ކުންފުނިތަކުން ނުހައްގުން ވަކިކުރި މުވައްޒަފުން ކިބައިން އެތަންތަނުގެ ވެރިން މާފަށް އެދެންޖެހޭ: ޝެއިހް ޒައިދު
ވަޒީފާއިން ވަކިކުރުމުގެ އިތުރުން ވެސް އެހެނިހެން ވަރަށް ބޮޑެތި އަނިޔާތައް ވަނީ ދީފައި
މަޝްހޫރު ދީނީ އިލްމުވެރިޔާ ޝެއިހް އަލީ ޒައިދު
ކުންފުނިތަކުން ނުހައްގުން ވަކިކުރި މުވައްޒަފުން ކިބައިން އެތަންތަނުގެ ވެރިން މާފަށް އެދެންޖެހޭ ކަމަށް މަޝްހޫރު ދީނީ އިލްމުވެރިޔާ ޝެއިހް އަލީ ޒައިދު ވިދާޅުވެއްޖެއެވެ.
ރިޔާސީ އިންތިޚާބު ކޯލިޝަނުން ކާމިޔާބު ކުރުމާއި ގުޅިގެން އިންތިޚާބީ ކެންޑިޑޭޓް އިބްރާހިމް މުހައްމަދު ސޯލިހު(އިބޫ) އާއި ރަނިންމޭޓް ފައިސަލް ނަސީމަށް މަރުހަބާ ދަންނަވާ ކުރެއްވި ޓުވީޓްތަކެއްގައި ޝެއިހް އަލީ ޒައިދު ވިދާޅުވީ ބައެއް ކުންފުނިތަކުގެ ވެރިން ވަރަށް ނާއިންސާފުން މުވައްޒަފުން ވަޒީފާއިން ވަކިކޮށްފައިވާ ކަމަށެވެ. އަދި ވިދާޅުވީ ވަޒީފާއިން ވަކިކުރުމުގެ އިތުރުން ވެސް އެހެނިހެން ވަރަށް ބޮޑެތި އަނިޔާތައް ދީފައިވާ ކަމަށެވެ.
އެހެންކަމުން އެތަންތަނުގެ ވެރިން ތައުބާވެ، އަނިޔާ ލިބުނު މުވައްޒަފުންގެ ކިބައިން މާފަށް އެދެން ޖެހޭ ކަމަށް ޝެއިހް ޒައިދު ވިދާޅުވިއެވެ. އަދި ގިޔާމަތް ދުވަހުން އެހައްގު ކެނޑޭނީ އޭރުން ކަމަށް ޝެއިހް ޒައިދު ވަނީ ވިދާޅުވެފައެވެ.
މީގެ އިތުރުން ޝެއިހް ޒައިދު ވިދާޅުވީ ކޯލިޝަންގެ ސަރުކާރުން ހެޔޮ ގޮތުގައި ގައުމައިގެން ކުރިއަށް ދިއުމަށް އެދޭ ކަމަށެވެ. އަދި އިސްލާމް ދީނުގެ އަމުރުތަކަށް ފުރިހަމައަށް ބޯލުމާއެކު އަމަލުކުރާނަމަ ހުންނާނީ އެންމެ ފުރިހަމައަށް ކަމަށް ޝެއިހް ޒައިދު ވިދާޅުވިއެވެ.
