ބޭރުގެ ނޫސްވެރިންް އަދި އޮބްޒަރވަރުންނަށް ވިސާ ނުދިން!
20 ސެޕްޓެމްބަރު 2018 | ބުރާސްފަތި 18:04އިންޑިއާގެ ނޫސްވެރިންނާއި މީީޑިއާތައް ދަނީ ކަންބޮޑުވުން ފާޅުކުރަމުން
އިންތިޚާބު އޮބްޒަރވްކުރުމަށް މީޑިއާއަށް ބޮޑެތި ހުރަސްތަކެއް އެބަ ހުރި
އާދިއްތަ ދުވަހު ބާއްވާ ރިޔާސީ އިންތިޚާބު ކަވަރުކުރުމަށް މޮނީޓަރުންގެ ފާސް ދޫކޮށްފައިވީނަމަވެސް، ރާއްޖެއަށް އައުމުގެ ވިސާ ބޭރު ގައުމުތަކުގެ ނޫސްވެރިންނާއި އޮބަޒރވަރުންނަށް އިމިގްރޭޝަނުން ނުދޭކަމަށް ބައެއް ފަރާތްތަކުން ބުނެފިއެވެ.
އިންތިޚާބު ކަވަރުކުރުމަށް ރާއްޖެއާއި ބޭރުގެ މީޑިއާއަށް ބޮޑެތި ހުރަސްތަކެއް ކުރިމަތިކުރުވާފައި ވަނިކޮށް، ރާއްޖެއަށް އަންނަ އިންޑިއާގެ ނޫސްވެރިންނަށް ވިސާ ނުދިނުމާއި ގުޅިގެން މި އިންތިޚާބު އިންޑިއާގެ މީޑިއާއަށް ކަވަރު ނުކުރެވޭނެއެވެ. ބޭރުގެ ނޫސްވެރިންނަށް ނުރައްކާތެރި ޤައުމެއްގެ ގޮތުގައި ބައެއް ނޫސްވެރިން ރާއްޖެ ސިފަކުރަމުންދާއިރު، އިންތިޚާބު ކަވަރުކުރަން އަންނަ ބޭރުގެ ނޫސްވެރިން ޓޫރިސްޓް ވިސާގައި އައިސްގެން ނުވާނެކަމަށާއި، ނަގަން ޖެހޭނީ ބިޒްނަސް ވިސާކަމަށް އިމިގްރޭޝަނުން ވަނީ އަންގާފައެވެ.
ވިސާ ނުލިބުމުގެ ސަބަބުން އިންޑިއާގެ ނޫސްވެރިންނަށް ރާއްޖެ ނާދެވޭތީ ނޫސްވެރިންނާއި މީީޑިއާތަކުން ގެންދަނީ ކަންބޮޑުވުން ފާޅުކުރަމުންނެވެ.
ހަމައެހެންމެ އޭޝިއާ ނެޓްވޯކްސް ފޯރ ފްރީ އިލެކްޝަންސްއިން ވެސް ވަނީ އެ ޖަމިއްޔާގެ އެއްވެސް އޮބްޒަރވަރަކަށް މިހާތަނަށް އައިއިރު ރާއްޖެ އައުމަށް ވިސާ ލިބިފައި ނުވާ ކަމަށް ބުނެފައެވެ. އެހެން ނަމަވެސް އިލެކްޝަންސް ކޮމިޝަނުން ވަނީ އެ ޖަމިއްޔާ ވެސް ބައިނަލްއަގްވާމީ އޮބްޒަރވަރުންގެ ލިސްޓުގައި ހިމަނާފައެވެ.
ބޭރުގެ ނޫސްވެރިންނާއި އޮބްޒަރވަރުންނަށް ރާއްޖެއަށް އައުމަށް ހުރަސް އަޅާފައިވާއިރު، އިންތިޚާބު އޮބްޒަރވްކުރުމަށް ވިލާތުގެ އިއްތިޙާދާއި، އދ، އަދި ކޮމަންވެލްތުން މިފަހަރު ނާދެއެވެ. އިންތިޚާބު އޮބްޒަރވްކުރުމަށް ބޭރުން ގެންނަނީ ހަމައެކަނި ސަރުކާރާއި ސަރުކާރު ހިންގާ ޕާޓީ ޕީޕީއެމްއާއި ގުޅުން ހުރި ބައެއް ޖަމްއިއްޔާތަކެވެ.
