ދިޔާނާގެ އިންޒާރު: ގާނޫނުގެ ކުރިމައްޗަށް ޝަރީފު ގެނައުމުގެ ހަކަތަ އެބަހުރި
ޓެބްލެޓަކުން ނަތީޖާ ނެރުމަށް ގާނޫނު ތަން ނުދޭ
ދިޔާނާ: ޝަރީފަށް ބަހުގެ ހަމަލާތަކެއް ރައްދު ކުރެއްވި
ވޯޓު ގަޑުބަޑުކޮށްލައިފިނަމަ، ގާނޫނޫގެ ކުރިމައްޗަށް އިލެކްޝަންސް ކޮމިޝަން (އީސީ)ގެ ރައީސް އަހުމަދު ޝަރީފު ގެނައުމުގެ ހަކަތަ އެބަހުރި ކަމަށް ކުރީގެ ބަންޑާރަ ނައިބު ދިޔާނާ ސައީދު ވިދާޅުވެއްޖެއެވެ.
ގުޅިފައިވާ ޕާޓީތަކުން އައްޑޫ ސިޓީ، ހިތަދޫގައި ބުރާސްފަތި ދުވަހުގެ ރޭ ބޭއްވި ޖަލްސާގައި ވާހަކަފުޅު ދައްކަވަމުން ދިޔާނާ ވިދާޅުވީ ވޯޓުގެ ނަތީޖާ ކޮންމެ ގޮތަކަށް ނުކުތަސް، ރައީސް އަބްދުﷲ ޔާމީން އިންތިހާބު ކާމިޔާބު ކުރެއްވި ކަމަށް ބުނެ، ނަތީޖާ އިއުލާން ކުރުމުގެ ހަކަތަ ހުރި ކަމަށް ޝަރީފު ވިދާޅުވަމުން ގެންދާ ކަމަށެވެ.
ވޯޓު ގަޑުބަޑުކޮށްލަން ފުރުސަތު ނުދެއްވާނެ ކަމަށް ވިދާޅުވެ، ދިޔާނާ ވަނީ ޝަރީފަށް ބަހުގެ ހަމަލާތަކެއް ރައްދު ކުރައްވާފައެވެ.
"ކޮންމެ ގޮތަކަށް ނަތީޖާ އަޔަސް، ތިމަން ބޭފުޅުން ހަކަތަ އެބަހުރި ކަމަށް ޔާމީނަށް ކާމިޔާބު ވެއްޖެކަން އިއުލާން ކުރަން. އަޅުގަނޑު އެ ބޭފުޅާއަށް ދަންނަވަން އޮތީ އެފަދަ ގޮތަކަށް ވޯޓު ގަޑުބަޑުކޮށްފިނަމަ އަޅުގަނޑުމެންގެ ކިބައިގައި ހަކަތަ އެބަހުއްޓޭ، އެމަނިކުފާނު ގާނޫނުގެ ކުރިމައްޗަށް ގެނައުމަށް. މި މަސައްކަތުގައި އަޅުގަނޑުމެންގެ ކަށިތައް ފީވެގެން ދިޔަޔަސް، އެފަދަ ގޮތަކަށް ގޯހުން އަމަލު ކުރައްވައިފިނަމަ، އަޅުގަނޑުމެން އެމަނިކުފާނު ދުލެއް ނުކުރާނަން. އެމަނިކުފާނަށް ދެން ކިޔާނީ ރަންގޮނޑި ޝަރީފެއް ނޫން. އަނދަގޮނޑި ޝަރީފު،" ދިޔާނާ ވިދާޅުވިއެވެ.
އިންތިހާބުގެ ނަތީޖާ އިލެކްޝަންސް ކޮމިޝަނަށް ފޮނުވުމުގައި އިންތިހާބުގެ އޮފިޝަލުން ބޭނުން ކުރާ ޓެބްލެޓާ ގުޅޭ ގޮތުން ދިޔާނާ ވިދާޅުވީ ޓެބްލެޓަކުން ނަތީޖާ ނެރުމަށް ގާނޫނު ތަން ނުދޭ ކަމަށެވެ. ގާނޫނުއަސާސީއާ ހަވާލާ ދެއްވައި، ދިޔާނާ ވަނީ އެކަމަށް ހުއްޖަތުތަކެއް ދައްކަވާފައެވެ.
"ނަތީޖާ ލިޔުމަށްފަހު، ޝީޓުގައި ލިޔެ، ބަހައްޓަންވާނެ. މި ނޫން ގޮތަކަށް ޖާގަ ދީގެން ނުވާނެ. ވޯޓުގެ ނަތީޖާ އިއުލާން ކުރެވެންދެން ތިބޭފުޅުން ތިބެންވާނެ،" ރައީސް ނަޝީދުގެ ސަރުކާރުގައި ބަންޑާރަ ނައިބުކަން ކުރެއްވި ދިޔާނާ ވިދާޅުވިއެވެ.
