ހައްޔަރުކޮށްފައި ތިބި އެސްއޯ ކޮމާންޑަރުން ދޫކޮށްލައިފި
4 އޮކްޓޯބަރު 2018 | ބުރާސްފަތި 12:001 ފެބްރުއަރީގެ އަމުރުގެ ފަހުން ގިނަ އަދަދެއްގެ ފުލުހުން ހައްޔަރުކުރި
މިނިވަންވުމަށް ފަހު އެސްއޯ ފުލުހުންގެ ކުރީގެ އިސް ވެރިން ކްރިމިނަލް ކޯޓުގެ ބޭރުގައި
1 ފެބްރުއަރީގެ ކޯޓު އަމުރާއި ގުޅިގެން ހިނގި ކަންތައްތަކުގެ ތެރޭގައި ހައްޔަރު ކުރި ފުލުހުންގެ ސްޕެޝަލިސްޓް އޮޕަރޭޝަންގެ ކުރީގެ ދެ ކޮމާންޑަރުން މިނިވަން ކޮށްފިއެވެ.
ކްރިމިނަލް ކޯޓުން މިއަދު މިނިވަން ކުރީ އެސްއޯގެ ކުރީގެ ކޮމާންޑަރު އިންސްޕެކްޓަރ އޮފް ޕޮލިސް ސައިފު ހުސައިން އާއި، ސްޓޭޝަން އިންސްޕެކްޓަރ ފާއިޒު މުހައްމަދެވެ.
ސައިފް އާއި ފާއިޒްގެ އިތުރުން އެހެން ބައެއް ފުލުހުން ހައްޔަރު ކުރީ ސުޕްރީމް ކޯޓުގެ އަމުރަށް ފަހު، އިތުރު ބަޔަކާއި ބައިވެރިވެގެން، ޤާނޫނީ ގޮތުން އުފެދިފައިވާ ސަރުކާރު ޤާނޫނާއި ޚިލާފަށް ބަދަލުކުރަން މަސައްކަތްކޮށް، ދިވެހިރާއްޖޭގެ ސަލާމަތީ ޚިދުމަތްތަކާއި ދެކޮޅަށް ނިކުމެ، ޣައިރު ޤާނޫނީ އެއްވުންތަކުގެ ތެރެއިން އަމަން ބަލަހައްޓަން ތިބި ފުލުހުންނާއި މެދު މާރާމާރީ ހިންގައި ރައްޔިތުންގެ މެދުގައި ސަލާމަތީ ބާރުތަކާ މެދު އިތުބާރު ގެއްލުވާލަން އުޅުނު ކަމަށް ބުނެއެވެ. އެފުލުހުން ވަނީ ފުލުހުންގެ ވަޒީފާއިން ވެސް ވަކިކޮށްފައެވެ.
މާފުށީ ޖަލުގައި ބަންދުކޮށްފައި ބޭތިއްބުމަށް ފަހު އެސްއޯ ފުލުހުން ވަނީ ގޭ ބަންދަށް ބަދަލުކޮށް، ގޭބަންދުގައި ތިއްބައި، ބަންދުގެ މުއްދަތު އިތުރު ކޮށްފައެވެ.
އެސްއޯ ފުލުހުން ދޫކޮށްލާފައި މިވަނީ 1 ފެބްރުއަރީގެ މައްސަލަތަކަށް ފަހު ސަރުކާރުން ހައްޔަރުކުރި ގިނަ ބަޔަކު ދޫކުރަމުންދާ ދަނޑިވަޅެއްގައެވެ.
