މުލިއާ ގެއިން ބޮޑު ދެ ލޮރީގެ މުދާ ނެރޭ ވާހަކަ މީހަކު އަޅުގަނޑަށް ގުޅާފައި ބުނެފިއެވެ. އެއާ އެކު އެތަން ބަލާލުމުގެ ޝައުގުވެރިކަމުގައި އެތަނަށް ހިނގައްޖައީމެވެ. އޭރު، އަޅުގަނޑު ނޫނަސް ބައެއް އެހެން މީހުންވެސް އެ ހަބަރު ލިބިގެން އެތަނަށް ގޮސްތިއްބެވެ. ތަނަކީ މުލިއާގޭ ދޮރު މައްޗެވެ. ވަގުތަކީ އިރާ ކޮޅުގެ ވަގުތެވެ. އަޅުގަނޑަށް އެތަނަށް ދެވުނު އިރު ދެ ލޮރީވެސް އެތަނުން ނުކުމެއްޖެއެވެ. ރީނދޫ ބޯޑުޖަހާފައިވާ ބޮޑު ދެ ލޮރީ ފުރެންދެން މުދާ އަރުވާފައި ހުއްޓެވެ. އެކަމަކު ލޮރީ ތެރެއަށް އަރުވާފައި ހުރީ ކޮން އެއްޗެއް ކަމެއް ނޭނގެއެވެ. މުދާތަކުގެ މަތީގައި ސަތަރި އަޅައި ބަންދު ކޮށްފައި ހުރުމުން ބަލާލެވޭ ގޮތެއް ވެސް ނުވިއެވެ. އެކަމަކު އެހާ ވަރަށް ބަންދުކޮށްފައި ހުރުމުންނާއި މުލިއާގޭ ތެރެއިން ލޮރީލޮރީގައި މުދާ ނެރޭތީ އެއީ ކޮން އެއްޗެއްތޯ ބަލާލުމުގެ ޝައުގުވެރިކަން އިންތިހާއަށް ބޮޑު ވެއްޖެއެވެ. އެހެން ކަމުން އެ ތަނުގައި ތިބި މީހުންގެ ގާތަށް ޖެހިލައި ކުޑަކޮށް ސުވާލު ކޮށްލައިފީމެވެ. އެކަމަކު އެ މީހުންނަށް ވެސް އެނގެނީ އަޅުގަނޑަށް ވެސް އެނގޭ ވަރަށެވެ. ނަމަވެސް އޭގެތެރޭގައި ހުރި އެއްޗަކާ މެދު އެ ތަނުގައި ތިބި މީހުން އެ މީހަކަށް ފެންނަ ހިޔާލެއް ފާޅުކުރަމުން ދެއެވެ. ބައެއް މީހުން ކިޔަނީ ދެ ލޮރީ ފުރެންދެން ހުރީ ހައްޖު ކޯޓާ ކަމަށެވެ. އަރިސް މީހުންނަށް ބަހަ ބަހާފައި ބާކީ ވީ އެންމެ ދެ ލޮރީގެ ކޯޓާ ކަމަށެވެ. އަނެއް ބަޔަކު ކިޔަނީ އެއީ ކުދިން ހިތާނުކުރާ ކުރަފަތް ކަމަށެވެ. އެއީ ކަދުރު ކަމަށާއި، ހަނޑޫ ކަމަށް ވެސް ބައެއް މީހުން ކިޔާ އުޅެއެވެ. އެއީ މަސްދަޅޭ، ސްކޫލު ދަބަހޭ، ޕެނަޑޯލޭ، އާސަންދަ އޭ ކިޔާ މީހުންވެސް މަދެއް ނޫނެވެ. ބާކީ ތިބި މީހުން ކިޔަނީ އެއީ ވެކްސިން ކަމަށެވެ. އޭގެ ތެރެއިން މަދު ބަޔަކު އެއީ ދެކަނބަލުން ގެ އެނިވާސަރީ އަށް ބަންދު ކޮށްފައި ބާކީވި ޗޮކުލެޓު ތަކެކޭވެސް ކިޔައެވެ. އެތަނަށް އައި އެހެން މީހަކު ބުނީ އަދި މާގޯސް އެއްޗެކެވެ. އެއް ލޮރީގައި ހުރީ ރަލޭ، އަނެއް ލޮރީގައި ހުރީ ސިހުރު ހާހޫރަ ހަދަން ބޭނުކުރާ ސާމާނޭ އޭނާ ބުންޔެވެ. ކޮންމެ އަކަސް އޭގެތެރޭގައި ހުރި އެއްޗެއް ސާފުކޮށް އެނގޭ ގޮތް ނުވިޔަސް އެއީ ދައުލަތުގެ ބެލުމުގެ ދަށުގައި ހުރި ތަނަކުން ނެރޭ އެއްޗެހި ތަކެއް ކަން އެނގެއެވެ. ދެން ބަލަން ބޭނުންވީ އެއީ ކާކުގެ މުދާ ތަކެއްތޯ އެވެ. ބައެއް މީހުން ބުނަނީ އެއީ ޕީޕީއެމް ގެ އެއްޗެހި ކަމަށެވެ. އަނެއްބަޔަކު އެއީ ސަދަގާތު ފައުންޑޭޝަންގެ އެއްޗިއްސޭވެސް ކިޔައެވެ. މެޑަމްގެ މުދަލޭ، ކެމްޕެއިން އޮފީހުގެ ތަކެއްޗޭ، އިލެކްޝަންގެ ސާމާނޭ ކިޔާ މީހުންވެސް މަދެއް ނޫނެވެ. އެކި މީހުން އެކި ވާހަކަ ދައްކަ ދައްކާ ތިއްބާ ރަސްމީ ފަރާތަކުން ބުނާތީ އިވުނީ އެއީ ރައީސްގެ އަމިއްލަފުޅު ތަކެތި ކަމަށެވެ. އެކަމަކު އެއީ ތެދެއްނަމަ މިތަނުގައި ރައީސްގެ އަމިއްލަފުޅު ތަކެތި ހުންނަންވީ ކީއްވެގެން ހެއްޔެވެ. ހުއްޓަސް ފޮރުވައިގެން ނެރެންވީ ކީއްވެގެން ހެއްޔެވެ. ނެރުނަސް އެ މަސައްކަތުގައި ބިދޭސީން އުޅެންވީ ކީއްވެގެން ހެއްޔެވެ. މުލިޔާގެއިން ނެރުނު ދެ ލޮރީގައި ހުރީ ކޯންޗެއްހެއްޔެވެ؟