ގޯއެއަރގެ ޖީއެސްއޭ އޭޖެންޓަކަށް ވޮޔޭޖަސް މޯލްޑިވްސް ހަމަޖައްސައިފި

އިންޑިއާގެ ބަޖެޓް އެއަރލައިން ގޯއެއަރގެ ޖީއެސްއޭ އޭޖެންޓަކަށް ވޮޔޭޖަސް މޯލްޑިވްސް ހަމަޖައްސައިފިއެވެ.

ގޯއެ އަރއަކީ އިންޑިއާގެ މުމްބައިގައި ޤާއިމުކޮށް ހިންގާ އެއަރލައިނަކަށް ވާއިރު އެއީ އިންޑިއާގައި ފަސް ވަނަ އަށް އެންމެ ބޮޑު އެއަރލައިނެވެ. އެ އެއަރލައިން ދަތުރުތައް ކުރަނީ އިކޮނޮމީ އަދި ބިޒްނަސް ކުލާހުގެ އެއަރބަސް A320 ގެ ފްލީޓަކުންނެވެ.

މުމްބާއި އިން މާލެ އަށް އަދި މާލެ އިން މުމްބާއީ އަށް ހަފްތާއަކު ތިން ފްލައިޓް ގޯ އެއަރ އިން އޮޕަރޭޓް ކުރުމަށް ވަނީ ހަމަޖެހިފައެވެ. މުމްބާއީ ދެކޮޅު ދަތުރުގެ އަގުތައް ފެށޭނީ 242 ޑޮލަރުންނެވެ. އަދި ގޯ އެއަރގެ ފްލައިޓްތައް ދިއްލީ އިން މާލެ އަށް އަދި މާލެ އިން ދިއްލީ އަށް ހަފްތާއަކު ދެ ދަތުރު ކުރުމަށް ހަމަޖެހިފައިވާ އިރު ޓިކެޓްގެ އަގަކީ 274 ޑޮލަރެވެ.

ގޯ އެއަރ އިން ދިވެހިރާއްޖެއަށް ދަތުރުތައް ފެށުން ވެގެންދާނީ އިންޑިއާގެ އެތެރޭގެ އުދުހުންތައް ކާމިޔާބުކަމާ އެކު އޮޕަރޭޓް ކުރާތާ 10 އަހަރަށް ފަހު ބައިނަލްއަޤްވާމީ މަންޒިލަކަށް ދަތުރުތައް ކުރަން ފަށާ ފުރަތަމަ ފަހަރު ކަމުގައެވެ. ގޯ އެއަރގެ މަޤްސަދަކީ ޑޮމެސްޓިކް ދަތުރުތަކުގެ ކާމިޔާބީ ބައިނަލްއަޤްވާމީ ދަތުރުތަކުގައި ވެސް ފުޅާ ކުރުމެވެ.

ފްލައިޓްތަކުގެ ބުކިން 3018877 ނަންބަރަށް ގުޅައިގެން ހެދޭނެ ކަމަށް ވޮޔޭޖަސް މޯލްޑިވްސް އިން ބުނެއެވެ.

ވޮޔޭޖަސް މޯލްޑިވްސްއަކީ 1980 ވަނަ އަހަރުން ފެށިގެން ޓްރެވަލް އާއި ޓުއަރ އޮޕަރޭޝަންގެ ދާއިރާގައި ހަރަކާތްތެރިވަމުން އަންނަ ކުންފުންޏެކެވެ.