ރައްޔިތުން އެދޭ ގޮތަށް ކޯލިޝަނެއްގައި އޮވެގެން ސަރުކާރު ބަދަހި ކަމާއެކު ދަމަހައްޓާނެ ކަމަށް ގުޅިފައިވާ ޕާޓީތަކުން ބުނެފިއެވެ.

ގުޅިފައިވާ ޕާޓީތަކުން ހޯމަ ދުވަހުގެ ރޭ ބޭއްވި ޕްރެސް ކޮންފަރެންސެއްގައި އެމްޑީޕީގެ ޗެއަރޕާސަންގެ ނާއިބު އިދާރީ ޢަލީ ނިޔާޒް ވިދާޅުވީ ފެނިގެން މިދިޔައީ ގުޅިފައިވާ ޕާޓީތަކުން އެކަތިގަނޑެއްގެ ގޮތުގައި ކުރި ކެމްޕެއިންގެ ނަތީޖާ ކަމަށާއި ރޭވުންތެރިކަމާއެކު ޕާޓީތައް ގުޅިގެން ކުރި ކެމްޕެއިންގެ ވަރުގަދަކަން ކަމަށެވެ.

ނިޔާޒް ވިދާޅުވީ ބައެއް ތަންތަނަށް ވަކިވަކި ބަޔަކު ފޮނުވައިގެން ކެމްޕެއިން ކުރެވިފައި ހުންނާނެ ކަމަށާއި އެއީ އެތަނަކާ ގުޅޭ ބަޔަކު ފޮނުވައިގެން ކެމްޕެއިން ކުރުމަށް ކަމަށެވެ. އަދި ކެމްޕެއިން ކުރިއަށް ގެންދިޔައީ ވަކި އަމާޒުތަކެއް ކަނޑައަޅައިގެން ވަރަށް ރޭވުންތެރިކަމާ އެކުގައެވެ.

ނިޔާޒް ވިދާޅުވީ 187 ރަށަށް ކެމްޕެއިން ޓީމުތައް ދިއުމުން ރައްޔިތުން އެންމެ ބޮޑަށް އެދުނު ކަމަކީ އިންސާފް ޤާއިމް ކޮށްދިނުން ކަމަށާއި ގުޅިފައިވާ ޕާޓީތަކުގެ ސަރުކާރުގައި އެކަން ކުރައްވާނެ ކަމަށެވެ.

ޖުމްހޫރީ ޕާޓީގެ ނާއިބު ލީޑަރ ޑރ ހުސައިން ރަޝީދު ވިދާޅުވީ ރައްޔިތުން އެދޭގޮތަށް ސަރުކާރު ދަމަހައްޓާނެ ކަމަށާއި ވަކިވަކި ޕާޓީތަކެއް ކޯލިޝަންގައި ހިމެނޭއިރު ޚިޔާލް ތަފާތުވުން ހުންނާނެ ކަމަށެވެ. ނަމަވެސް ޚިޔާލު ތަފާތުވުންތައް ހައްލު ކުރުމަށްޓަކައި ގޮތްތަކެއް އޮތީ ރޭވިފައި ކަމަށެވެ.

އަދާލަތު ޕާޓީގެ ސިޔާސަތު ކޮމެޓީގެ މުޤައްރިރު އަދި އެޕާޓީގެ ކެމްޕެއިން މެނޭޖަރު އަހުމަދު ނުއުމާން ވިދާޅުވީ ޕާޓީތަކުގެ ގުޅުން ދަމަހައްޓަން އިންތިޚާބީ ރައީސް އިބްރާހީމް މުހައްމަދު ސޯލިހު އާއި ނާއިބު ރައީސް ފައިސަލް ނަސީމް ކުރެއްވި މަސައްކަތް ވަރަށް ކާމިޔާބު ކަމަށާއި ގުޅިފައިވާ ޕާޓީތަކުން ކުރަން ވައުދުވެފައިވާ ކަންކަން ވަރަށް އަވަހަށް ކުރަން ފަށާނެ ކަމަށެވެ.

ނޫމާން ވެސް ވިދާޅުވީ ޚިޔާލް ތަފާތުވުން ހުންނާނެ ކަމަށާއި ނަމަވެސް ޚިޔާލް ތަފާތު ވެއްޖެ ނަމަ ހަމައަކަށް އަޅުވާނެ ގޮތް ރާވާފައިވާ ކަމަށެވެ.

ރައީސް މައުމޫންގެ އެމްއާރުއެމް. ގެ ފަރާތުން މުހައްމަދު ފައިސަލް ވިދާޅުވީ އިބޫގެ ވެރިކަމަކަށް ދޭން ޖެހޭ ހުރިހާ އެއްބާރުލުމެއް ރައީސް މައުމޫންގެ ފަރާތުން ދެއްވާނެ ކަމަށާއި މުޖުތަމައުގައި ހަމަޖެހިގެން ދިރިއުޅެވޭނެ ގޮތެއް ހޯދުމަށް މަސައްކަތް ކުރައްވާނެ ކަމަށެވެ. އަދި އިސްލާމްދީން ރައްކާތެރި ކުރުމަށް ގުޅިފައިވާ ޕާޓީތަކުގެ ވެރިކަމެއްގައި އަބަދު ވެސް މަސައްކަތް ކުރާނެ ކަމަށެވެ.