިވިއެވެ. އެގްޒިބިޝަންގެ މެއިން ސްޕޮންސަރަކީ ބެސްޓްބައި މޯލްޑިވްސް (ބީބީއެމް) އެވެ.

ހޮޓެލް އޭޝިއާއަކީ އަހަރީކޮށް ބާއްވާ އަދި ހޮޓެލްތަކާއި ރިސޯޓްތަކުން ވިޔަފާރި ކުރާ ފޯރަމެއް ގޮތުގައި ވަނީ ބަލައިގަނެވިފައެވެ.

ދިވެހިރާއްޖެއަކީ އެތައް މިލިއަން ޑޮލަރެއް އިންވެސްޓްކޮށް ހޮސްޕިޓާލިޓީ ސާމާނާއި، ކާބޯތަކެތި އެތެރެކުރާ ބަޔަކަށްވުމާއި އަދި މިފަދަ ބާރު ދުވެއްޔެއްގައި ކުރިއަރަމުން އަންނަ މާކެޓަކަށް ބައިނަލްއަގްވާމީ ގަޔާވުމެއް އޮންނާތީވެ، މި މައުރަޒުގައި ވަރަށް ނުފޫޒްގަދަ ފަރާތްތައް ދަނީ ބައިވެރިވަމުންނެވެ. ހޮޓެލް އޭޝިއާ އަކީ ހަމައެކަނި ސަރަހަށްދަށް ނިސްބަތްކޮށް ބޭއްވޭ އިވެންޓެއްނޫނެވެ. މިއީ ބައިނަލްއަގްވާމީ ގޮތުން މަސަތްކަތްތައް ތައާރަފު ކުރާ ވިޔަފާރީގެ މައިދާނެކެވެ.

މިއީ ހޮޓެލް އޭޝިއާ އެގްޒިބިޝަން ބޭއްވުމަށް ހަމަޖެހިފައިވާ 14 ވަނަ ފަހަރެވެ.