މައިންބަފައިން ދަސްކޮށްދިނީވެސް އަދި ދަރިންނަށް މިހާރު ދަސްކޮށްދެނީވެސް "ބެގް، ބޮރޯ އޯރ ސްޓީލް" ފަލްސަފާ ނޫންކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެއެވެ.

ފައިސާ ނުލިބިއްޖެނަމަ ސަލާން ޖަހައިގެންވެސް ނުވަތަ ލޯނު ނަގައިގެންވެސް ނުވަތަ ވައްކަންކޮށްގެންވެސް ފައިސާ ހޯދުން އެއީ އެންމެ ރަނގަޅުކަމެއްކަމަށް ދޭހަވާ ގޮތަށް ދާދިފަހުން ރައީސް އަބްދުﷲ ޔާމީން ދެއްކެވި ވާހަކަފުޅަށް ރައްދު ދެއްވަމުން، އައްޑޫ ހިތަދޫގައި ބުރާސްފަތި ދުވަހުގެރޭ ބޭއްވި ގުޅިފަައިވާ ޕާޓީތަކުގެ ޖަލްސާގައި ވާހަކަ ދައްކަވަމުން އަސްލަމް ވިދާޅުވީ އެބޭފުޅުން ދަސްކޮށްދޭން ބޭނުންފުޅުވާ ފިލާވަޅަކީ ހައްޤު ގޮތުގައި މަސައްކަތްކޮށްގެން ފައިސާ ހޯދުމަށެވެ. 

އަދި އެބޭފުޅުންނަށް ދަސްވެފައިވާ ފިލާވަޅަކީ ހައްޤު ގޮތުގައި ފައިސާ ހޯދައި، ލިބޭ މިންވަރަށް އީމާންވުންކަމަށެވެ. އަސްލަމް ވިދާޅުވީ ވައްކަން ކުރުމުގެ އުޞޫލު މިއަދުގެ ޒުވާނުން ބަލައިނުގަންނާނެކަމަށެވެ. އަދި ގުޅިފައިވާ ޕާޓީތަކުގެ ސިޔާސަތަކީ ޒުވާނުންނަކީ އަޚުލާގު ރަނގަޅު ބަޔަކަށް ހެދުންކަމަށް އޭނާ ވިދާޅުވިއެވެ. އަދި ވައްކަން ނުކުރާ، އަމިއްލަ މަސައްކަތުން އާމްދަނީ ހޯދާ ފަޚުރުވެރި ޒުވާނުން އުފެއްދުން ކަމަށެވެ. 

"އިރާދަކުރެއްވިއްޔާ މިފަދަ ޒުވާނުންނަށް ބޭނުންވާ ތަމްރީނާއި، ހުނަރުތައް ދިނުމަށް ބޭނުންވާ ވަޞީލަތްތައް ޤާއިމްކުރެވިގެންދާނެ،" އަސްލަމް ވިދާޅުވިއެވެ. 

އައްޑޫ ސިޓީއަށް 1.4 ބިލިއަން ރުފިޔާ ޚަރަދުކޮށްފައިވާކަމަށް ރައީސް އަބްދުﷲ ޔާމީން ވިދާޅުވުމާއި ގުޅިގެން އެއަށް ރައްދު ދެއްވަމުން އަސްލަމް ވިދާޅުވީ ފޭދޫ ބިން ހިއްކުމާއި ސްކޫލް މަރާމާތުކުރުން ފަދަ މަދު ކަމެއް ނޫންކަމެއް ފެންނަން ނެތްކަމަށެވެ. އަދި އެކަމަށް 400 މިލިއަން ރުފިޔާވެސް ޚަރަދު ނުވާނެކަމަށް އަސްލަމް ވިދާޅުވިއެވެ. އެހެންކަމަށްވާނަމަ 1 ބިލިއަން ރުފިޔާ ދިޔަ ތަނެއް އޮންނަން ވާނެކަމަށްވެސް އަސްލަމް ވިދާޅުވިއެވެ. އަދި ނަހަލާލު ގޮތުގައި ފައިސާ ވަނީ ކޮން ގެއަކަށްކަން ބަލާނެކަމަށް އަސްލަމް ވިދާޅުވިއެވެ. 

އަސްލަމް ވިދާޅުވީ އައްޑޫ އިން ރައީސް ޔާމީން ހޯއްދަވާނެ ވޯޓެއް ނެތްކަމަށެވެ.