މި މުޖުމަތަމައުގައި ދިމާވި އެންމެ ބޮޑު މައްސަލައަކީ މީހުންގެ އަބުރު ކަތިލުން: ރައީސް ޔާމީން
24 ސެޕްޓެމްބަރު 2018 | ހޯމަ 11:10މަސައްކަތްކުރީ ދިވެހިންނަށް އަބުރުވެރި ދިރިއުޅުމެއް ހޯދައިދެން
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް
މި މުޖުމަތަމައުގައި ދިމާވި އެންމެ ބޮޑު މައްސަލައަކީ އެއްވެސް ކަހަލަ އަސާސެއް ނެތި މީހުންގެ އަބުރު ކަތިލަމުން ދިޔަ މައްސަލަ ކަމަށް ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.
ރިޔާސީ އިންތިޚާބުގެ ބަލި ގަބޫލުކުރައްވައި ފުރަތަމަ ފަހަރަށް ގައުމާ މުޚާތަބު ކުރައްވާ ވިދާޅުވީ އެއްވެސް ކަހަލަ ތެދެއް ނެތި ހަގީގަތާ ހިލާފު ވާހަކަތައް ފެތުރި މައްސަލައަކީ މިހާތަނަށް ހިނގަމުން އައި އެންމެ ބޮޑު އެއް މައްސަލަ ކަމަށެވެ. ނަމަވެސް ވެރިކަމުގައި މިކަމަށް ހައްލު ގެނެވިފައިވާ ކަމަށް އުންމީދުކުރާ ކަމަށް ރައީސް ޔާމީން ވިދާޅުވިއެވެ.
"މިއީ ހަމަ ގައުމުގެ ކޮންމެ ރައްޔިތެއްގެ ހައްގެއް. މިކަންކަން ހައްލު ކުރެވޭތޯ އަޅުގަނޑު މަސައްކަތްތަކެއް ކުރިން. އަޅުގަނޑަކަށް ފާޑުކިޔުންތައް އެކަމުގައި ރައްދުވިޔަސް އިރާދަކުރެއްވިޔާ ގިނަ ބަޔަކު ގަބޫލުކުރާ ގޮތަށް މިހާރު އެކަންކަން އެވަނީ ތަރުތީބު ކުރެވިފައި،" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ކޮންމެ މީހެއްގެ އަބުރާއި، އިއްޒަތަކީ ވެސް ސަލާމަތުން ރައްކާތެރިކަމާ އެކު އޮންނަންވާނެ އެއްޗެއް ކަމަށާއި، އަބުރުވެރިކަން ދަމަހައްޓަން ޖެހޭ ކަމަށެވެ.
ރައީސް ޔާމީން ވިދާޅުވީ ވެރިކަމާއި ހަވާލުވި އިރު ގިނަ މައްސަލަތަކެއް ފެންމަތިވެފައިވާ ކަމަށާއި، މަސައްކަތްކުރީ ދިވެހިންނަށް އަބުރުވެރި ދިރިއުޅުމެއް ހޯދައިދެން ކަމަށެވެ. އަދި ގިނަ މައްސަލަތަކަށް ހައްލު ހޯދައިދެވިފައިވާ ކަމަށް އުންމީދުކުރާ ކަމަށް ރައީސް ޔާމީން ވިދާޅުވިއެވެ.
