އިންތިޚާބުގެ ކާމިޔާބީ ފާހަގަކުރުމުގައި އިބޫއާއި ފައިސަލް ރޭވެސް ބައިވެރިވެވަޑައިގެންފި
3 އޮކްޓޯބަރު 2018 | ބުދަ 02:06އިބޫ އާއި ފައިސަލްވަނީ ގިނަ ބަޔަކާއި މި ހަރަކާތުގައިވެސް ބައްދަލުކުރައްވާފައި
މާފޮޅޭ ޖަގަހައިގައި ބޭއްވި އުފާފާޅުކުރުމުގެ ހަރަކާތްތަކުގެ ތެރެއިން
މިދިޔަ ސެޕްޓެމްބަރު މަހުގެ 23 ވަނަ ދުވަހު ބޭއްވި ރިޔާސީ އިންތިޚާބު، އިންތިޚާބީ ރައީސް އިބްރާހިމް މުހައްމަދު ސޯލިޙް (އިބޫ) އާއި އެމަނިކުފާނުގެ ނައިބު ފައިސަލް ނަސީމް ކާމިޔާބުކުރެއްވުމުގެ އުފަލުގައި މާލޭގައި ބާއްވަމުން އަންނަ ސިލްސިލާ އުފާފާޅުކުރުމުގެ ހަރަކާތްތަކުގައި އަންގާރަ ދުވަހުގެ ރޭވެސް އެދެބޭފުޅުން ބައިވެރިވެވަޑައިގެންފިއެވެ.
އަންގާރަ ދުވަހުގެ ރޭ އުފާ ފާޅުކުރުމުގެ ހަރަކާތްތައް ކުރިއަށް ދިޔައީ މާފަންނު ދެކުނު މާފޮޅޭ ޖަގަހަ ސަރަހައްދުގައި، އިއްޒުއްދީން މަގުގައެވެ. މި ހަރަކާތަށް އިބޫ އާއި ފައިސަލް ވަޑައިގަތުމުން އެ ދެ ބޭފުޅުންނަށްވެސް ހޫނު މަރުހަބާއެއް ދަންނަވާފައިވެއެވެ. ބޮޑުބެރުގެ ހަރަކާތްތަކާއިއެކު ކުރިއަށް ދިޔަ މިހަރަކާތުގެ ތެރެއިން އިންތިޚާބީ ރައީސް އިބޫ އާއި އިންތިޚާބީ ނައިބު ރައީސް ފައިސަލް ވަނީ އެސަރަހައްދުގެ ގިނަ އަދަދެއްގެ އާއްމުންނާއި ބައްދަލުކުރައްވައި، ގިނަ ބޭފުޅުންނާއި އެކު ފޮޓޯ ނަންގަވާފައެވެ.
އުފާ ފާޅުކުރުމުގެ ހަރަކާތަށް އެއްވެ ތިބި މީހުންނާއި އިބޫއާއި ފައިސަލް ސަލާމް ކުރައްވަނީ
ހޯމަ ދުވަހުގެ ރޭ ވެސް މިފަދަ ހަރަކާތެއް ޗާންދަނީ މަގުގައި ކުރިއަށް ދިޔައެވެ.
އިއްޒުއްދީން މަގުގައި އިންތިޚާބުގެ ކާމިޔާބީ ފާހަގަކުރުމަށް ހިންގި ހަރަކާތެއްގައި އިބޫއާއި ފައިސަލް ބައިވެރިވެވަޑައިގެންނެވިއިރު، ހަމައެވަގުތު އިންތިޚާބުގެ ނަތީޖާ ޤަބޫލުނުކޮށް، އިންތިޚާބުން ބަލިވެވަޑައިގެންނެވި ރައީސް އަބްދުﷲ ޔާމީންގެ ގޮވާލުމަށް އެއްވި ވިއްސަކަށް މީހުން ހެންވޭރުގައި ބޮޑުތަކުރުފާނު މަގުގައި ހުންނަ ޕީޕީއެމްގެ އޮފީސް ދޮރުމަތީގައި މުޒާހަރާކުރަމުން ދިޔައެވެ.
ގުޅިފައިވާ ޕާޓީތަކުގެ ކެންޑިޑޭޓްގެ ގޮތުގައި ނިކުމެވަޑައިގެންނެވި އިބޫ ވަނީ އިންތިޚާބުގެ 58 އިންސައްތަ ކާމިޔާބުކުރައްވާފައެވެ. ރައީސް ޔާމީނަށް ލިބިވަޑައިގަތީ 42 އިންސައްތައެވެ.
